Impotency: Pásítọ̀ Olumide Oni sọ ìrírí bó ṣe rí ìwòsàn ìyanu lẹ́yìn ọ̀pọ̀lọpọ̀ ọdún tó fi jẹ́ òkóbó

Ọkan lara awọn Pasitọ ijọ Mountain of Fire and Miracle Ministries, MFM, Pasitọ Olumide Oni ti sọ iriri rẹ bi o ṣe ri iwosan gba lẹyin ti o ti jẹ okobo lati kekere wa.

Pasitọ Oni sọ iriri rẹ lasiko to n ṣe ifọrọwerọ pẹlu akọroyin ileeṣẹ Punch nipa bi o ṣe bẹrẹ iṣẹ Oluwa, igbeyawo rẹ to fi mọ ipenija okobo to jẹ lati kekere.

Pasitọ Oni ni iya-iya oun to tọ oun dagba lo kọkọ sọ fun oun nipa ipe ti Oluwa pe oun si iṣẹ Oluwa ati bi oun 'se jẹ eniyan ara ọtọ ni Ọlọrun fi jẹ ki oun jẹ okobo.

O ni iya-iya oun sọ fun oun bẹẹ ni ọmọ ọdun mejila, bi o tilẹ jẹ pe oun ti mọ fun ara oun ki o to di asiko yii.

Iya Agba naa to jẹ woli sọ fun oun pe idi ti oun fi jẹ okobo ni lati lo ara oun fun iṣẹ Oluwa lai ṣe agbere tabi pansaga.

Pasitọ Ijọ MFM naa ni lẹyin ti iya agba ku, ni ohun gbogbo daru fun oun, ki oun to ranti asọtẹlẹ ti iya agba sọ fun nipa iṣẹ Oluwa.

''Lẹyin naa ni mo bẹrẹ iṣẹ Oluwa, ti mo si ri ore-ofẹ ati aanu loju baba mi ninu Oluwa, D. K. Olukoya to si gba mi gẹgẹ bi iranṣẹ Oluwa.''

''Lati igba naa ni mo ti bẹrẹ iṣẹ Oluwa , ti oun gbogbo si dara fun mi, to fi mọ awọn ijọ ti mo ti ṣe pasitọ ti gbogbo awọn ori ijọ yii si ni idagbasoke.''

Bi mo se ri iwosan gba lẹyin ọpọlọpọ ọdun ti mo fi jẹ okobo ni yii...

Pasitọ Olumide Oni ni lẹyin ti iya agba sọ fun oun idi ti oun fi jẹ okobo, ti nkan ọmọ ọkunrin rẹ ko le gberi ni oun ti gba kan mu.

''Lasiko ti mo jẹ pasitọ ni awọn ọmọ iya meji kan wa si ile ijọsin naa fun adura itusilẹ, amọ bi wọn ṣe wọn n lọ ni mo gbọ ohun pe iyawo mi ni ọkan lara awọn obinrin meji naa.''

''Lẹyin eyi ni mo darapọ mọ ẹka ijọ ti wọn ki n le kọnu ifẹ sii nitori eniyan o kan le dede lọ ba obinrin ninu ijọ nitori pe o gbọ ohun.''

''Lẹyin ti iyawo mi pari ẹkọ rẹ, ti a fẹ ṣe igbeyawo ni mo sọ fun un pe okobo ni mi, ti mo si le ma bimọ ni aye.''

''Iyawo mi ni oun ni igbagbọ pe ọkọ oun ni mi, ti Olorun yan fun un nitori naa oun ko ni tako igbeyawo wa nitori mo jẹ okobo''

''Inu mi dun nitori iyawo mi gba lati duro ti mi pẹlu ipenija ti mo n koju yii.''

''Amọ iyanu ṣẹlẹ ni ọjọ igbeyawo mi nitori ọjọ naa ni mo ri iwosan gba ni ọna ara.''

''Lati asiko ti ẹsin igbeyawo mi bẹrẹ ni ọjọ naa ni inu rirun bẹrẹ si ni damu mi, pasitọ to so wa pọ ni lati ṣe kanmọ kanmọ nitori inu rirun naa ti poju.''

''Inu rirun naa ko jẹ ki n le lọ si ayẹyẹ igbeyawo mi nibi ti ọpọ ero pejọ si lati jẹun.''

''Bi mo se n wọ ile ti a gba lati ma a gbe gẹgẹ bi lọkọ-laya ni mo ri pe nkan ọmọ ọkunrin mi dide, ti iriri mi gẹgẹ bi okobo si pari.''

''Lọwọlọwọ bayii mo ti di ẹni to bi ọpọlọpọ ọmọ nitori mo ri iyanu, ti mo si dupẹ lọwọ iyawo mi to duro ti mi.''