Танг аҳволда қолган Россия меҳнат бозорига Ўзбекистонликларни жалб қилмоқчи, Россиядан кетаётган мигрантлар эса кўпайди Yangiliklar, Migrant

Россия сафарбарликка жалб қилинган фуқаролари сабаб бўшаб қолган иш ўринларига ўзбекистонлик мигрантларни жалб қилмоқчи. Мутахассислар сафарбарлик ортидан жиддий кадрлар етишмовчилиги кузатилаётганини айтмоқда. Россиядан кетаётган мигрантлар сони эса илк бор кўпайди.

Россия давлат статистикаси федерал хизмати чоп қилган ҳисоботга кўра, 2022 йил бошидан буён Россияни тарк этган мигрантлар сони келувчиларникидан илк маротаба кўпни ташкил қилган. Статистикига кўра Россиядан кетган мигрантлар сони 62 мингни ташкил қилган.

Kommersant.ru нашрининг ёзишича, Россия ҳукумати Ўзбекистон фуқароларини ишга жалб қилиш учун қарор қабул қилган.

Шу вақтгача қурилиш ва қишлоқ хўжалиги соҳасида ўзбекистонлик мигрантларнинг сони 11 мингдан ошмаслиги керак бўлган бўлса, энди ушбу чекловлар олиб ташланади. Ушбу соҳаларга Ўзбекистондан исталган миқдорда мигрант келиши мумкин бўлади.

Шунингдек, келмоқчи бўлганларга нисбатан қўйилган тиббий талаблар ҳам енгиллашади. Энди мигрантлар коронавирусгага тест топшириш ёки унга қарши вакцина олиш талаблари ўрнига Ўзбекистондаги Россия шифокорлари кўригидан ўтиши кифоя қилади. Ушбу ҳаражатларни мигрантлар эмас, балки иш берувчи тўлайди.

Kommersant.ru нашрининг ёзишича, бунинг учун Ўзбекистонга махсус россиялик тиббиёт ходимлари юборилади ва уларнинг ҳаражатини ҳам иш берувчилар қоплайди.

Путин Украинадаги урушга "қисман" сафарбарлик эълон қилгач Россиянинг Гайдар номли иқтисодий-сиёсий институтнинг айтишича, енгил саноат соҳасида рекорд даражада ишчи кучи етишмаслиги кузатилган.

Институт ҳисоботида айтилишича, умуман саноат соҳасида октябр ойида кадрлар етишмовчилиги минус 30 фоизни ташкил қилган бўлса, енгил саноатда у минус 70% ни ташкил қилган. Машинасозликдан 35 фоиз ишчи кучи етишмаган.

Бундан сал олдинроқ ҳам Россия миграция сиёсати концепсиясига ўзгартиришлар киритиб, меҳнат муҳожирларининг келишини янада қийинлаштириб қўйиши мумкинлигини муҳокама қилаётганди.

Унда патентнинг бекор қилиниши, ўрнига микрочипли 10 йиллик ҳужжат берилиши ва квота тизимининг тикланиши ҳақида сўз борган.

Миграция сиёсати концепциясига ўзгартиришлар 2022 йил охиригача киритилиши режаланганди.

Бу ҳақда Россия Федерацияси Хавфсизлик кенгаши котиби Николай Патрушев ноябр ойи бошида маълум қилганди.

"Хавфсизлик кенгашининг йиғилишида 2022 йил охиригача Россия Федерациясининг 2019-2025 йилларга мўлжалланган Давлат миграция сиёсатининг амалдаги концепциясига ўзгартиришлар киритиш, шунингдек, тузатилганларни амалга ошириш бўйича аниқ чора-тадбирлар режасини тайёрлаш тўғрисида қарор қабул қилинди, - деди Николай Патрушев.

Россия миграция сиёсатида бугунга қадар бир неча бор жиддий ўзгаришлар қилинган. Тизимнинг ўзи ҳам аввалига ИИВ таркибида, кейин Федерал миграция хизмати номидаги алоҳида ташкилот сифатида, кейин яна ИИВга киритилган тарзда фаолият юритаяпти.

Россияга оқиб келаётган миллионлаб мигрантлар учун аввалига квота асосидаги "Ишга рухсатнома" жорий этилган. Кейинчалик бу тизимдан воз кечилиб, "патент" жорий этилганди.

Эндиликда Россия Давлат миграция сиёсатининг амалдаги концепциясига киритиладиган ўзгартиришлар орасида яна квота тизимига қайтиш киритилган.

- "Аслида миграция қонунчилиги енгиллашиб бораяпти. Айниқса, Россия фуқаролигини олишга бўлган босқичлар (Россияда вақтинча қолиш, доимий яшаш ва Россия фуқаролигини олишга берилган енгилликлар каби) дастури эълон қилинди. Бу орқали ҳужжатлар расмийлаштириш йилдан йилга енгиллашиб бораяпти", - дейди ҳуқуқшунос Ботиржон Шермуҳаммад.

Россия ИИВга кўра, Муҳожирлар оқими кўпаймоқда

Сал олдинроқ Россия ИИВ жорий йилнинг январ-сентябрь ойлари учун хорижликларнинг миграция рўйхатидан ўтказилганлиги тўғрисидаги маълумотларни эълон қилди. Унга кўра, бу даврда Россияга жами 8,9 миллион муҳожирлар кириб келган. Хабарда мамлакатга кирувчилар ишлаш мақсадида келгани билдирилган.

Шунингдек, вазирлик бу борадаги сўнгги 5 йиллик статистик рақамларни келтиради ва 2017 йилнинг 9 ойига нисбатан 134 % лик ўсишни таъкидлайди.

Россияга ишлаш мақсадида келаётган давлатлар фуқаролари учлиги рўйхатида Ўзбекистон етакчи бўлиб турибди. Жорий йилнинг 9 ойи мобайнида Россияга 4,4 млн. ўзбекистонлик, яъни умумий келганларнинг 49% Ўзбекистондан келганларни ташкил этган.

Давлат статистика федерал хизмати билан ИИВ рақамлари нега қарама қарши?

Би-би-си мухбири Соҳиба Ҳаётга кўра, Россия ИИВ фақат Россияга кириб келувчиларнинг сонини қайд қилган. Ва у ўтган йиллар билан солиштирганда ростдан ҳам кўп.

Давлат статистика федерал хизмати эса, кириб келувчилар ва чиқиб кетаётганларни солиштирган, ушбу солиштириш натижасига кўра, илк бор чиқиб кетувчи мигрантлар сони кириб келувчиларникидан кўпроқни ташкил қилган.

Ўзбекистонликлар мигрантларнинг катта қисми Россияда қурилиш ва хизмат кўрсатиш соҳаларида меҳнат қилиб, ватанда қолган оилаларини боқишга мажбур.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek