You’re viewing a text-only version of this website that uses less data. View the main version of the website including all images and videos.
ਅਮਰੀਕਾ: 3 ਮਾਮਲੇ ਜਿਨ੍ਹਾਂ 'ਚ ਚਰਚਿਤ ਲੋਕਾਂ 'ਤੇ ਲੱਗੇ ਜਿਣਸੀ ਸ਼ੋਸ਼ਣ ਦੇ ਇਲਜ਼ਾਮ
ਅਮਰੀਕਾ 'ਚ ਕਈ ਮਾਮਲੇ ਸਾਹਮਣੇ ਆਏ ਜਿਨ੍ਹਾਂ 'ਚ ਮਸ਼ਹੂਰ ਸਿਆਸਤਦਾਨਾਂ ਤੇ ਫ਼ਿਲਮੀ ਹਸਤੀਆਂ 'ਤੇ ਔਰਤਾਂ ਦੇ ਜਿਣਸੀ ਸ਼ੋਸ਼ਣ ਦੇ ਇਲਜ਼ਾਮ ਲੱਗੇ। ਇਸ ਵਿੱਚ ਅਮਰੀਕਾ ਦੇ ਸਾਬਕਾ ਰਾਸ਼ਟਰਪਤੀ ਦਾ ਵੀ ਨਾਂ ਆਉਂਦਾ ਹੈ। ਪੜ੍ਹੋ ਅਜਿਹੇ ਤਿੰਨ ਮਾਮਲੇ।
ਅਮਰੀਕੀ ਸੈਨੇਟਰ ਅਲ ਫ੍ਰੈਂਕਨ ਨੇ ਇੱਕ ਮਹਿਲਾ ਰੇਡੀਓ ਹੋਸਟ ਲੀਅਨ ਟਵੀਡਨ ਦੇ ਇਲਜ਼ਾਮਾਂ ਦਾ ਜਵਾਬ ਦਿੱਤਾ ਹੈ।
ਫ੍ਰੈਂਕਨ 'ਤੇ ਇਲਜ਼ਾਮ ਹਨ ਕਿ ਉਸ ਨੇ ਸੁੱਤੀ ਹੋਈ ਟਵੀਡਨ ਨੂੰ ਛੂਹਿਆ ਤੇ ਇੱਕ ਕਾਮੇਡੀ ਸਕਿੱਟ ਦੀ ਰਿਹਰਸਲ ਦੌਰਾਨ "ਜ਼ਬਰਦਸਤੀ" ਚੁੰਮਿਆ।
ਇਲਜ਼ਾਮ ਲਾਉਣ ਵਾਲੀ ਲੀਅਨ ਟਵੀਡਨ ਨੇ ਕਿਹਾ ਕਿ ਗੱਲ ਦਸੰਬਰ 2006 ਦੀ ਹੈ ਜਦੋਂ ਵਿਦੇਸ਼ ਵਿੱਚ ਅਮਰੀਕੀ ਫੌਜੀਆਂ ਦੇ ਮਨੋਰੰਜਨ ਲਈ ਪ੍ਰੋਗਰਾਮ ਕਰਵਾਇਆ ਗਿਆ ਸੀ।
ਰੇਡੀਓ ਹੋਸਟ ਟਵੀਡਨ ਨੇ ਕਿਹਾ, ''ਫ੍ਰੈਂਕਨ ਨੇ 'ਹਮਲਾਵਰ' ਤਰੀਕੇ ਨਾਲ ਉਸ ਨੂੰ ਚੁੰਮਿਆ ਤੇ ਕਿਹਾ ਕਿ ਉਨ੍ਹਾਂ ਨੇ ਇੱਕ ਸੀਨ ਦੀ ਰਿਹਰਸਲ ਕਰਨੀ ਸੀ।''
ਫ੍ਰੈਂਕਨ ਨੇ ਮੰਗੀ ਮੁਆਫ਼ੀ
ਫ੍ਰੈਂਕਨ ਨੇ ਟਵੀਡਨ ਨੂੰ ਇਸ ਤਰ੍ਹਾਂ ਛੂਹਣ ਲਈ ਮੁਆਫੀ ਮੰਗ ਲਈ ਹੈ।
ਉਨ੍ਹਾਂ ਇੱਕ ਬਿਆਨ 'ਚ ਕਿਹਾ, "ਮੈਨੂੰ ਇਸ ਤਰ੍ਹਾਂ ਦੀ ਰਿਹਰਸਲ ਦੀ ਯਾਦ ਨਹੀਂ ਪਰ ਮੈਂ ਫ਼ਿਰ ਵੀ ਲੀਅਨ ਤੋਂ ਮੁਆਫੀ ਮੰਗਦਾ ਹਾਂ। ਮੈਂ ਸਪੱਸ਼ਟ ਤੌਰ 'ਤੇ ਮਜ਼ਾਕੀਆ ਹੋਣਾ ਚਾਹੁੰਦਾ ਸੀ ਪਰ ਮੈਨੂੰ ਇਹ ਨਹੀਂ ਕਰਨਾ ਚਾਹੀਦਾ ਸੀ।
ਰਿਹਰਸਲ ਵੇਲੇ ਕੀ ਹੋਇਆ?
ਟਵੀਡਨ ਨੇ ਕਿਹਾ, "ਇੱਕ ਸੀਨ ਵਿੱਚ ਕਲਾਕਾਰ 'ਚੁੰਮਣ' ਲਈ ਮੇਰੇ ਵੱਲ ਆ ਰਿਹਾ ਸੀ, ਮੈਨੂੰ ਸ਼ੱਕ ਹੋ ਗਿਆ ਸੀ ਕਿ ਉਹ ਕੀ ਕਰਨਾ ਚਾਹੁੰਦਾ ਸੀ। ਮੌਕਾ ਦੇਖ ਕੇ ਉਸਨੇ ਆਪਣਾ ਹੱਥ ਮੇਰੇ ਸਿਰ ਦੇ ਪਿਛਲੇ ਪਾਸੇ ਰੱਖਿਆ ਤੇ ਆਪਣੇ ਬੁੱਲ੍ਹਾਂ ਨੂੰ ਮੇਰੇ ਬੁੱਲ੍ਹਾਂ ਉੱਤੇ ਰੱਖ ਦਿੱਤਾ।"
ਟਵੀਡਨ ਨੇ ਅੱਗੇ ਲਿਖਿਆ, "ਤੁਸੀਂ ਜਾਣਦੇ ਸੀ ਕਿ ਤੁਸੀਂ ਕੀ ਕਰ ਰਹੇ ਸੀ। ਤੁਸੀਂ ਜ਼ਬਰਦਸਤੀ ਮੈਨੂੰ ਮੇਰੀ ਸਹਿਮਤੀ ਦੇ ਬਿਨਾਂ ਚੁੰਮਿਆ।"
ਬਾਅਦ ਵਿੱਚ ਲਾਸ ਏਂਜਲਜ਼ ਵਿੱਚ ਇਕ ਪ੍ਰੈੱਸ ਕਾਨਫ਼ਰੰਸ ਦੌਰਾਨ ਟਵੀਡਨ ਨੇ ਇਸ ਬਾਰੇ ਹੋਰ ਵਿਸਥਾਰ ਨਾਲ ਦੱਸਿਆ।
ਫ੍ਰੈਂਕਨ ਨੇ ਕੀ ਕਿਹਾ?
ਫ੍ਰੈਂਕਨ ਨੇ ਆਪਣੇ ਦੂਜੇ ਬਿਆਨ ਵਿੱਚ ਕਿਹਾ, "ਮੈਂ ਔਰਤਾਂ ਦਾ ਸਤਿਕਾਰ ਕਰਦਾ ਹਾਂ। ਮੈਂ ਇਸ ਫ਼ੋਟੋ ਨੂੰ ਹੁਣ ਜਦੋਂ ਵੀ ਵੇਖਦਾ ਹਾਂ ਤਾਂ ਆਪਣੇ ਆਪ 'ਤੇ ਗੁੱਸਾ ਆਉਂਦਾ ਹੈ। ਇਹ ਬਿਲਕੁਲ ਠੀਕ ਨਹੀਂ ਸੀ।"
ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਵੀ ਮਾਮਲੇ 'ਤੇ ਆਪਣੀ ਪ੍ਰਤੀਕਿਰਿਆ ਦਿੱਤੀ ਹੈ। ਉਨ੍ਹਾਂ ਟਵੀਟ ਕਰਕੇ ਫ੍ਰੈਂਕਨ ਦੀ ਹਰਕਤ 'ਤੇ ਇਤਰਾਜ਼ ਜ਼ਾਹਿਰ ਕੀਤਾ ਹੈ।
ਸਾਬਕਾ ਅਮਰੀਕੀ ਰਾਸ਼ਟਰਪਤੀ 'ਤੇ ਵੀ ਇਲਜ਼ਾਮ
ਸਾਬਕਾ ਅਮਰੀਕੀ ਰਾਸ਼ਟਰਪਤੀ ਜੌਰਜ ਡਬਲਿਊ ਬੁਸ਼ ਸੀਨੀਅਰ 'ਤੇ ਵੀ ਛੇੜਖਾਨੀ ਦੇ ਇਲਜ਼ਾਮ ਲੱਗੇ ਹਨ। ਇੱਕ ਹੋਰ ਮਹਿਲਾ ਨੇ ਵੀ ਛੇੜਛਾੜ ਦਾ ਇਲਜ਼ਾਮ ਲਾਇਆ ਹੈ। ਇਹ ਬੁਸ਼ ਖਿਲਾਫ਼ ਅੱਠਵਾਂ ਮਾਮਲਾ ਹੈ।
ਤਾਜ਼ਾ ਇਲਜ਼ਾਮ ਇੱਕ ਤਰਜਮਾਨ ਵੱਲੋਂ ਲਗਾਏ ਗਏ ਹਨ। ਉਸ ਮੁਤਾਬਕ ਬੁਸ਼ ਨੇ 2004 ਵਿੱਚ ਉਸ ਨੂੰ ਗਲਤ ਤਰੀਕੇ ਨਾਲ ਛੂਹਿਆ।
ਉਸਨੇ ਕਿਹਾ ਕਿ ਕਥਿਤ ਮਾਮਲਾ ਸਾਬਕਾ ਅਮਰੀਕੀ ਰਾਸ਼ਟਰਪਤੀ ਤੇ ਸਪੈਨਿਸ਼ ਰੱਖਿਆ ਮੰਤਰੀ ਜੋਸ ਬੋਨੋ ਵਿਚਾਲੇ ਮੁਲਾਕਾਤ ਦੌਰਾਨ ਹੋਇਆ ਸੀ।
ਇਸ ਤੋਂ ਪਹਿਲਾਂ ਇੱਕ ਮਹਿਲਾ ਨੇ ਵੀ ਇਲਜ਼ਾਮ ਲਾਇਆ ਸੀ ਕਿ ਜਦੋਂ ਉਹ 16 ਸਾਲ ਦੀ ਸੀ ਤਾਂ ਸਾਬਕਾ ਰਾਸ਼ਟਰਪਤੀ ਬੁਸ਼ ਨੇ ਉਸਨੂੰ ਸਾਲ 2003 'ਚ ਫੋਟੋ ਖਿਚਵਾਉਣ ਵੇਲੇ ਗਲਤ ਤਰੀਕੇ ਨਾਲ ਹੱਥ ਲਾਇਆ ਸੀ।
ਹਾਲੀਵੁੱਡ 'ਚ ਵੀ ਸਰੀਰਕ ਸ਼ੋਸ਼ਣ
ਅਮਰੀਕੀ ਫ਼ਿਲਮ ਪ੍ਰੋਡਿਊਸਰ ਹਾਰਵੇ ਵਾਈਨਸਟੀਨ 'ਤੇ 50 ਤੋਂ ਜ਼ਿਆਦਾ ਔਰਤਾਂ ਨੇ ਸਰੀਰਕ ਸ਼ੋਸ਼ਣ ਤੋਂ ਲੈ ਕੇ ਬਲਾਤਕਾਰ ਦੇ ਇਲਜ਼ਾਮ ਲੱਗੇ ਹਨ।
ਇੰਨ੍ਹਾਂ ਔਰਤਾਂ ਵਿੱਚ ਹਾਲੀਵੁੱਡ ਦੀਆਂ ਉੱਘੀਆਂ ਅਦਾਕਾਰਾਂ ਐਂਜਲੀਨਾ ਜੋਲੀ, ਲੀਸੈੱਟ ਐਂਥਨੀ, ਰੋਸਾਨਾ ਆਰਕੇਟ, ਬ੍ਰਿਟ ਮਾਰਲਿੰਗ ਸ਼ਾਮਿਲ ਹਨ।
ਸਭ ਤੋਂ ਪਹਿਲਾ ਮਾਮਲਾ 1980 ਦਾ ਦੱਸਿਆ ਜਾ ਰਿਹਾ ਹੈ ਜੋ ਕਿ ਬ੍ਰਿਟੇਨ ਦੇ ਬਾਹਰ ਦਾ ਹੈ। ਇੱਕ ਹੋਰ ਮਹਿਲਾ ਨੇ 1980 ਵਿੱਚ ਹੀ ਪੱਛਮੀ ਲੰਡਨ ਵਿੱਚ ਸਰੀਰਕ ਸ਼ੋਸ਼ਣ ਦੇ ਇਲਜ਼ਾਮ ਲਾਏ।
