NDLEA mú dókítà àti sọ́jà lórí ẹ̀sùn títà egbòogi olóró

Ọwọ ajọ to n gbogun ti egboogi oloro ni Naijiria , NDLEA, ti tẹ dokita kan, Jane Chioma Ofoma, ti wọn fẹsun kan pe o n ta egboogi oloro lori ayeujara.

Wọn fẹsun kan oniṣegun oyinbo naa pe o n lo ṣọọbu rẹ lori ayelujara, Omachi's Kitchen, nibi to ti dibọn pe onjẹ ni oun n ta lati maa ta egboogi naa eyii to ti po mọ suiti ati bisikiti.

NDLEA tun fi ṣikun ofin mu ọkunrin kan to ti fi igba kan jẹ jagunjagun ri, Sgt Ibrahim Musa, lẹyin ti wọn ka nnkan bii kilo mẹtala igbo mọ lọwọ.

Ninu atẹjade kan ti agbẹnusọ NDLEA, Femi Babafemi fi sọwọ si awọn akọroroyin, o ni ọwọ tẹ awọn afurasi naa ni ipinlẹ Edo lẹyin iwadii awọn ọtẹlẹmuyẹ awọn.

Gẹgẹ bo ṣe sọ, awọn ọtẹlẹmuyẹ naa ya bo agbegbe ti awọn afurasi ọhun wa ni No 1 Winners Way, Auchi, nibi ti wọn ti ka nnkan bii ọgọrun bisikiti ti wọn fi egboogi igbo po mọ dokita naa lọwọ.

O ni "Chioma, to jẹ ẹni ọdun mẹrindinlọgbọn kẹkọọ jade nile ẹkọṣẹ iṣegun fasiti Nsukka, o si lọ sin ni ile iwosan fasiti Benin."

Babafemi sọ pe afurasi ọhun ti jẹwọ fun awọn pe lootọ ni oun maa n po egboogi "skunk" mọ bisikiti ti oun n ta lori ayelujara.

O sọ siwaju si pe awọn mu jagunjagun tẹlẹri, Musa, ni Oke-Odo, iyẹn lagbegbe Tanke, niluu Ilorin lọjọ kẹtadinlogun, oṣu ti a wa yii.

Alukoro NDLEA naa ṣalaye pe "Sgt Musa ti fi igba kan ṣiṣẹ ni barake Abati to wa niluu Eko ri, ko to lọ ṣiṣẹ pẹlu 17 battalion niluu Chibok, nipinlẹ Bornu, lẹyin naa lo salọ kuro nidii iṣẹ Ologun lọ siluu Ilorin."

O ni Musa jẹwọ fun awọn pe asiko ti oun wa ni Chibok ni oun pade ẹni to n ko egboogi igbo "Arizona" fun oun lati maa ta."

Atẹjade naa tẹsiwaju pe NDLEA tun fi ṣikun ofin mu ọkunrinẹni ọgbọn ọdun kan, Emmanuel Ehiramhen, to n ta egboogi kokeni niluu Ekpoma, nipinlẹ Edo yii kan naa.

Nigba to n da si ọrọ naa, ọga agba ajọ NDLEA, ajagunfẹyinti Brig. Gen. Mohamed Buba Marwa sọ pe afojusun awọn ni lati ri daju pe awọn kasẹ gbogbo ohun to jọ mọ titi ati lilo egboogo oloro ni Naijiria.