Marekani yajiondoa rasmi WHO
Rais wa Marekani, Donald Trump alitia saini agizo kuu la kuashiria kujiondoa mwaka mmoja uliopita, baada ya kukosoa shirika hilo kwa kuwa "msingi wa Uchina" wakati wa janga la Covid.
Muhtasari
- Baraza la Haki za Binadamu la Umoja wa Mataifa lafanya mkutano kujadili masuala ya Iran
- Urusi, Ukraine na Marekani zitafanya mazungumzo huko Abu Dhabi
- Ufunguo, miwani na shati la Mandela vyaruhusiwa kuuzwa
- 'Wajumuishe M23 katika mfumo wa usalama wa serikali' – Marekani
- Baba na mwana kati ya watu wanne waliouawa na droni za Urusi - Ukraine
- Idadi ya vifo kutokana na moto katika maduka ya jumla Pakistani yaongezeka hadi 67
- Trump amuandikia Waziri Mkuu wa Canada barua ya kufuta mwaliko
- Matamshi ya Trump kuhusu Iran yapandisha bei ya mafuta duniani
- Trump: Nguvu kubwa ya kijeshi inaelekea Iran
- Ufaransa yakamata meli ya mafuta inayodhaniwa kuwa ya "kimagendo" ya Urusi
- Marekani yajiondoa rasmi katika shirika la Afya duniani WHO
- Greenland, Bodi ya Amani ya Trump na Ukraine - kinachoendelea
- Maafisa wa ICE wamkamata mtoto wa miaka mitano na baba yake huko Minnesota, wakili asema
- UN kusimamia kambi ya al-Hol yenye familia za IS nchini Syria baada ya vurugu
- Viongozi wa mapinduzi ya kijeshi Guinea-Bissau wapanga tarehe ya uchaguzi wa Desemba
- Marekani yafichua mipango ya "Gaza Mpya" yenye majengo marefu
- Zelensky asema Ukraine itazungumza na Marekani na Urusi
Moja kwa moja
Lizzy Masinga & Mariam Mjahid
Baraza la Haki za Binadamu la Umoja wa Mataifa lafanya mkutano kujadili masuala ya Iran
Chanzo cha picha, BBC Persian
Baraza la Haki za Binadamu la Umoja wa Mataifa linafanya kikao cha dharura kuhusu Iran leo kushughulikia viwango vya ukandamizaji mkali dhidi ya maandamano mwezi Januari 2026.
Mai Sato, Ripota Maalumu wa Haki za Binadamu nchini Iran, alikiambia kikao maalum cha Umoja wa Mataifa mjini Geneva:
"Lugha hatari na matamshi ya mamlaka ya Iran, ambayo yanawaita waandamanaji wa amani "magaidi," "wafanya ghasia" au "ukandamizaji wa ndani" zinahalalisha ukandamizaji wa kikatili, Bi Sato alisema.
Mwakilishi wa Bulgaria alisema katika mkutano huo: "Tunakubaliana na taarifa ya Umoja wa Ulaya kuhusu hali ya Iran."
Aidha alishutumu ukatili uliotumika kukabiliana na waandamanaji na kuwekwa kizuizini bila ya mahakama.
Mwakilishi huyo wa Bulgaria alitoa wito wa kusitishwa kwa mtandao wa intaneti na kuitaka Jamhuri ya Kiislamu ya Iran kuwaruhusu raia wake kupata mtiririko huru wa taarifa.
Soma Pia:
Urusi, Ukraine na Marekani zitafanya mazungumzo huko Abu Dhabi
Chanzo cha picha, VYACHESLAV PROKOFYEV/SPUTNIK/KREMLIN POOL/EPA/Shutterstock/Reuters
Wapatanishi wa Urusi, Ukraine na Marekani watafanya mazungumzo katika Umoja wa Falme za Kiarabu hivi karibuni, katika kile maafisa wanasema kitakuwa ni kikao cha kwanza kuwaleta pamoja nchi zote tatu tangu Moscow ilipoanzisha uvamizi wake mkubwa karibu miaka minne iliyopita.
Kremlin imethibitisha kuwa maafisa wa Urusi watahudhuria mazungumzo hayo kufuatia mkutano kati ya Rais Vladimir Putin na maafisa wa Marekani mjini Moscow.
Urusi ilieleza kuwa mazungumzo hayo ni “yenye manufaa kwa kila upande”, lakini ilisema kuwa makubaliano ya amani ya muda mrefu hayawezi kufanikishwa hadi masuala ya mipaka yawe yametatuliwa.
“Hadi hili lifanikishwe, Urusi itaendelea kwa uthabiti kufanikisha malengo ya operesheni yake maalum ya kijeshi”.“Bila kutatua suala la mipaka kulingana na mpango ulioafikiwa huko Anchorage, hakuna matumaini ya kufanikisha makubaliano ya muda mrefu,” alisema, Msaidizi wa Kremlin, Yuri Ushakov.
Rais wa Ukraine, Volodymyr Zelensky, alisema anayaona mazungumzo ya Abu Dhabi kama “hatua kwa matumaini kuelekea kumaliza vita”.
Alirejelea kile kilichojiri kwenye kilele kati ya Trump na Putin huko Alaska mwaka uliopita.
Soma Pia:
Ufunguo, miwani na shati la Mandela vyaruhusiwa kuuzwa
Chanzo cha picha, Getty Images
Maelezo ya picha, Binti mkubwa wa Mandela ana ruhusa ya kuuza vitu vya kibinafsi, ikiwa ni pamoja na moja ya shati lake la maua. Mahakama ya Afrika Kusini imetupilia mbali rufaa ya Shirika la Urithi wa Taifa (SAHRA) ya kuzuia uuzaji na usafirishaji wa baadhi ya vitu vya kihistoria vinavyohusiana na shujaa wa kupigania ukandamizaji wa ubaguzi wa rangi, Nelson Mandela.
Vitu 70 binafsi vinajumuisha ufunguo wa seli kutoka Kisiwa cha Robben, ambapo Mandela alikalia gerezani kwa miaka 18 kati ya 27 aliyokaa ndani, jozi ya miwani ya Aviator, na shati moja la maua lililo maarufu kama alivyovaa Mandela.
Vitu hivi vilikuwa vinatarajiwa kusafirishwa hadi Marekani kwa ajili ya mnada.
Vitu hivyo vinamilikiwa na binti yake wa kwanza, Makaziwe Mandela, na Christo Brand, aliyekuwa mlinzi wa Kisiwa cha Robbenwakati Mandela akiwa gerezani.
SAHRA ilidai kuwa vitu hivyo ni sehemu ya urithi wa taifa la Afrika Kusini na hivyo vinastahili kulindwa kisheria dhidi ya usafirishaji nje ya nchi, na hivyo kujaribu kuzuia uuzaji wao.
Shirika hilo liligundua mnada huu kupitia makala ya gazeti la Uingereza mwishoni mwa mwaka 2021, ikidai kwamba ufunguo mmoja ungeuzwa kwa zaidi ya pauni milioni 1 ($1.35m).
Baada ya hilo, SAHRA iliandika kwa nyumba ya mnada ya Marekani, Guernsey, kuomba kusimamisha mnada na kurudisha mali hizo Afrika Kusini.
Vitu vingine vitakavyokuwa mnadani ni: nakala ya Katiba ya Afrika Kusini ya 1996 iliyosainiwa binafsi na Mandela, moja ya michoro yake ya mkaa, kadi ya utambulisho, raketi ya tenisi aliyotumia Robben Island, pamoja na zawadi kutoka viongozi wa dunia, ikiwemo zawadi kutoka kwa Rais wa zamani wa Marekani Barack Obama na mkewe Michelle.
Binti wa Mandela alitaka kutumia mapato yanayopatikana kutoka mnadani kujenga bustani ya kumbukumbu kwenye kaburi la baba yake Qunu, Mthatha, jimbo la Eastern Cape.
Katika uamuzi wake, Mahakama Kuu ya Rufaa ilisema kuwa maelezo ya SAHRA kuhusu nini kilichokuwa chini ya Sheria ya Urithi wa Taifa ilikuwa pana mno, na hivyo haikuwa msingi wa kisheria kuzuia mnada kuendelea.
Soma Pia:
'Wajumuishe M23 katika mfumo wa usalama wa serikali' – Marekani
Chanzo cha picha, Live Event
Maelezo ya picha, Sarah Troutman, mwakilishi wa zamani wa Wizara ya Mambo ya Nje ya Marekani Mbunge wa Texas amesema kwamba kujumuisha waasi wa M23 katika vikosi vya usalama vya serikali, pamoja na nchi za jirani kushirikiana kufaidika na rasilimali za madini za Congo, kungekuwa suluhisho la vita vya muda mrefu kaskazini mashariki mwa Congo.
Mbunge Ronny Jackson, daktari wa zamani wa Jeshi la Marekani, alitoa kauli hii Alhamisi wakati Kamati ya Mambo ya Nje ya Bunge la Marekani ilipokuwa ikiwahoji wawakilishi wa serikali kuhusu maendeleo katika utekelezaji wa makubaliano ya amani ya Washington, yaliyosainiwa mwezi uliopita kati ya Jamhuri ya Kidemokrasia ya Congo (DRC) na Rwanda.
Kiongozi wa kamati hiyo, Chris Smith, alisema kuwa “kitu muhimu zaidi katika makubaliano ya Washington” ni hatua nne zilizowekwa na pande zote, kwa msingi kwamba “Rwanda ilikubali kuondoa wanajeshi wake [kutoka Congo] lakini tu kama DRC itaheshimu mpango uliokubaliwa wa kuharibu kundi la FDLR.”
Smith, ambaye anawakilisha jimbo la New Jersey, alisema kuwa sababu za kina za vita hivi bado zinaendelea kuibuka na kuenea kwenye maeneo mengine, na kwamba FDLR pamoja na itikadi zake za mauaji ya halaiki bado ni tatizo kuu la serikali ya Rwanda kaskazini mashariki mwa Congo.
Sarah Troutman, msaidizi wa Katibu wa Jimbo wa Masuala ya Afrika, ambaye alihudhuria kutoa ufafanuzi kwa niaba ya serikali, alisema kuwa FDLR ni kundi linalotia wasiwasi, na “hawaruhusiwi kufanya shughuli zao kaskazini mashariki mwa Congo.”
“Tunaendelea kuhimiza serikali ya DRC kwamba kuondoa FDLR, kama walivyoahidi katika makubaliano haya, ni kipaumbele, na tunataka kuona hatua zaidi zikichukuliwa kufanikisha hilo.” Troutman pia alisema kuwa kuunganisha M23 katika jeshi la Kongo ni jambo la muhimu sana katika mazungumzo ya Doha. Aliongeza: “Na ni jambo litakalojadiliwa katika mazungumzo yajayo, na tunasaidia kwa nguvu jitihada zinazofanyika kuandaa mazungumzo hayo, huku Marekani ikiendelea kutoa msaada wa kiufundi wakati tunapojiandaa kwa mazungumzo hayo.”
Hata hivyo, mamlaka za Congo katika miezi ya hivi karibuni zimekosoa pendekezo hili, na mwishoni mwa Septemba 9, mbunge wa chama tawala aliwasilisha bungeni mswada unaopinga waasi wa zamani kuajiriwa katika jeshi na muundo wa serikali bila kwanza kufikishwa kwenye vyombo vya sheria.
Soma Pia:
Baba na mwana kati ya watu wanne waliouawa na droni za Urusi - Ukraine
Chanzo cha picha, Ukraine Emergency Services
Maelezo ya picha, Vifusi vya nyumba baada ya kugongwa na ndege isiyo na rubani Cherkaske, katika wilaya ya Kramatorsk Watu wanne, akiwemo mvulana wa miaka mitano, wameuawa katika shambulizi la ndege zisizo na rubani za Urusi nchini Ukraine, shirika la huduma za dharura la Ukraine linasema.
Inasema shambulio hilo lilitokea katika eneo la makazi ya kibinafsi katika kijiji cha Cherkaske, katika wilaya ya Kramatorsk mashariki mwa Ukraine.
Inaongeza kuwa miili ya watu wawili, akiwemo mtoto, iliopolewa na wafanyakazi wa dharura kutoka kwenye vifusi vya nyumba iliyoharibiwa.
Ofisi ya Mwendesha Mashtaka wa Mkoa wa Donetsk inaongeza kuwa watu wawili kati ya waliouawa ni mwanaume mwenye umri wa miaka 32 na mtoto wake wa kiume mwenye umri wa miaka 5, huku watu wengine watano wakijeruhiwa akiwemo mama wa mtoto aliyekufa.
Soma Pia:
Idadi ya vifo kutokana na moto katika maduka ya jumla Pakistani yaongezeka hadi 67
Chanzo cha picha, Getty Images
Maelezo ya picha, Wenyeji wa Karachi wangetembelea Gul Plaza kwa wingi, haswa kabla ya sherehe, harusi na hafla zingine muhimu. Idadi ya vifo kutokana na moto uliozuka katika maduka ya jumla ya biashara Pakistan imefikia watu 67, imethibitishwa na polisi.
Polisi wanasema kuwa familia za watu 77 bado zinatafuta wapendwa wao waliopotea kufuatia moto uliozuka kwenye Gul Plaza, katika jiji kubwa zaidi la Pakistan, Karachi, Jumamosi jioni.
Hata hivyo, kiwango kikubwa cha uharibifu kilichosababishwa na moto huo ambao ulichukua zaidi ya saa 24 kuuzima kimepunguza kasi ya juhudi za uokoaji, huku mamlaka zikiendelea kuchunguza mabaki ya jengo lenye ukubwa wa mita za mraba 6,500 (sq ft 70,000).
Ingawa baadhi ya maiti zilizopatikana ni mabaki tu, mamlaka zimehesabu miili ya binadamu 67, amesema Naibu Kamishna wa Polisi, akizungumza na BBC.
Mchakato wa kutambua maiti unaendelea, na hadi sasa watu 15 wametambulika.
Sababu ya moto bado haijafahamika, ingawa mashahidi walisema awali kwa BBC kwamba ukosefu wa njia za dharura zinazofanya kazi pamoja na msongamano wa wanunuzi na vibanda vilivyopangwa vibaya ndani ya jengo vilizidisha madhara.
Kwa kuwa kituo hicho kilikuwa kinaelekea kufungwa hivi karibuni, milango mingi ya kituo cha biashara ilikuwa imefungwa, mashahidi walisema.
Afisa mkuu wa polisi, Syed Asad Raza, alisema kwa shirika la habari la Reuters kuwa milango yote isipokuwa mitatu kati ya 16 ya kituo hicho ilikuwa imefungwa.
Soma Pia:
Trump amuandikia Waziri Mkuu wa Canada barua ya kufuta mwaliko
Chanzo cha picha, EPA
Rais wa Marekani Donald Trump ameondoa mwaliko wake kwa Canada kujiunga na kile kinachoitwa ''Bodi ya Amani", tukio la hivi punde zaidi ambalo linaangazia mvutano kati ya majirani hao wawili wa Amerika Kaskazini.
Katika chapisho kwenye akaunti yake ya Truth Social, Trump alimwandikia Waziri Mkuu wa Canada Mark Carney moja kwa moja, akisema:
"Tafadhali zingatia barua hii kama taarifa kwamba Tume ya Amani imeondoa mwaliko uliotolewa kwako kuhusu uanachama wa Canada."
Uamuzi huo ulikuja siku chache baada ya Carney kuonya kuhusu "pengo" katika utaratibu wa kimataifa unaoongozwa na Marekani.
Ottawa imeeleza nia yake ya kujiunga na bodi hiyo ya amani, lakini imeweka wazi kuwa haitalipa ada ya uanachama ya dola bilioni moja, ambayo Trump alisema itahitajika kwa wanachama wa kudumu kufadhili bodi hiyo.
Soma pia:
Matamshi ya Trump kuhusu Iran yapandisha bei ya mafuta duniani
Chanzo cha picha, Getty Images
Kufuatia kauli za hivi majuzi za Rais wa Marekani Donald Trump kuhusu Iran, bei ya mafuta ilipanda katika masoko ya kimataifa.
Katika biashara ya mapema leo asubuhi kwenye masoko ya kimataifa, mafuta ghafi ya Brent yalipanda senti 43 hadi $64.49 kwa pipa.
Mafuta ghafi kati ya Marekani Magharibi na Texas pia yalipanda senti 42 hadi $59.78 kwa pipa.
Rais wa Marekani Donald Trump aliwaambia waandishi wa habari jana usiku akiwa kwenye ndege yake akirejea kutoka kwenye mkutano wa kilele wa Davos nchini Uswisi kwamba kikosi kikubwa kinaelekea Iran.
Alisema: "Kuna meli nyingi zinazoelekea upande huo. Kikosi kikubwa cha meli kinasogea upande huo na tunapaswa kuona nini kitatokea.
Kikosi kikubwa kinaelekea upande wa Iran. Nisingependelea chochote kitokee.
Tunakiangalia kwa karibu sana. Nguvu kubwa ambayo inasonga kwa njia kubwa kuelekea huko. Labda haitakuwa muhimu kuitumia. Sasa tutaona."
Soma Pia:
Trump: Nguvu kubwa ya kijeshi inaelekea Iran
Chanzo cha picha, EPA
"Kuna meli nyingi zinazoelekea huko," Rais wa Marekani Donald Trump aliwaambia waandishi wa habari kwenye ndege yake akirejea kutoka mkutano wa Davos nchini Uswizi.
"Msafara mkubwa wa meli za kijeshi unaelekea huko, na tutaona kitakachotokea.
Kikosi kikubwa kinasonga kuelekea Iran. Nisingependa chochote kifanyike. Tunawatazama kwa karibu sana. Nguvu kubwa inaelekea huko kwa kiasi kikubwa . Huenda isitumike. Tutaona."
Rais wa Marekani anazungumzia kuhusu msafara mkubwa wa meli za kijeshi unaoelekea katika Ghuba ya Uajemi ikiwemo na USS Abraham Lincoln.
Siku 27 baada ya kuanza kwa maandamano ya hivi majuzi nchini Iran, hisia za ndani na kimataifa kuhusu ukandamizaji mkubwa wa waandamanaji zinaendelea.
Kukatika kwa mtandao na vikwazo vikali vya mawasiliano vinaendelea.
Ufaransa yakamata meli ya mafuta inayodhaniwa kuwa ya “kimagendo” ya Urusi
Chanzo cha picha, Emmanuel Macron/X
Maelezo ya picha, Meli hiyo ya Grinch ilisafiri kutoka Murmansk kaskazini mwa Urusi, maafisa wa Ufaransa walisema Ufaransa imesema imeteka meli ya mafuta katika Bahari ya Mediterania inayodhaniwa kuwa sehemu ya “meli ya kimagendo'' ya Urusi inayolenga kukwepa vikwazo vya kimataifa.
Rais wa Ufaransa, Emmanuel Macron, alisema meli hiyo iitwayo Grinch iko chini ya vikwazo vya kimataifa na inashukiwa kuwa ilitumia bendera bandia.
Jeshi la majini la Ufaransa, kwa msaada wa washirika wakiwemo Uingereza, liliipanda meli hiyo Alhamisi asubuhi katika eneo kati ya Uhispania na Morocco.
Mamlaka za usafiri wa majini za Ufaransa zilisema upekuzi wa meli hiyo “ulithibitisha mashaka kuhusu uhalali wa bendera iliyokuwa ikipeperushwa”.
Ubalozi wa Urusi mjini Paris ulisema haukuwa umejulishwa kuhusu hatua hiyo ya kutekwa kwa meli.
Kinachoitwa “msafara wa meli za kimagendo” wa Moscow ni mtandao wa siri wa meli za mafuta unaotumiwa kukwepa vikwazo vya Magharibi dhidi ya mauzo ya mafuta ya Urusi, kwa kusafirisha mafuta kwa kutumia meli chakavu zenye umiliki au bima isiyoeleweka.
Mamlaka za Ufaransa zilisema Grinch ilikuwa ikisafiri kutoka bandari ya Murmansk katika Aktiki, kaskazini mwa Urusi, ilipokamatwa.
Kwa mujibu wa tovuti za ufuatiliaji wa meli Marinetraffic na Vesselfinder, meli hiyo ilikuwa ikipeperusha bendera ya Visiwa vya Comoro.
Akitoa tangazo hilo kupitia X, Macron alisema: “Tumedhamiria kuheshimu sheria za kimataifa na kuhakikisha utekelezaji madhubuti wa vikwazo. Shughuli za ‘msafara wa kivuli’ zinachangia kufadhili vita vya uvamizi.”
Misafara ya kivuli inazidi kuenea, huku Venezuela, Iran na Urusi zote zikituhumiwa kuitumia kukwepa vikwazo vya mafuta.
Kampuni ya ujasusi wa kifedha ya S&P Global inakadiria kuwa moja kati ya kila meli tano za mafuta duniani hutumiwa kusafirisha mafuta kwa njia ya magendo kutoka nchi zilizo chini ya vikwazo.
Soma pia:
Habari za hivi punde, Marekani yajiondoa rasmi katika shirika la Afya duniani WHO
Chanzo cha picha, FABRICE COFFRINI/AFP via Getty Images
Marekani imejiondoa rasmi kutoka kwa Shirika la Afya Duniani (WHO), na kuacha shirika hilo la Umoja wa Mataifa bila mmoja wa wafadhili wake wakubwa.
Rais wa Marekani, Donald Trump alitia saini agizo kuu la kuashiria kujiondoa mwaka mmoja uliopita, baada ya kukosoa shirika hilo "kwa kuipendelea China" wakati wa janga la Covid.
Idara ya Afya na Huduma za Kibinadamu ya Marekani ilisema ilichukua uamuzi huo kutokana na madai ya WHO "kushughulikia vibaya" janga hilo, kutokuwa na uwezo wa kufanya mabadiliko na ushawishi wa kisiasa kutoka kwa nchi wanachama.
WHO imekataa madai haya na mkurugenzi mkuu wake Tedros Adhanom Ghebreyesus alisema kujiondoa huko ni hasara kwa Marekani na dunia kwa jumla.
Shirika hilo lilitaja jitihada zake za kimataifa za kukabiliana na polio, UKIMWI, vifo vya uzazi, na mkataba wake wa kimataifa kuhusu udhibiti wa tumbaku.
Kufuatia janga hili, nchi wanachama wa WHO wali shirikiana kuunda mkataba wa kimataifa wa janga kwa lengo la kuzuia, kujiandaa na kukabiliana na janga la siku zijazo, pamoja na kugawana chanjo na dawa kwa haki zaidi.
Mkataba huo hatimaye ulikubaliwa mwezi Aprili mwaka jana na nchi zote wanachama wa WHO, mbali na Marekani.
Washington kwa jadi imekuwa mmoja wa wafadhili wakubwa wa WHO, lakini haijalipa ada zake za mwaka 2024 na 2025, ambayo tayari imesababisha upotezaji mkubwa wa kazi katika shirika hilo.
Ingawa wanasheria wa WHO wanapendekeza kuwa Marekani inalazimika kulipa malimbikizo hayo - yanayokadiriwa kuwa $260m (£193m) - Washington ilisema haikuona sababu ya kufanya hivyo.
Ilisema kwamba ufadhili wote wa serikali ya Marekani kwa WHO umekatishwa, wafanyikazi na wakandarasi wa Marekani wamerudishwa kutoka makao makuu ya WHO huko Geneva, Uswizi na ofisi zake ulimwenguni kote, na mamia ya mawasiliano kati ya Marekani na WHO yamesimamishwa au kukatishwa. "
WHO ilipuuzilia na kufutilia mbali kila kitu ambacho Marekani imeifanyia," taarifa ya pamoja ya Waziri wa Afya wa Marekani Robert F Kennedy na Waziri wa Mambo ya Nje Marco Rubio ilisoma.
Greenland, Bodi ya Amani ya Trump na Ukraine - kinachoendelea
Chanzo cha picha, EPA
Alhamisi ilikuwa siku nzito ya diplomasia huko Davos, Uswisi, ambako viongozi wa dunia wamekuwa wakikutana wiki hii kwa ajili ya Jukwaa la Kiuchumi la Dunia (World Economic Forum) la kila mwaka.
Hapa kuna muhtasari wa mambo makuu ya jana:
Greenland
Kulikuwa na hali ya nafuu barani Ulaya kufuatia matamshi ya Trump aliyotoa usiku uliotangulia, ambapo alionekana kuachana na msimamo wake kwamba Marekani lazima ipate umiliki wa Greenland. Alitangaza kuwa kulikuwa na “mfumo wa makubaliano ya baadaye” na Katibu Mkuu wa NATO, Mark Rutte.
Hata hivyo, tangu Jumatano, maelezo machache sana yameibuka kuhusu mfumo huo unahusisha nini hasa. Mwenyekiti wa Kamati ya Kijeshi ya NATO, Admirali Giuseppe Cavo Dragone, alisema makubaliano hayo yako katika “hatua ya awali kabisa”, akiongeza kuwa “bado tunasubiri mwelekeo.”
Katika mahojiano na Fox Business, Trump alisema makubaliano hayo yataruhusu “ufikiaji ulio kamili,” na kwamba “tunapata kila kitu tunachotaka bila gharama.”
Bodi ya Amani
Trump alizindua rasmi Bodi yake mpya ya Amani katika hafla ya kutia saini pamoja na viongozi wa kimataifa.
Awali, bodi hiyo ilibuniwa kama njia ya kutekeleza sehemu ya mpango wa kusitisha mapigano huko Gaza. Lakini Trump na maafisa wake walisema sasa itashughulikia masuala mbalimbali ya kimataifa, huku rais wa Marekani akisema ina uwezo wa kuwa “moja ya taasisi zenye athari kubwa zaidi kuwahi kuanzishwa.”
Waziri wa Mambo ya Nje wa Uingereza, Yvette Cooper, alisema Uingereza haitajiunga kwa sasa, kutokana na wasiwasi kuhusu ushiriki wa Rais wa Urusi, Vladimir Putin. Hakuna hata mmoja wa wanachama wa kudumu wa Baraza la Usalama la Umoja wa Mataifa, China, Ufaransa au Urusi, ambaye ameahidi kushiriki hadi sasa.
Ukraine
Baadaye, rais wa Marekani alikutana na Rais wa Ukraine, Volodymyr Zelensky. Baada ya mkutano huo, Zelensky aliwaambia waandishi wa habari kuwa wamekubaliana kwamba hati kuhusu dhamana za usalama ilikuwa “tayari”, lakini bado inahitaji kutiwa saini na kupelekwa kwa mabunge ya kitaifa.
Katika hotuba kali kwa wajumbe wa Davos, Zelensky alisema Ulaya mara nyingi huepuka “kuchukua hatua”, na akaitaka kufanya zaidi ili “kujilinda yenyewe.”
Unaweza kusoma;
Maafisa wa ICE wamkamata mtoto wa miaka mitano na baba yake huko Minnesota, wakili asema
Chanzo cha picha, Columbia Heights Public Schools
Maafisa wa Uhamiaji na Forodha wa Marekani (ICE) wamemkamata mvulana wa miaka mitano Jumanne wakati wa operesheni ya utekelezaji wa uhamiaji, maafisa wa shule ya Minnesota na wakili wa familia wamesema.
Mwanafunzi wa shule ya awali Liam Ramos alikuwa na baba yake aliyetajwa na Idara ya Usalama wa Ndani (DHS) kama Adrian Alexander Conejo Arias
Katika taarifa iliyochapishwa kwenye X, DHS ilisema "ICE haikumlenga mtoto", lakini ilikuwa ikifanya operesheni dhidi ya baba yake, "mgeni haramu" ambaye "alimtelekeza" mwanawe alipofikiwa.
Zena Stenvik, msimamizi wa Shule za Umma za Columbia Heights, aliuliza: "Kwa nini kumshikilia mtoto wa miaka mitano?"
"Huwezi kuniambia kwamba mtoto huyu ataorodheshwa kuwa mhalifu."
Katika chapisho kwenye X, ICE ilikana kwamba mtoto huyo alikuwa amekamatwa. "Mgeni haramu mhalifu alitelekeza mtoto wake alipokuwa akiwakimbia maafisa wa ICE, na maafisa wetu walihakikisha mtoto huyo alikuwa salama katika baridi kali," shirika hilo lilisema.
"ICE ilifanya majaribio mengi ya kuifikisha familia ndani ya nyumba kumlea mtoto. "Walikataa kukubali kumlea mtoto.
Baba aliwaambia maafisa kwamba alitaka mtoto abaki naye."
DHS haikujibu mara moja ombi la BBC la kupata maoni.
Picha zilizotolewa kwa BBC na wilaya ya shule zinaonesha mvulana, aliyetambuliwa kama Liam Ramos, akiwa amevaa kofia ya majira ya baridi kali yenye umbo la sungura, akiwa amesimama nje huku afisa akiwa ameshikilia mkoba wake.
Unaweza kusoma;
UN kusimamia kambi ya al-Hol yenye familia za IS nchini Syria baada ya vurugu
Chanzo cha picha, Anagha Subhash Nair/Anadolu via Getty Images
Shirika la Umoja wa Mataifa (UN) limesema litasimamia kambi moja kaskazini-mashariki mwa Syria inayowahifadhi maelfu ya watu walio na uhusiano unaodaiwa na kundi la kigaidi la Islamic State (IS).
Hatua hii inakuja baada ya vikosi vya Wakurdi vilivyoendesha kambi hiyo kujiondoa kutokana na kuendelea kwa mashambulizi ya vikosi vya serikali ya Syria, jambo lililosababisha vurugu ambazo zilisababisha mashirika ya misaada kusitisha shughuli zao.
Ripoti zilisema wakazi walivuka mipaka ya kambi hiyo kwa dhana ya kujaribu kutoroka, jambo lililosababisha vurugu na wizi.
Makubaliano ya kusitisha mapigano yamesababisha sehemu kubwa ya kaskazini-mashariki mwa Syria kuwa chini ya udhibiti wa Damascus, na kuhitimisha miaka ya utawala huru wa Wakurdi.
Akitoa taarifa kwa Baraza la Usalama la Umoja wa Mataifa Alhamisi, afisa wa UN Edem Wosornu alisema kuwa shirika la wakimbizi la UNHCR limechukua jukumu la usimamizi wa kambi” katika kambi ya al-Hol na linafanya kazi na mamlaka za Syria ili kurejesha upatikanaji wa misaada ya kibinadamu.
Vikosi vya Syria, vilisema, vimeweka mipaka ya usalama kuzunguka kambi hiyo.
Hata hivyo, msemaji wa UN Stéphane Dujarric alionya kuwa hali ndani ya kambi bado “ni yenye mvutano na isiyo thabiti”, huku shughuli za kibinadamu zikibaki kusitishwa kufuatia vurugu hizo.
Viongozi wa mapinduzi ya kijeshi Guinea-Bissau wapanga tarehe ya uchaguzi wa Desemba
Chanzo cha picha, AFP via Getty Images
Mamlaka ya kijeshi, Guinea-Bissau, nchi inayokumbwa mara kwa mara na mapinduzi ya kijeshi, imepanga kufanyika kwa uchaguzi wa urais na bunge tarehe 6 Desemba, licha ya wito wa kuharakisha kurejea kwa utawala wa kiraia.
Rais wa mpito, Horta N’Tam, alitia saini amri hiyo siku ya Jumatano baada ya kukutana na wajumbe wa Baraza la Taifa la Mpito, jeshi na maafisa wa serikali, pamoja na wawakilishi wa tume ya uchaguzi.
Aliwaambia waandishi wa habari kuwa masharti ya kufanyika kwa uchaguzi huru na wa haki tayari yametimizwa.
Tangu viongozi wa mapinduzi ya kijeshi walipochukua madaraka kutoka kwa Rais Umaro Sissoco Embaló mwezi Novemba, wamekuwa wakikabiliwa na shinikizo kutoka jumuiya ya kikanda ya Afrika Magharibi, Ecowas, kuandaa uchaguzi ndani ya kipindi kifupi cha mpito.
Jumuiya ya kikanda hapo awali ilikataa pendekezo la baraza la kijeshi la kuweka kipindi cha mpito cha mwaka mmoja, ikaifungia nchi hiyo kushiriki katika vyombo vyake vya maamuzi, na kutishia kuiwekea vikwazo zaidi.
Hadi sasa haijulikani Ecowas itachukua msimamo gani kuhusu ratiba ya uchaguzi sasa kwa kuwa imetangazwa rasmi na baraza la kijeshi.
Mapinduzi ya kijeshi ya Novemba 2025 yalizua ukosoaji mkubwa, huku wengi wakipinga uamuzi wa jeshi kuchukua madaraka siku chache kabla ya kutangazwa rasmi kwa matokeo ya uchaguzi wa urais.
Wakati huo, Rais Embaló na mpinzani wake mkuu, Fernando Dias, wote walidai ushindi. Jeshi lilisema liliingilia kati ili kuzuia njama ya kuhujumu uthabiti wa kisiasa wa taifa hilo la Afrika Magharibi, ambalo tayari lilikuwa dhaifu na lisilo na utulivu.
Unaweza kusoma;
Marekani yafichua mipango ya “Gaza Mpya” yenye majengo marefu
Chanzo cha picha, Getty Images
Marekani imefichua mipango yake ya kuanzisha “Gaza Mpya”, ambayo inalenga kujenga upya kabisa eneo la Palestina lililoharibiwa vibaya.
Vielelezo vilionesha majengo marefu mengi ya kisasa yakienea kando ya pwani ya Mediterania pamoja na makazi mapya katika eneo la Rafah.
Ramani pia ilionesha mpango wa maendeleo kwa awamu wa maeneo mapya ya makazi, kilimo na viwanda kwa ajili ya wakazi milioni 2.1 wa Gaza.
Mipango hiyo iliwasilishwa wakati wa hafla ya utiaji saini katika Jukwaa la Kiuchumi Duniani (World Economic Forum) huko Davos, kwa ajili ya kuanzishwa kwa Bodi mpya ya Amani ya Rais Donald Trump, ambayo imepewa jukumu la kumaliza vita vya miaka miwili kati ya Israel na Hamas na kusimamia ujenzi upya.
“Tutafanikiwa sana huko Gaza. Litakuwa jambo kubwa sana la kutazama,” Trump alitangaza.
Mkwe wa Trump, Jared Kushner, ambaye alisaidia kufanikisha makubaliano ya kusitisha mapigano yaliyoanza kutekelezwa mwezi Oktoba, alisema kuwa tani 90,000 za silaha zilidondoshwa Gaza na kwamba kuna tani milioni 60 za kifusi zinazohitaji kuondolewa.
“Mwanzoni, tulikuwa na wazo la kusema: ‘Tujenge eneo huru, halafu liwepo eneo la Hamas.’ Kisha tukasema: ‘Unajua nini, hebu tupange kwa mafanikio makubwa kabisa,’” aliambia hafla hiyo.
“Hamas ilisaini makubaliano ya kuondoa silaha, na hilo ndilo tutakalosimamia litekelezwe. Watu wanatuuliza mpango wetu wa pili ni upi. Hatuna mpango wa pili.”
Ramani ya “Mpango Mkuu” wa Marekani ilionesha eneo lililotengwa kwa ajili ya “utalii wa pwani”, ambako kutapangwa kujengwa majengo marefu 180, pamoja na maeneo mengine ya makazi, vituo vya viwanda, vituo vya data na uzalishaji wa teknolojia ya juu, pamoja na hifadhi za mazingira, kilimo na vituo vya michezo.
Bandari mpya ya bahari na uwanja wa ndege mpya vitajengwa karibu na mpaka wa Misri, na kutakuwa na “kituo cha kuvukia cha pande tatu” mahali ambapo mipaka ya Misri na Israel inapokutana.
Ujenzi upya utagawanywa katika awamu nne, ukianza Rafah na kisha kusonga taratibu kuelekea kaskazini hadi Gaza City.
Unaweza kusoma;
Zelensky asema Ukraine itazungumza na Marekani na Urusi
Chanzo cha picha, EPA
Rais Volodymyr Zelensky amesema mazungumzo ya pande tatu kuhusu kumaliza vita nchini Ukraine yatafanyika kati ya Ukraine, Urusi na Marekani katika Umoja wa Falme za Kiarabu (UAE), baada ya kukutana na Rais Donald Trump huko Davos.
Wakati juhudi za kidiplomasia zikionekana kuongezeka kasi, Trump alisema kuwa mkutano wake na Zelensky ulikuwa mzuri, huku mjumbe wa Marekani Steve Witkoff akielekea Moscow kwa mazungumzo na Rais wa Urusi Vladimir Putin.
Witkoff, aliyekuwa akisafiri kwenda Moscow akiwa na mkwe wa Trump, Jared Kushner, alisema ana matumaini makubwa kuhusu kufikiwa kwa makubaliano.
“Nadhani tumebakiza suala moja tu, na tayari tumejadili njia mbalimbali za kulitatua, jambo linalomaanisha linaweza kutatuliwa,” alisema kabla ya kuondoka katika eneo la mapumziko la Uswisi.
Mjumbe wa Trump hakutoa maelezo kuhusu suala lililobaki kuwa kikwazo, lakini baadaye Zelensky alifafanua kuwa hali ya baadaye ya mashariki mwa Ukraine bado ndiyo hoja ambayo haijapatiwa suluhu.
Alibainisha wazi kuwa mazungumzo yaliyopangwa kufanyika katika Falme za Kiarabu yataihusisha Urusi pamoja na Marekani na Ukraine, akiongeza kuwa “Warusi wanapaswa kuwa tayari kwa maridhiano, si Ukraine pekee.”
“Yote yanahusu ardhi. Hili ndilo suala ambalo bado halijatatuliwa,” Zelensky aliwaambia waandishi wa habari katika Jukwaa la Kiuchumi Duniani (World Economic Forum) huko Davos, Uswisi, akiongeza kuwa mazungumzo ya pande tatu yanaweza kutoa “mbinu mbalimbali” kwa pande zote mbili.
Pendekezo la Marekani kuhusu eneo la Donbas, kitovu cha viwanda cha Ukraine, ni kuanzishwa kwa eneo lisilo na wanajeshi na lenye uhuru wa kiuchumi, kwa kubadilishana na dhamana za usalama kwa Kyiv.
“Ikiwa pande zote mbili zinataka kutatua hili, basi tutalitatua,” Witkoff alisema, akieleza kuwa baada ya Moscow ataelekea Abu Dhabi, ambako vikundi kazi vitashughulikia masuala ya kijeshi pamoja na ustawi wa kiuchumi.
Unaweza kusoma;
Habari za asubuhi, karibu katika taarifa zetu za leo
