Ўзбекистон: Порахўрга яна янги лавозим беришаяпти O'zbekiston korrupsiya
Сурат манбаси, courtesy
Ўзбекистонда коррупцияга қарши кураш аҳволи яна жамоатчилик эътиборига тушди.
Илгари порахўрлиги исботланиб, лавозимидан олинган ва жавобгарликка тортилган шахсни яна "мойли" ишга қўйиш коррупцияга қарши курашнинг "ўзбекча усули"га айланиб бораётгани кўпчилик норозилигига сабаб бўлмоқда.
Ўзбекистонда янги ташкил этилган Коррупцияга қарши курашиш агентлигининг директори Акмал Бурҳонов бу борадаги айрим рақамларни эълон қилди.
Бу фақат ҳуқуқ-тартибот органлари томонидан исботини топган рақамлар, холос.
Оммавий ахборот воситалари ва блоггерларнинг Акмал Бурҳоновга иқтибосан хабар қилишларича, охирги икки йилда жинояти исботланган 20 жиноятчи яна "мойли" ишга тайинланганлар.
Оммавий ахборот воситалари ва блоггерлар Ўзбекистон Коррупцияга қарши курашиш агентлигининг расмий веб-саҳифасидаги хабарга ҳавола берганлар, бироқ бу ҳавола негадир хато деган саҳифани очаяпти.
Коррупцияга қарши курашиш агентлигига кўра, жиноий жавобгарликка тортилган маҳаллий ҳокимликлар ходимларининг 20 нафари, жумладан, 7 нафар туман ҳокими ўринбосари ва 13 нафар бошқа ходимлар муқаддам шу тоифадаги жиноятларни содир этганлиги учун судланган шахслар ҳисобланади.
Жумладан, Ф.Атемов Қуйи Чирчиқ туман ободонлаштириш бошқармаси бошлиғи лавозимида ишлаб келиб, 118,4 млн сўм бюджет маблағларини талон-торож қилгани ва мансаб сохтакорлиги учун 2019 йил феврал ойида суд томонидан 2 йил-у 1 ой муддатга ахлоқ тузатиш ишлари жазосига ҳукм қилинган.
Шундай бўлса-да, Ф.Атемов 2019 йил сентябрь ойида Қуйи Чирчиқ туман ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари лавозимига тайинланган. Бироқ у мансабидан фойдаланиб, туман ўрмон хўжалигига қарашли ер майдонидан 17 нафар фуқарога деҳқон хўжалиги учун ажратилган томорқа ер участкаларига асоссиз равишда мулк ҳуқуқи тан олинишига йўл қўйганлиги учун жавобгарликка тортилган.
Бунга қўшимча Ўзбекистон Қонунчилик Палатаси депутати Расул Кушербаев қуйидагиларни ёзди:
"Ўзбекистонда 2021 йилнинг олти ойида 2544 нафар мансабдор шахс коррупция билан боғлиқ жиноятлари учун жавобгарликка тортилган. Давлат ва жамиятга етказилган зарар ҳозирча 592 млрд сўм.
Бу рекорд кўрсаткич!
Чунки, 2020 йил давомида 1723 нафар мансабдор шахс жавобгарликка тортилиб, давлат ва жамиятга етказилган зарар 500 млрд сўмни ташкил этган эди.
Бундан иккита хулоса келиб чиқади:
биринчиси, ўтган йиллар давомида ҳам коррурция ҳолатлари кўп бўлса-да, уни фош этиш кўрсаткичи кам бўлиб, яширишга ҳаракат қилинган;
иккинчиси, 2021 йилда мансабдорларнинг коррупцияга мойиллиги сони кескин ошган ва бу уларга коррупция билан шуғулланишга шароит яратиб қўйилаётгани билан боғлиқ бўлиши мумкин.
Маълумотлар Олий Мажлис Қонунчилик палатасидаги Коррупцияга қарши курашиш ва суд-ҳуқуқ масалалари қўмитасининг Коррупцияга қарши курашиш агентлиги директори ахборотини эшитишга бағишланган тадбирида эълон қилинган".
Депутат Кушербаев келтирган 592 миллиард сўмлик зарар шу кеча-кундузда қарийб 59 миллион АҚШ доллари деганидир.
Transparency International халқаро ташкилотининг 2020 йилги ҳисоботида Ўзбекистон 180 мамлакат орасида 26 балл билан 146-ўринни эгаллаган.
Солиштириш учун бу индексда 88 балл тўплаган Янги Зеландия 1-ўринда турипти, бу нарса мамлакатда коррупция қанчалар бартараф этилганини англатади.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
