EndSARS: Makinde kéde ìrànwọ́ fáwọn ẹbí ọlọ́pàá tó bá rògbòdìyàn EndSARS lọ láti inú N500m tí a yà sọ́tọ̀

Gbogbo awọn ẹbi ọlọpaa to ba rogbodiyan iwọde EndSARS lọ ni ipinlẹ Oyo la o ṣeranwọ owo fun.

Gomina Seyi Makinde ipinlẹ Oyo lo ṣeleri bẹẹ nigba to ṣabẹwo si olu ileeṣẹ ọlọpaa ipinlẹ naa to wa niluu Ibadan lọjọ Aje.

Makinde sọ pe ninu ẹẹdẹgbẹta miliọnu naria ti ijọba Oyo ya sọtọ fawọn to fara kaasa ninu rogbodiyan ifẹhonuhan EndSARS ni ijọba yoo ti mu ṣe iranwọ fawọn ẹbi awọn ọlọpaa naa.

Gomina ipinlẹ Oyo rọ awọn ọlọpaa lati gbagbe ohun gbogbo to ṣẹlẹ ki wọn ṣiṣẹ pọ pẹlu ijọba lati rii wi pe alaafia jọba pada kaakiri ipinlẹ Oyo.

''Mi o fẹ ki ileeṣẹ ọlọpaa ri iwọde EndSARS gẹgẹ bi ọna lati tako awọn agbofinro bi ko ṣe ọna lati rii pe awujọ wa dun un gbe ju ti bi o ti wa lọ,'' Makinde lo sọ bẹẹ.

Makinde ni ọna kan gbogi lati jẹ ki awọn araalu mọ pe ọrẹ ni ọlọpaa jẹ si wọn ni nipa ihuwa ọmọluabi lẹni iṣẹ.

Gomina Makinde kẹdun pẹlu ileeṣẹ ọlọpaa lori ọlọpaa marun un to ba iṣẹlẹ naa lọ ati ọlọpaa mejila to farapa nipinlẹ Oyo.

O ni ijọba ko ni da ọrọ naa dawọn ọlọpaa papaa julọ lori bi awọn janduku kan tun ti dana sun agọ ọlọpaa marun un.

Makinde ni ajumọṣe ijọba atawọn araalu ni idagbasoke awujọ.

Ninu ọrọ tiẹ, igbakeji ọga ọlọpaa agba, DIG Leye Oyebade to n ṣakoso iwọ oorun gusu rọ awọn ọlọpaa lati wa lojufo, ki wọn si ri pe alaafia jọba pada nipinlẹ Oyo.