Lateef Adedimeji and Adebimpe Oyebade: Ohun tí BBC mọ̀ nìyí nípa àjọṣepọ̀ òṣèré tíátà méjéèjì

Laipẹ yii ni iroyin jade pe, gbajugbaja oṣerebinrin, Adebimpe Oyebade ti loyun, ti ọpọ eeyan si n sọ pe akẹẹgbẹ rẹ, Lateef Adedimeji ni ọkọ rẹ to loyun fun.

Ṣugbọn nigba to n ba BBC Yoruba sọrọ lori eto kan ta se fun l‘Ọjọru, Adebimpe sọ pe iṣu Ọlọrun ti ko ṣe e fi ọwọ bo ni ọrọ oyun nini, ati ọrọ ọkọ.

O ni awọn ololufẹ oun yoo mọ boya lootọ ni oun loyun tabi bẹẹkọ, nigba ti oṣu mẹsan ba pe.

Bo tilẹ jẹ pe o ṣe alaye yii, ọpọ to wo ifọrọwanilẹnuwo naa lo tẹnumọ pe oju rẹ jọ oju oloyun.

Adebimpe ni ọrẹ timọtimọ ni oun ati Lateef, ti ko si si ọrọ ifẹ laarin wọn.

Nigba ti a beere lọwọ rẹ boya o le fẹ Adedimeji lọjọ iwaju, to ba dẹnu ifẹ kọ ọ, Adebimpe ni ọwọ Ọlọrun ni ohun gbogbo wa.

"Awa eeyan kan ma n gbiyanju ni, ti Ọlọrun ba sọ pe oun lọkọ mi, ma a sọ pe bẹẹni."

Oṣu diẹ sẹyin ni awọn aworan kan to jọ pe oun ati Lateef ṣe igbeyawo jade sori ayelujara.

Awuyewuye tẹle nigba naa, ti ko si si eyikeyi laarin awọn mejeeji to sọ boya lootọ ni wọn ṣe igbeyawo tabi rara.

Arẹwa oṣere naa, to kẹkọọ gboye akọkọ ninu ede Gẹẹsi sọ pe, sababi ni bi oun se di osere tiata.

O ni iṣẹ arinrin oge (model) ni oun fi bẹrẹ. To si jẹ pe ere kan ti wọn ti nilo ọmọbinrin ti ko sanra, to si jẹ alawọ dudu lo pilẹ ere ṣiṣe fun oun.

"Awọ ara mi to dudu ati Ọlọrun lo sọ mi di nkan ti mo di lonii. Awọ ara kọ lo ṣe pataki julọ fun eeyan lati ṣe oriire laye, bi eeyan ṣe mọ iṣẹ rẹ daju si lo ṣe koko."

Oṣere naa, to tun n ta aṣọ ati eroja aṣaraloge sọ pe, iṣẹ igbohunsafẹfẹ ni oun i ba tun ṣe, ka ni oun ko di oṣere.

O fikun pe oun ko fi igba kankan kabamọ pe oun ya sinu iṣẹ sinima ṣiṣe.

Lori iroyin to wọpọ pe awọn oṣerebinrin ma n ni ibalopọ pẹlu awọn alaṣẹ ati oludari ere, ki wọn o to o goke, Adebimpe sọ pe, iṣẹ ọwọ onikaluku lo n polongo rẹ, kii ṣe dandan ni lati ni ibalopọ pẹlu ẹnikẹni.