UK Visa: Lee ụmụakwụkwọ ndị mmachi mba a metụtara
Ebe foto si, Getty Images
Ụlọorụ mbịara mbịara nke mba Briten ekwuola na bido n'ụbọchị mbụ nke ọnwa Jenụwarị afọ a, ụmụakwụkwọ ọhụrụ agaghịzi enweike ịkpọta ezinaụlọ ha na mba ahụ.
Nke a pụtara n'akara X bụbu Twitter ha n'ozi ha ziputere n'ụbọchị Monde.
"Ndị na-abịa ịgụ akwụkwọ nyocha dị na ya nakwa ndị ji onyinye gọọmentị agụ akwụkwọ esoghi na ndị iwu a metụtara" ka ha kwukwara n'ozi ahụ.
Nke a bụ mbido otu n'ime ụfọdụ iwu ndị ha gbanwere gbasara mbịara mbịara na mba ha nke ha chọrọ ịbelata.
Ihe ọzọ ha kwukwara ga-emetụta ụmụakwụkwọ bụ ị si n'akwụkwọ ikike agụmakwụkwọ banye n'akwụkwọ ikike ọrụ dịka o si dibu mbụ.
Ọ pụtara na onye ọbụla ji akwụkwọ nwata akwụkwọ ga-ebu ụzọ gụchaa akwụkwọ tupu ọ chọọ ịgbanwe akwụkwọ ikike ya.
Ọ bụghị naanị ụmụakwụkwọ ka iwu ọhụrụ ndị a ga-emetụta dịka mba Briten machikwara ndị ọrụ ahụike ịkpọ ezinaụlọ ha ịbịa were ọrụ na be ha.
Edemede a nwere ihe ndị si na X. Anyị na-achọ ka i nye anyị ikike tupu e tinye ihe ọbụla, dịka akụrụngwa cookies na tekịnụzụ ndị ọzọ nwereike ịdị na ya. I nwereike ịgụ X iwu cookie na iwu nzuzo tupu ị nabata ya. Iji kirie ihe nọ n'ime ya, họrọ 'nabata na gaa n'ihu'.
End of X post
Briten amapụtala amụma ịkpachi mbata ndị mbịarambiara
Ebe foto si, Getty Images
Gọọmentị mba Briten amapụtala amụma ga-eme ya o sie ike ndị mbịarambịara inweta akwụkwọ ikike ịbata mba dịka ọnụ,ọgụgụ ndị na-awụbata rirị elu.
Mịnịsta ha na-ahụ maka ihe na-eme n'ụlọ nke mba Briten bụ James Cleverly, onye gbara ama a kwuru na amụma ahụ nke nwere alaka ise bụ iji belata ọnụọgụgụ ndị mbịara bịara n nke o kwuru na 'Ọ dị nnukwu elu".
Mgbanwe ahụ gunyere ibuli ụgwọọnwa o pekata mpe nke ndị ọrụ si mba ọzọ ka ọ bụrụ agbata Paụsụ 26,200 na 38,700(£26,200 -£38,700).
Ego kwesịrị ịdị n'akpa ezinaụlọ chọrọ itinye akwụkwọ ikike ịbata rịkwara rue puku paụsụ iri atọ na asatọ, narị asaa( £38,700.)
Mr Cleverly sịrị na mmadụ narị atọ( 300,000) nwenwuru ịke ịbata mba UK afọ gara aga agaghị enweli ike ime ya n'ọdị n'ihu.
N'ozi nke o zigara ndị omeiwu, Mịnịsta na-ahụ maka ihe na-eme n'ụlọ, kwuru na "ọ dị mkpa n'ọnụgụgụ ndị mbịarambịara gbadatara" ma kwụkwa na e nweela 'metọọ' ohere inweta akwụkwọ ikike ịbata maka ahụike na nleta ọtụtụ afọ.
Atụmatụ a na-abịa dịka ngụkọ e mere n'ọnwa gara aga gosiri na ndị mbịarambịara eruola 745,000 n'afọ 2022.
Ụfọdụ ndị omeiwu na-acha Praim Minista Rishi Sunak ọkụ ka o wetadata ọnụọgụgụ ndị na-abata mba Briten.
