Yahoo boys in America: Ọmọ Naijiria tó ń ṣe Yahoo l'Amẹrika rí ẹ̀wọ̀n ọdún mẹ̀rin he

Ile ẹjọ kan nilẹ Amẹrika ti ran ọmọ Naijiria kan, Afeez Adebara lẹwọn ọdun mẹrin.

Adebara ri ẹwọn naa hẹ lẹyin ti wọn fẹsun kan pe oun lo n dari ẹgbẹ awọn onijibi ori ayelujara kan, ti ẹgbẹ naa wọn si ti gba ọpọlọpọ ọkẹ aimoye owo lọwọ awọn eeyan.

Lara awọn ti wọn sọ pe ẹgbẹ Adebara ti lu ni jibiti ni awọn obinrin ti wọn n wa ọkọ lori ayelujara atawọn arugbo kaakiri ilẹ Amẹrika, ti iye owo ti wọn ti gba lọwọ awọn eeyan ọhun ko si din ni miliọnu meji abọ dọla.

Ileeṣẹ to n ri si eto idajọ nilẹ Amẹrika sọ pe Adebara jẹwọ pe lootọ ni oun ṣẹ si ẹsun ti wọn fi kan oun.

Awọn iwe lati ile ẹjọ naa fi han pe ọdaran naọhun gba owo lọwọ awọn eeyan lọna ẹburu laarin ọdun 2017 si oṣu Kọkanla ọdun 2019.

Iwe ẹjọ ọhun tun ṣafihan pe ọdanra naa atawọn to ko sọdi maa n lo oniruru ayederu orukọ ati iwe irinna lati fi bo aṣiri iṣẹ ibi ti wọn n ṣe.

Wọn tun sọ pe Adebara maa n fi owo to ba ti pa nidii iṣẹ naa ranṣẹ si Naijiria, nigba miran ẹwẹ yoo fi owo ọhun ra awọn ọkọ bọgini ti yoo ko ranṣẹ sile.

Awọn iwe ẹjọ na ni "Adebara maa n forukọ silẹ lori ikanni awọn to n wa ọkọ ati aya lati fẹ awọn obinrin, ti yo si maa gba owo gọbọi lọwọ awọn ololufẹ rẹ ọhun labẹ ayederu orukọ."

Ọọfisi ileeṣẹ ọtẹlẹmuyẹ FBI to wa niluu Oklahoma lo ṣe iwadii naa pẹlu awọn oṣiṣẹ ọọfisi ọhun to wa ni San Francisco, Los Angeles ati New York ki ọwọ to tẹ Adebara atawọn ọmọlẹyin rẹ