Yoruba Nation: Kò sí Ilana Omo Oodua mọ́ ní UK, a fẹ́ ṣe àtúnṣe - Ilana Ọmọ Oodua

Ẹgbẹ Ilana Ọmọ Oodua ti kede wi pe awọn fẹ tu igbimọ ẹgbẹ Ilana Yoruba to wa ni Ilẹ Gẹẹsi ka ki wọn le ṣe atunto to peye.

Ninu atẹjade ti ẹgbẹ Ilana Ọmọ Oodua Worldwide gbe jade gba ọwọ akọwe ẹgbẹ, Maxwell Adeleye ni wọn ti fi aṣẹ tuntun naa jade.

Adari ẹgbẹ naa, Ọjọgbọn Banji Akintoye ni oun ti fi ọwọ si ituka igbimọ ẹgbẹ naa ni Ilẹ Gẹẹsi ni kiakia.

Wọn ni idi ti awọn fi gbe igbesẹ naa ni wi pe ki wọn le e ni ẹgbẹ ọmọ ilẹ Yoruba to gbooro ni Ilẹ Gẹẹsi nitori orilẹede naa pọn dandan si ijijagbara wọn, ti wọn si gbọdọ mojuto bi o ṣe n lọ ninu ẹgbẹ naa.

''A gbe igbeṣẹ naa ki ihuwasi to le e ba ohun gbogbo ti a n ṣe jẹ ma ba waye nitori awọn ọmọ Yoruba ni ile ni oko n gbiyanju loriṣirisi lati ri pe ẹgbẹ naa ko dojubole''

''Ilẹ Gẹẹsi si pọn dandan si ẹgbẹ ọmọ Yorubam nitori naa ni a o gbe igbimọ tuntun miran kalẹ ti yoo bojuto ẹgbẹ naa ni Ilẹ Gẹẹsi.''

''Bakan naa ni a n fi asiko yii kede pe Arabinrin Shola Salako kii ṣe adari ẹgbẹ Ilana Ọmọ Oodua ni oke okun.''

''Arakunrin Akin Wilson naa kii ṣe adari kankan ninu ẹgbẹ Ilana Ọmọ Oodua mọ ni Ilẹ Gẹẹsi.''

Ẹgbẹ Ilana Ọmọ Oodua wa kede pe ẹnikẹni to ba ba awọn mejeeji naa ṣe pọ yoo wa ni aye ara wọn kii ṣe ti ẹgbẹ Ilana Ọmọ Oodua.