Benue news: Èèyàn méjì kú lásìkò tí ṣọ́ọ̀ṣì dà wó ní Taraba, àwọn míràn farapa

Ile ijọsin kan ti wo pa eeyan meji ni ipinlẹ Taraba, nigba ti awọn olujọsin mii farapa.

Ile ijọsin Holy Ghost Church to wa ni ijọba ibilẹ Takum ni iṣẹlẹ naa ti waye.

Alaga ijọba ibilẹ ọhun, Shiban Tikari lo fidi iṣẹlẹ naa mulẹ fun awọn akọroyin.

Iroyin ni isin n lọ lọwọ ni ile ijọsin naa wo, to si gbẹmi eeyan meji ọhun, Demenege James adti Mwueze Terzunwe.

Alaga ijọba ibilẹ naa fi kun pe awọn eeyan to farapa ti wa nile iwosan nibi ti wọn ti n gba itọju lọwọ.

Ẹwẹ, awọn janduku tun ti ṣoṣẹ ni abule kan to wa ni ala ipinlẹ Taraba ati Benue, nibi ti wọn ti pa eeyan kan, ti wọn si ji awọn mii gbe lọ.

Iroyin sọ pe ọpọ awọn olugbe abule naa to wa ni Benue lo salọ si agbegbe Koffai Ahmadu to wa ni ijọba ibilẹ Takum, ni Taraba lọjọ Abamẹta.

Alaga ijọba ibilẹ naa ṣalaye fun awọn akọroyin pe oun ti ke si awọn eleto abo lati ji giri si iṣẹ wọn lagbegbe ọhun ki ọrọ naa ma baa kọja bo ṣe yẹ lọ.

Alaga ọhun pari ọrọ rẹ pe ọwọ awọn agbofinro ko tii tẹ ọkankan lara awọn janduku naa titi di akoko ti a n ko iroyi yii jọ.