Россия-Украина: "Рус дунёси" асосчиси қизини ким ўлдирди? Фараз ва башоратлар Dunyo Yangiliklar
Тажовузкор «Рус дунёси» мафкурасининг асосчиси Александр Дугиннинг қизи Даря Дугинанинг машинада портлатиб ўлдирилиши россияликлар орасида бу жиноятнинг сабаблари бўйича қизғин баҳсларни келтириб чиқаряпти.
29 ёшли Даря Дугинанинг Land Cruiser Prado машинаси шанба оқшомида Москва ҳалқа йўлига 25 чақиримлик масофадаги Болшие Вязёми шаҳарчаси яқинида портлаган. Аёл ҳодиса жойида жон берган.
«Рус дунёси»нинг кўплаб фаоллари, жумладан Донецк халқ республикаси (ДНР) раҳбари Денис Пушилин ҳеч иккиланмасдан ва далил-исбот излаб ўтирмасдан Дугина автомашинасининг портлатилишида украиналиклар ёки уларга боғлиқ қандайдир кучларни айблади.
Жамоатчилик палатаси аъзоси Екатерина Мизулина эса "Киев, Одесса ва бошқа украин шаҳарларини тозалаш"га чақирди.
"Бу рус дунёси ғояси ва махсус амалиёт ўтказилишига мунтазам қарши чиқаётганларнинг тизимли ишларининг бир қисми. Мамлакатимиз қоқ ўртасида душман бажарган бу амалга фақат Киев, Николаев, Харков, Одесса ва бошқа рус шаҳарларини террорчилар ва қотиллардан тезда тозалаш билан жавоб бериш мумкин", - деб ёзди Мизулина Телеграм каналида.
"Мен Дугин-файласуфни кўкларга кўтармайман. Лекин, уни қоралаётганларнинг 99 фоизидан фарқли ўлароқ, уни ўқиганман. Менга 100 фоиз аёнки, унинг қизининг ўлдирилиши - Россия ва русларга қарши атайин қилинган зарба", - деб ёзди миллатчи, ҳукумат рўйхатидан ўтмаган Миллий-демократик партиясининг собиқ фаоли Владимир Тор (Кралин).
Сурат манбаси, Reuters
Украина президенти девони раҳбарининг маслаҳатчиси Михаил Подоляк портлаш ортида Украина турганини кескин рад этди.
"Таъкидлаб айтай, Украинанинг бунга ҳеч қандай алоқаси йўқ, чунки биз Россия Федерациясига ўхшаган жиноий ёки террорчи давлат эмасмиз", - деди Подоляк.
Унинг фикрича, бу қотиллик Россия ичидаги турли гуруҳларнинг тахт учун кураши ва таъсиридан далолат беради.
Сабаблар ва оқибатлар ҳақида фаразлар
Даря Дугинанинг ўлдирилиши қандай сиёсий аҳамият ё оқибатларга эга бўлиши ҳозирча ноаниқ, лекин кўплаб россиялик сиёсий қочқинлар бу ҳақида фикр юритишмоқда.
"Бу портлаш террорнинг янги тўлқинини келтириб чиқариб, хусусан, Путинга ёқмайдиганларнинг қариндошларига қарши ишлатишига шубҳа йўқ. Тунги портлаш бунга ажойиб "назарий асос"ни яратиб берди, Дугиннинг ўзи ҳам уни қўллаб-қувватлайди", - деб ёзди Екатеринбург шаҳар кенгашининг собиқ депутати, мухолифатчи Леонид Волков.
Сурат манбаси, TASS/ ZURAB DZHAVAKHADZE
Сиёсатшунос Татяна Становая ёзишича, бу ҳодиса Россия ҳукуматининг радикалроқ руҳдаги анъанадор доиралари билан муносабатларида тангликни келтириб чиқаради.
"Бу қотиллик сабаб анъанадор доираларда ҳукуматдан норозилик кучаяди. Улар Кремл қатъиятсиз амал қилаётганига ишонадилар. Бундай вазиятда Путиннинг қадамлари шокдаги анъанадор элита учун нўноқ ва легитимсизроқ бўлиб кўриниши мумкин. Дугинанинг ўлими Путиндан радикалроқ сиёсий раҳбариятига талабни оширади, Кремл эса бу талабни қондира олмайди", - дейди у.
Кўп йиллардан бери қувғинда бўлган сиёсатшунос Андрей Пионтковский ўзига хос услубда, қатъий баёнот берди.
"Даря Дугинанинг ўлдирилиши - Путиннинг куч ишлатар тизимлари томонидан Путинни етарлича принципли фашист-коррупционер эмасликда танқид қилиб турадиган ултрафашист партияси доҳийсига бўлган огоҳлантириш", - деб ёзди Пионтковский.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
