Traditional Birth Control: Wò àwọn nkán ìbílẹ̀ tí àwọn obìnrin òde òní fi n fètòsọ́mọbíbí

Ki a to lọ jina ninu apilẹkọ yi, a fẹ fi ikilọ kekere yi sita.

Ko si aridaju pe ilana ifetosọmọbibi kankan wa ti kii ja ni kulẹ.

Yala ti oloyinbo ni tabi ti ibilẹ, eeyan le lo ilana ifetosọmọbibi ki o si pada wa loyun to n sa fun.

Ko si ohun ti ko le ṣẹlẹ.

Igbagbo Yoruba ati ifetosọmọbibi

Bayi taa ti sọ eyiun ni tan, ka bọ si akori ọrọ wa gan an.

Aṣa awọn Yoruba kun fun orisi ilana ati eto eleyi ti wọn fi n gbọ ipenija eyikeyi to ba de ba wọn lagọ ara.

Lara awọn ipenija yi leleyi to ni ṣe pẹlu ilera awọn obinrin paapa fawọn to ba fẹ fi eto si ọmọ bibi.

Ki awọn obinrin to bẹrẹ si ni lo kọndọọmu,abẹrẹ tabi awọn oogun lati fi feto si ọmọ bibi, awọn iya wa paapa ti wọn ni imọ nipa ewe ati egbo, wọn a maa lo nkan ibilẹ ti wọn naa.

Lara nkan ti wọn maa n lo ni oruka,ẹgba ọwọ, asejẹ ati ilẹkẹ idi lati fi ṣeto ifetosọmọbibi.

Njẹ awọn nkan wọn yi ṣi wa ati pe ṣe wọn tilẹ n ṣiṣẹ bi atijọ?

Awọn alagbo ọmọ kan to fi ilu Osogbo ṣe ibujoko ṣalaye fun ileeṣẹ iwe Iroyin Punch pe awọn nkan wọn yi ṣi wa.

Koda wọn ni awọn obinrin ode iṣẹnyi a maa wa sọdọ awọn lati wa ra a.

Arakunrin Shina Elebuibon to n ta ewe ati egbo ni Osogbo ṣalaye pe ẹgba ọwọ,oruka ati ilẹkẹ idi wa lara awọn nkan tawọn n peelo.

''Lootọ lawọn mii a maa fi awọn ilẹkẹ idi yi ṣe oge ṣugbọn fawọn to ba beere wọn le lo lati feto sọmọ bibi.''

Shina Elebuibon ṣalaye pe awọn maa n ṣalaye orisi ilana ifetosọmọbibi fawọn obinrin to ba wa sọdọ awọn.

O ni bi apẹrẹ, pipeelo ilẹkẹ idi ko gba asiko pupọ lati ṣe bẹẹ naa ni ti ẹgba ọwọ.

Elebuibon ni: ''Mo ma ni ki wọn ra awọn ilẹkẹ tabi ẹgba yi wa.Bi a ba ti peelo to yẹ si tan, ẹni naa gbọdọ wọ to ba fẹ ni ibalopọ ki o baa maa fi loyun''

Ọgbẹni Shina tun sọ pe awọn a tun maa lo koro kan ti wọn n pe orukọ rẹ ni iwerejeje tabi oju ologbo.

Shina Elebuibon ni: ''Bi a ba ti lọ koro yi tan,ma o fi awọn nkan eelo miran si ti obinrin naa yoo si gbe mi.

Iye koro to ba gbe mi ni yoo tọka iye ọdun ti ko fi ni loyun''

Arabinrin Afolabi ti oun naa ṣalaye nipa awọn nkan ibilẹ yi sọ pe tẹlẹ lawọn alakọwe ko fi taratara gba ti wọn ṣugbọn nisin yi, awọn naa ti n lo ti ibilẹ yi.

''Lọwọlọwọ awọn alakọwe,oṣiṣẹ ijọba Kristẹni ati musulumi lo maa n wa si ọdọ wa.Ohun to jẹ ki wọn maa wa ni pe pupọ lo jẹri si pe awọn nkan wọn yi n ṣiṣẹ daada.''

Ninu alaye tawọn elewe ọmọ yi ṣe wọn ni awọn le fọwọ rẹ sọya pe awọn nkan wọn yi a maa jẹ bi idan.

Botilẹ jẹ wi pe awa ko ri aridaju pe bẹẹ lọrọ ri, iru nkan bayi ko jẹ tuntun lawujọ awọn Yoruba.

Owo ṣipini ti ko gun ni lapa lawọn elewe ọmọ a maa gba lọwọ awọn alabara wọn gẹgẹ bi wọn ṣe ṣalaye.

Kaakiri awọn ile iwosan ọfẹ ni idanilẹkọ ati eto ifetosọmọbibi fawọn araalu.

Ninu awọn eto yi leleyi tawọn obinrin a maa fi sinu apa, oju ara tabi eleyi ti wọn a maa lo bi tabilẹti loore koore.

Eyikeyi to ba ṣiṣẹ fun yin, ẹ ma gbagbe pe Eledua lo n fi ọmọ ta ni lọrẹ nigba kigba to ba wu.

Igbiyanju lda n gba, eleyi ti yoo ba di ọmọ iriri ti fi han lorisirisi pe ifetosọmọbibi ko ni le daa duro.

Ati sayẹnsi ati imọ awọn baba wa, ko si eleyi to le sọ pato bi iru nkan bayi ṣe n waye.