Британия Covid 19 га қарши иккинчи вакцинани тасдиқлади, аммо олимлар ижтимоий фалокатдан огоҳлантирмоқда
Сурат манбаси, PA Media
Британияда коронавирусга қарши Оксфорд университети ва AstraZeneca компанияси томонидан ишлаб чиқилган вакцина тасдиқланди. Ҳукумат 50 миллион одамни эмлаш учун 100 миллион дона вакцина буюртма берди. Шунга қарамасдан, олимлар мамлакатда карантин чоралари кучайтирилмаса қиш ойлари оғир кечиб, ижтимоий фалокат юз беришидан огоҳлантирмоқда.
Британия AstraZeneca ширкати чиқарган вакцинани тасдиқлаган дунёдаги илк давлат бўлди.
Вакцинани қўллаш янги йилдан, 4 январдан бошланади.
Ҳукумат Pfizer ва BioNTech вакциналарига берилган буюртмалар билан қўшиб ҳисоблаганда вакцина Британия аҳолиси учун етарли бўлишини айтмоқда.
Ҳукумат икки вакцинани иштирокида ҳар ҳафта 2 миллион одамни эмлашни режа қилган.
AstraZeneca вакцинаси 2020 йилнинг бошида ишлаб чиқилганди. Илк кўнгиллиларда синаш апрелда бошланди. Кейин синовларда минглаб одам иштирок этди.
70 даража совуқда сақланиши керак бўлган Pfizer ва BioNTech вакциналаридан фарқли равишда AstraZenecaни оддий музлатгичда сақлаш мумкин. Бу вакцинани етказиб беришни енгиллаштиради.
AstraZeneca бир ҳафтада 2 миллион дона вакцина ишлаб чиқариши мумкин.
Британияда оммавий эмлаш бошланганида бери 600 минг киши вакцина олди.
Британия Бош вазири Борис Жонсон вакцина яратилиши Британия илм-фанининг ғалабаси, деди.
Мамлакат Соғлиқни сақлаш вазири Мэтт Хэнкок Би-би-сига вакцинанинг тасдиқланиши вирус билан курашишда муҳим палла эканлигини айтди.
Сурат манбаси, PA Media
Олдинроқ бир сутка давомида мамлакат бўйлаб 53 минг кишида Ковид-19 аниқланди. Бу оммавий тест олиш бошланганидан сўнгги энг йирик кўрсатгич. Бир кеча-кундузда 414 киши коронавирусдан вафот этган.
Оммавий эмлаш бошланганига қарамасдан мутахассислар коронавирус тарқалишининг олдини олиш учун 2021 йилнинг илк ойларида карантин чоралари яна-да кучайтирилиши кераклигини таъкидламоқда.
"Январ ва феврал ойларида ижтимоий фалокатнинг олдини олиш учун бизга кескин, тез ва умуммиллий чоралар керак бўлади", дейди Британия ҳукуматининг илмий маслаҳатчиларидан бири, профессор Эндрю Хейворд.
Унинг айтишича, ҳозир Британия пандемиянинг ўта хавфли ва янги даврига киряпти.
"Вируснинг янада тез юқувчи янги тури пайдо бўлиши олдин самара берган чекловлар энди ишламаслигини англатади. Шунинг учун тўртинчи даражали ёки ундан ҳам юқори чекловлар киритиш керак", - дейди Хейворд.
Коронавируснинг янги тури кенг ёйила бошлаши ортидан Лондон ва Англиянинг жанубий ғарбидаги алоҳида минтақаларда карантиннинг тўртинчи даражаси жорий қилинган.
Одамларни уйда қолишга даъват қилишмоқда. Озиқ-овқат дўконларидан бошқаси ёпилган. Сартарошхона, спорт клублари ва ресторанлар фаолияти тўхтатилган.
Аммо ўқув юртлари ва уйга овқат етказиб беришга мўлжалланган тамаддихоналар ишлашда давом этмоқда. Ибодатхоналар ҳам очиқ.
