Украина уруши: Ҳарбий блогернинг қотили чиндан ҳам Даря Треповами? Видео Ukraina Dunyo Yangiliklar Янгиликлар
Сурат манбаси, Russian interior ministry
Санкт-Петербургдаги қаҳвахонада ҳарбий блогер Владлен Татарский портлатилишига гумонланиб Даря Трепова қўлга олинганини хабар қилди Россия ҳуқуқ-тартибот органлари. Аммо ҳибс қилинган чиндан ҳам Треповами, унинг аксилуруш мавқеъси одам ўлдиришгача даражада бўлиши мумкинми, деган саволларни кўпчилик бермоқда.
Санкт-Петербургдаги 2 апрелдаги портлашда военкор Владлен Татарский номи билан танилган 40 ёшли Максим Фомин ҳалок бўлди, 30 киши яраланди.
Россиялик терговчилар дарҳол Даря Треповага қидирув эълон қилган, кўп вақт ўтмасдан, унинг қўлга олингани хабар қилинди.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Сўнг расмийлар Даря Трепованинг иқрори сифатида тақдим этилган видеони тарқатдилар.
Ҳойнаҳой, мажбурлаб тасвирга олинган видеода аёл кейинчалик портлаган ҳайкалчани Татарский қўлига берганини тан олган.
Лекин аёл бу статуэтканинг портлаши мумкинлигини билганмиди ёки йўқ, бу ҳодисада кейинги вазифаси нимадан иборат бўлган, буни очиқламайди.
Алоқадор мавзулар:
Терговчиларга кўра, ушбу ҳужум Украинада ташкиллаштирилгани исботини қўлга киритганлар.
Бироқ Украина президенти раҳбари маслаҳатчиси Михайло Подоляк портлашга Украинанинг алоқаси борлигини рад этди, бу ҳодисани Россиянинг ичидаги "ички терроризм" деб атади.
Хабар қилинишича, Владлен Татарский қаҳвахонада ўзининг "ижодий кечаси"ни ўтказаётган бўлган.
Интернет ижтимоий тармоқларида жигарранг палто кийган аёлнинг қўлида бир қути билан қаҳвахонага кираётгани ва кафе ичи ва ташқарисидаги портлаш онлари акс этган видеолар ҳам тарқалди.
Россия аксилтеррор қўмитаси даъвосига кўра, "террорчилик хуружини Украина махсус хизматлари мухолифат раҳбари Алексей Навалнийнинг одамлари билан ҳамкорликда ташкиллаштирган".
Сурат манбаси, VTatarsky/Telegram
Россия тергов қўмитаси янада илгари кетади ва бу ҳужум "Украина ҳудудида режалаштирилгани ва ташкиллаштирилганининг исботи бор" дейди.
Россиялик терговчиларга кўра, аллақачон ушбу ҳодисага қўшилган ҳамма одамларнинг занжирини аниқлашга муваффақ бўлганлар.
Навалнийнинг Аксилкоррупция жамғармаси шу муносабат билан баёнот тарқатди, Кремлнинг ўз танқидчисини террорчиликда айблаши "жуда табиий", чунки яқинда Навалнийнинг устидан унга экстремизм айблови илгари сурилган янги суд иши бошланиши кутилмоқда.
Трепованинг эрининг дўстининг уйида ҳибсга олингани ва сўнг Ўзбекистонга эрининг олдига учиб кетишга чипта олгани хабар қилинди.
Эри Даря Треповадан фойдаланган бўлишлари мумкинлиги эҳтимолини билдирди.
Эри ва Даря Трепова ўтган йили Россия Украинага босқин бошлаган куни урушга қарши протестга чиқишган ва бир неча кунни тутқунликда ўтказишган эди.
Street Food Bar No 1 қаҳвахонаси Нева дарёси соҳилида жойлашган, бир вақтлар унинг эгаси Евгений Пригожин бўлган.
Пригожин бугун "Вагнер" ёлланма жангарилар гуруҳининг раҳбари, бу гуруҳ бир неча ойдан буён Украина шарқида Бахмут шаҳри учун қақшатқич жангларда қатнашиб келаяпти.
3 апрель куни Россия Президенти Владимир Путин Владлен Татарскийни Жасорат ордени билан мукофотлади.
https://t.me/bbcuzbek
BBC.COM/UZBEK
Telegramda bog'lanish raqami +44 7858860002
