Cурия кимёвий қуролни исёнчилар ишлатганига оид "ашёвий далил"га эга
Россия ташқи ишлар вазири муовини Сергей Рябковнинг айтишича, Сурия ҳукумати Россияга кимёвий қурол исёнчилар томонидан ишлатилганига оид "ашёвий далил"ни тақдим этган.
Бу ҳақда россиялик дипломат чоршанбага ўтар кечаси Дамашқда Башар ал-Ассад маъмурияти расмийлари билан ўтказган мулоқоти ортидан айтган.
Дамашқнинг Москвага қандай "ашёвий далил"ни бергани ҳозирча аниқ эмас.
Сергей Рябков илова қилишича, Сурия можароасида кимёвий қуролларнинг ишлатилганига оид БМТ нозирлари ҳисоботи "сиёсий, нохолис ва бир томонламадир".
Унинг айтишича, БМТ нозирлари фақат 21 август куни содир этилган ҳужум ҳақидаги далилларни кўриб чиққанлар, аммо унга қадар уч марта амалга оширилган кимёвий ҳужумларга эътибор бермаганлар.
БМТ гуруҳи мазкур ҳужумда Сарин кимёвий моддаси ишлатилганини эълон қилган.
БМТ ҳисоботида ҳужум ким томонидан содир этилгани ҳақида маълумот берилмаган, лекин ғарб давлатлари Сурия ҳукумат кучларини айблайди.
Бироқ Кремл дастаклаётган расмий Дамашқ мухолифат кучларини айблаш зарурлигини айтади.
Айни дамда қурол яроқлар бўйича БМТ бош нозири, Аке Селлстром, Би-би-си билан суҳбатда Суриянинг барча кимёвий қуролларини топиш ва йўқ қилиш қийин бўлиши, аммо бунинг "имкони бор"лигини айтди.
Жаноб Селлстромнинг айтишича, кўп нарса Сурия ҳукумати ва мухолифатининг музокара қилиш истагига боғлиқ.
"Албатта, бу асабларни жуда чарчатадиган иш бўлади," - дея илова қилди у.
БМТ Бош котиби Пан Ги Мун 21 август куни Дамашқ яқинида кимёвий қуролнинг ишлатилишини "ҳарбий жиноят" деб атаган.
БМТ нозирлари ҳужум жойида топилган ракета қолдиқлари, инсонлар қони, сийдиги, сочи намуналарини текшириб чиққанлар.
Пан Ги Мун сўзларига кўра, инсонлар қонидан олинган намуналарнинг 85% зарин моддаси топилган.
Пан Ги Муннинг илова қилишича, нозирлар қурбонларнинг аниқ сонини аниқлай олмаганлар.
БМТ маълумотига кўра, 2011 йилда Ассадга қарши қуролли исён бошланганидан буён Сурияда 100 мингдан ортиқ инсон ҳалок бўлган.
Миллионлаб сурияликлар мамлакатни тарк этганлар, яна миллионлаб инсон бошпанасиз қолган.
