Тошкент ва кўкйўтал ваҳимаси: Одамлар кимга ишонсин - матбуотгами ё Соғлиқни сақлаш вазирлигига? Янгиликлар Yangiliklar

Санитария-эпидемиологик осойишталик ва жамоат саломатлиги қўмитаси раиси ўринбосари Нурмат Отабековга кўра, Ўзбекистонда кўкйўтал (коклюш) касаллиги бўйича эпидемиологик вазият барқарор.

Алоқадор мавзулар:

Соғлиқни сақлаш вазирлигининг Санитария-эпидемиология хизматини мувофиқлаштириш бўлими раҳбари Латофат Анварова ўз Фейсбук саҳифасида қуйидагиларни ёзди:

"24 сентябр куни СМИда шифокор Бахтиёр Бегматов томонидан Тошкент шаҳрида болалар ўртасида кўкйўтал касаллиги кўпайиб кетганлиги, 3-сонли инфекцион касалликлар шифохонасида бир кунда 20-30 нафар болалар ётказилаётганлиги бўйича хабар тарқатилганидан кейин вазиятни ўрганиш учун ушбу касалхонага Тошкент шаҳар СЭО ва ЖСБ бошлиғи М. Қудратходжаева шахсан бориб беморларни кўрганларида қабул китобида кунига 4-5 бемор болалар ётказилаётганлиги аниқланган. Тошкент шаҳрида кўкйўтал касаллиги бўйича эпидемиологик вазият барқарор вахимага ўрин йўқ."

Анварованинг баёнотида исми келтирилган Бахтиёр Бегматов Тошкент давлат стоматология институтидаги кафедра доценти, врач-инфекционист бўлиб, бир кун аввал uznews нашрига интервью берган ва Тошкентда кўкйўтал касаллиги авж олганлигини тасдиқлаган.

"Фожиа шундаки, одамлар кўкйўтал вакцинасига ишонмай қўйишди, кам эмланишяпти. Шунинг учун шаҳарда ҳозир кўкйўтал жуда кўп, ҳақиқий портлаш. Бир ярим ой олдин биз кўкйўтал бўлимимизни №3 юқумли касалликлар шифохонасига кўчиришга мажбур бўлдик. У ерда айнан кўкйўтал учун махсус бўлим очилди. Ҳозир бутун Тошкентдан касаллар ўша ерга олиб бориляпти", - деб айтган Бегматов нашрга.

Унинг айтишича, бу касаллик ўта юқумли бўлиб, бир бемор ўз йўтали билан юзлаб одамларга уни юқтириши мумкин. Шифокорга кўра, бу каби касалликлар яна тарқаляпти.

"Бизда расман кўкйўтал ҳам, қизамиқ ҳам йўқ. Чунки қоғозда ҳамма эмланади. Лекин, одамлар ўзлари рози бўлмаётгани учун, кўкйўтал ва қизамиқ яна авж оляпти. Одамлар рад этаман дея тилхат ёзиб беришяпти. Эмлаш ҳақиқатдан заҳарли, лекин боланинг у билан уч кун ҳарорати кўтарилади. Бундан бошқа болалар ҳам жабр кўриши керак эмас-ку? Яхшиси, бола уч ой оғир касал бўлгандан кўра, уч кун ҳарорати чиқсин. Кўплаб диндор одамлар ҳам эмланишни истамаяпти. Улар вакцина бегона қондан тайёрланади деб ишонишади. Бу - сафсата. Вакцинада ҳеч қандай қон йўқ", - деб айтган Бегматов.

Шунингдек, uznews нинг ССВдаги манбаси қуйидагиларни айтган:

"Ҳозир шаҳарда кўкйўтал билан оғриш ҳоллари ортяпти. Ҳар куни касалхонага 20-30 одам олиб келиняпти. Уларда жой етмай қоляпти, шунинг учун жанжал чиққан. Фақат уч ойгача бўлган болаларни қабул қилиб, қолганларни уйларига қайтаришяпти."

ССВ баёнотида, Нурмат Отабеков "ижтимоий тармоқларда мамлакатимизда кўкйўтал касаллиги авж олгани ҳақида хабарлар" тарқалганини тан олган. Аммо, унинг айтишича, жорий йилнинг ўтган даврида Ўзбекистон бўйича жами 2 миллионга яқин бола ушбу хасталикка қарши вакцина қабул қилган.

"Хусусан, январь-август ойлари давомида пента-1 билан эмланиши керак бўлган болаларнинг 97,6 фоизи, пента-2 билан 98,5 фоизи, пента-3 билан эса 98,5 фоизи эмланган. Бундан ташқари, 16 ойлик ўғил-қизларнинг 98,9 фоизи ревакцинация босқичида қайта эмланган. Айтиш жоизки, кўкйўтал мавсумий характерга эга бўлиб, куз-қиш даврида кўпроқ қайд этилиши мумкин ва аксарият ҳолларда эмланмаганлар (тиббий чеклов ва рад этиш), тўлиқ эмлаш курсини олмаганлар ҳамда баъзи ҳолларда эмлашдан кейин иммунитет шаклланмаган (сероманфий) болаларда кузатилади. Қисқа қилиб айтганда, эмланмаган ўғил-қизлар ўртасида касаллик тарқалиш хавфи сақланиб қолади. Шу боис кўкйўтал кам миқдорда бўлса-да, аҳоли ўртасида қайд этиб турилиши табиий ҳол. Чунки ушбу хасталикни фақат жамоавий иммунитет ҳосил қилиш орқали енгиш мумкин. Бунинг учун Миллий эмлаш календарига мувофиқ, ёш болалар эмланиши зарур», - дейилади Отабеков иқтибоси билан тарқатилган ССВ баёнотида.

ССВ маълумотига кўра, кўкйўтал — ҳаво-томчи йўли орқали юқадиган ўта юқумли хасталик бўлиб, қўзғатувчиси Bordetella pertussis бактерияси ҳисобланади. Унга чалинган беморларда ўткир респиратор вирусли инфекциялар аломатлари, шунингдек, кучли йўтал хуружлари ва қусиш кузатилади.

Telegram каналимиз: https://t.me/bbcuzbek

BBCUZBEK.COM билан Telegram орқали +44 7858860002 номери билан боғланинг.