Исроил - Фаластин: Минглаб фаластинликни Исроил уй-жойидан қувмоқда - Видео Dunyo yangiliklar
Ғарбий Соҳил жанубидаги Масафир Ятта деб номланган жойда мингдан зиёд фаластинликнинг уйлари бузилмоқда, ота-боболари яшаб келган жойдан қувиб солинмоқдалар.
Шу йилнинг май ойида Исроил Олий Суди Масафир Яттада Исроил армиясининг ҳарбий тайёргарлик зонасини барпо этиш қонунга зид эмас, деган қарор чиқарди, бу ҳудудда истиқомат қилиб келган фаластинликларни кўчиришга буйруқ берилди.
БМТ экспертлари аҳолини оммавий қувиб солиш уруш жинояти деб кўрилишидан Исроилни огоҳлантирди.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Шунга қарамасдан, шу кеча-кундузда фаластинликларнинг уйлари бузилмоқда.
Одамларни яшаб турган жойларидан бадарға қилишга Исроил армияси ва полицияси жалб этилган.
Исроил "бу одамлар бу ерга берухсат уй қуришган" дейди.
Бироқ тўла Исроил назорати остида бўлиб келган ушбу Фаластин ерларида уй қуриш учун рухсатномага эга бўлиш имконсиз бўлиб келган.
Уйлари бузилган фаластинликларнинг қурилишда ишлатишлари мумкин бўлган мол-мулки ҳам мусодара қилинаяпти.
"Ана ўшанда қайта уй қуролмайдилар" деб ўйлашади Исроил расмийлари.
"Масафир Яттадаги бу йўқотиш ягона муаммо эмас. Яҳудий келгиндиларининг мавзелари ҳам кенгайтирилаяпти. Бу халқаро қонунларга зид, лекин Исроил бунга кўнмайди", дейди Би-би-сининг Яқин Шарқ бўйича мухбири Иоланда Нелл.
Масафир Ятталик чўпон Абу Муҳаммаднинг уй ва оғилини бузиш чоғи бунга қарши чиққан фаластинлик фаоллар билан Исроил ҳарбийлари ўртасида жанжал келиб чиқди.
"Келгиндилар келиб биз фаластинликларнинг ерларимизни тортиб олаяптилар. Чуқур қазиб, уйларини қуришаяпти. Давлат уларни дастаклайди, менинг еримда келгиндилар учун шароит яратаяпти. Лекин шу давлат ва шу ҳукумат мени еримдан ҳайдаяпти. Бизларнинг уйларимиз, мактаб ва қудуқ ва йўлларимизни бузиб ташлаяпти", дейди фаол Басил ал-Адраа.
Би-би-си мухбири "кўчмаймиз" деган оила вакиллари билан ҳам суҳбатлашган.
Улардан бири Нўъмон.
У қияликда бобоси қурган ғорда яшаб келган.
"Агар исроилликлар келса, бу қуёш батареяларини мусодақар қиладилар, дейди Нўъмон.
Улар Исроил чекловлари остида яшамоқдалар, эрта-индин кўзи ёришини кутаётган Суҳайр эса қўрқувда.
Сизнинг келажагингиз қандай бўлади?, деган саволга Суҳайр "Қанақа келажак?", деган савол билан жавоб қайтаради.
- Биз қўрқув остида яшаяпмиз. Келажак йўқ, ҳеч нарса йўқ, - дейди у.
Агар Исроилнинг оммавий кўчириши яна давом этса, бу охирги йиллардаги Ғарбий Соҳилдаги энг йирик кўчириш бўлади.
Халқаро ҳамжамият «бундай қилманг» деб огоҳлантираяпти.
Лекин бу ерда қолмоқчи бўлганлар учун бу огоҳлантиришнинг нафи кам, дейди мухбиримиз.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
