Энди Украина ғалласига денгиз йўли очиладими? Dunyo, Yangiliklar

Истамбулдаги музокаралар ортидан Украина донини денгиз орқали дунё бозорига олиб чиқиш бўйича келишувга эришилиши мумкинлиги хабар қилинди.

Музокара иштирокчилари мулоқот яхши натижага етаклаши мумкинлигини айтдилар.

Россия босқини бошланганидан буён Украина ўз ғалласини Қора денгиз орқали четга чиқаролмаяпти, фақат қўшни Европа мамлакатлари орқали қуруқликда дон ташиш имконли бўлиб турипти.

Жаҳон бозоридаги буғдойнинг 10 фоизи, кунгабоқар ёғининг эса қарийб 50 фоизи Украина улушига тўғри келади, Россия босқини дунё бўйлаб озиқ-овқат қимматчилигига етаклаган.

Украина 25 миллион тонна дон маҳсулотлари чириши мумкинлигидан огоҳлантирган.

Украина: 25 миллион тонна дон маҳсулоти чириши мумкин, Ўзбекистонга қандай таъсир қилади? - Видео

Украина урушдан олдин ҳар ой ўртача саккиз миллион тонна ғаллани экспорт қилиб келган, шундан беш миллион тоннаси Қора денгиздаги портлари орқали амалга оширилган.

Россия босқинини бошлаганидан кейин Украина денгиз пиёдалари ташланмаслиги учун қирғоқларини миналаб ташлади.

Украина Россия денгиздан бостириб келишининг олдини олишни истайди.

Россия бўлса ҳарбий кемалар ва миналар ёрдамида минтақани назорат қилишни хоҳлайди.

Натижада бу ерга ҳеч ким киролмайди ва чиқолмайди, Украина Қора денгизга чиқиш имкониятидан маҳрум бўлди.

Лекин Россия назоратида бўлган Илон оролини Украина ўз назоратига олганидан кейин Одесса порти томон кемалар ҳаракати қайта бошланди.

Бунгача бир ой ичида Украина атиги 2,5 миллион тонна донни экспорт қилолган.

Россия ҳужумлари оқибатида ғаллазорлар ёниб кетди, Россия кўплаб ғалла омборларини бомбалагани хабарлари тарқалди.

Шунингдек, Россия Украина донини ўғирлаб четга олиб чиқиб Россия дони деб кўрсатиб сотишга ҳаракат қилаётгани исботланди.

Россия Украинадан ўғирлаган ғаллани қаерга олиб бораяпти?

Истамбулда Украина, Россия, Туркия ва БМТ вакиллари Украина ғалласи учун денгиз йўлини очиш музокарасини ўтказдилар.

Туркия томони айтишича, Украина ва Россия Украина дони ортилган кемаларга хавфсиз йўл очишга розилик берганлар.

Яна тафсилоти муҳокама қилиниши лозимлиги, бу борадаги келишув кейинги ҳафтада имзоланиши мумкинлиги хабар қилинди.

БМТ Бош котиби Антониу Гутерриш Истамбул натижасини "муҳим ва салмоқли қадам" деб атади.

Украина Президент Володимир Зеленский музокарада "олдинги силжиш" бўлганини қайд этган.

Дипломатлар айтишича, музокарада дон ортилган кемаларга миналаштирилган порт сувларида Украина ҳарбий кемалари ҳамроҳлик қилиши муҳокама қилинган.

Россия, дон кемаси байроғи остида Украинага қурол-яроғ контрабанда қилинади, дея эътироз билдирган.

БМТ дастагидаги Туркия Украинага кираётган ва чиқаётган дон кемаларини текшириб ўтказишни ўз бўйнига олган.

19 июль куни Эронда Россия Президенти Владимир Путин Туркия Президенти Ражаб Тойиб Эрдўған ва Эрон раҳбарлари билан учрашуви режалангани хабар қилинган.

Бундан олдин жаноб Эрдўған Президент Путиндан Украина ғалласи учун Қора денгизни очишни сўраб телефон қилгани хабар қилинган.

Хабарларга кўра, Украина дони бўйича якуний келишув қарори Президент Путиннинг Эрон музокаралари охирида эълон этилиши кутилаяпти.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek