Башар ал-Ассад: кимёвий ҳужумни биз уюштирганимизга оид 'далил йўқ'
Сурия Президенти Башар ал-Ассад Қўшма Штатлар ахборот воситаларидан бирига гапираркан, ўз ҳукумати кимёвий қурол қўллаганига оид "далил йўқ"лигини айтган.
Ассад жаноблари PBS жамоатчилик телевидениесига берган интервюсида Ғарб ҳужум қиладиган бўлса, унинг иттифоқчилари бунга жавоб қайтаришлари мумкинлигига ҳам ишора қилган.
Америка Давлат котиби Жон Керри Оврўпо Иттифоқи ва Араб давлатлари ташқи ишлар вазирлари билан музокаралар чоғи зўр бериб Башар ал-Ассад тузумига қарши ҳарбий амалиётлар ғоясини илгари сурган.
АҚШ Конгресси Сурия можаросига ҳарбий йўсинда аралашиш керакми ёки йўқлиги масаласини мубоҳаса этиши кутилмоқда.
Ёзги таътилдан қайтган Конгресс аъзолари душанба куни Президент Барак Обаманинг Сурияга қарши "чекланган, тор кўламли" ҳужумлар борасидаги резолюциясини кўриб чиқишади.
Сенат айни масала юзасидан чоршанба куни овоз бериши кутилмоқда.
Америка Қўшма Штатлари жаноб Ассад кучларини тинч аҳолига қарши зарин гази воситасида ҳужум уюштирганликда айблайди.
Пойтахт Дамашқ четидаги мавзелардан бирида амалга оширилган ҳужум 1429 инсоннинг умрига зомин бўлган.
Президент Путин кимёвий ҳужум исёнкорларнинг иши эканини айтган.
Бирлашган Миллатларнинг Сурия бўйича резолюциясига тўсқинлик қилган Россия ва Хитой Хавфсизлик Кенгашидан ташқарида қабул қилинган ҳар қандай қарор ноқонуний бўлишини айтган.
Сурия икки ярим йилдирки, ички урушлар гирдобида қоларкан, БМТ ҳисоб-китобларига кўра, 100,000 атрофида инсон ҳаётдан кўз юмган. миллионлаб одамлар бошпанасиз қолган.
'Ҳарбий амалиётларнинг олди олиниши мумкин'
Қўшма Штатлар Бош котиби Жон Керрининг айтишича, Президент Ассад бир ҳафта ичида кимёвий қуролларини топширса, Сурияга қарши ҳарбий амалиётлар олди олиниши мумкин.
Аммо, унга кўра, жаноб Ассад бундай ниятда эмас.
Керри жаноблари бу ҳақда Сурияга қарши ҳарбий амалиётлар учун дастак йиғишга қаратилган сафарининг сўнгги манзили - Лондонда гапирган.
'Сурия тинчлик музокараларига тайёр'
Москвада эса, Россия ва Сурия Ташқи ишлар вазирлари ҳам учрашишган.
Россия Ташқи ишлар вазири Сергей Лавров Қўшма Штатларни Сурияга қарши ҳарбий амалиётларга эмас, тинчлик жараёнига диққат қилишга ундаган.
Шунингдек, у БМТ кимёвий қуроллар бўйича экспертларини Сурияга қайтиб боришга ва кимёвий деб гумон қилинаётган бошқа ҳужумлар юзасидан ҳам текширув олиб боришга чақирган.
Сурия ҳукумати бу амалларда исёнкорларни айблайди.
Унинг бу борадаги изоҳлари Сурия Ташқи ишлар вазири Валид Муаллим билан учрашуви ортидан янграган.
"Москвадаги данғиллама ҳовлида ўтган учрашув муҳим бир ўзгариш ясамаган кўринади. Икковлон ҳам Сурия ҳукумати тинчлик музокараларига тайёр деган фикрларини такрорлашди", дейди Би-би-сининг Москвадаги мухбири.
Сурия Ташқи ишлар вазири: "Нима учун Президент Обама Нью Йоркдаги 2001 йил сентябр ҳодисаларидан кейин ҳам "Ал-Қоидани дастакламоқда", деган саволни қўйган.
