Ўзбекистон: “Сардоба”ни қурганлар етган зарарни қоплайдими? – Янгиликлар, O‘zbekiston, Mirziyoyev, dunyo, yangiliklar

Ўзбекистон: "Сардоба"ни қурганлар етган зарарни қоплайдими? Рўйхатдан ўтган илк вакцина. Кимлар бепул эмланади? Ўзбекистонда чорак миллиондан ортиқ аёл ишсиз - bbcuzbek.com дайжести.

"Сардоба"

Сардоба сув омборига етган зарарни қоплаш мажбурияти "ТўпалангсувГEСқурилиш" МЧЖ ва "Ўзбекистон темир йўллари" гарданига юклатилган.

Бу ҳақда 1 март куни маҳаллий ОАВ вакилларига қурилиш вазири Ботир Зокиров маълум қилган.

Вазирнинг сўзларига кўра, зарарни қоплаш ишларига бюджетдан "бир сўм ҳам" ишлатилмаётир.

Зокиров сув омборининг жорий ҳолати ва фожиа сабабларини Москва давлат қурилиш университети мутахассислари ўрганиб келаётгани ҳақида гапирган.

У ўрганиш хизматлари эвазига россиялик мутахассисларга $124 минг тўланишини қўшимча қилган.

Қурилиш вазири мутахассислар март ойи охирига қадар якуний хулосани тақдим этишини билдирган.

Вазир сув омборини қайта қуришга оид лойиҳалар халқаро экспертизадан ўтказилганидан сўнг тендерга қўйилишини маълум қилган.

«Қайта қуриш жараёни қачон бошланиши ҳам аниқ эмас. Чунки дамбани қайта тиклаш анча вақт олади, буёғига шошилиб бўлмайди», деган вазир Зокиров.

Расмийларнинг маълум қилишича, ҳозирда сув омбор фаолиятини қисман тиклаш ишлари олиб борилмоқда.

900 миллион куб метр сув сақлаш имконига эга Сардоба сув омборининг тўғони ўтган йилнинг 1 май тонгида ёрилиб кетган эди.

Юзага келган тошқин Сирдарё вилоятининг уч ҳудудида ўн минглаб инсонлар ҳаётига зарар етказган.

Расмийлар тўрт нафар инсон ҳалок бўлгани, бир инсон бедарак кетганини хабар қилган.

Рўйхатдан ўтган илк вакцина

1 март куни Ўзбекистонда коронавирусга қарши илк вакцина давлат рўйхатидан ўтказилган.

Унга ZF-UZ-VAC 2001 номи берилган. Хитойники.

Бундан аввал ҳамкорликдаги ҳиссалари инобатга олиниб, Ўзбекистон Zhifei Longcom Biopharmaceutical Co. Ltd компанияси вакцинасининг ҳаммуаллифи, дея эътироф этилган эди.

Кимлар бепул эмланади?

4 миллиондан ортиқ Ўзбекистон аҳолиси коронавирусга қарши бепул эмланади.

Санитария-эпидемиология хизмати кимлар бепул эмланишига ойдинлик киритган.

65 ёшдан ўтган кексалар (1,6 миллиондан нафардан зиёд), тиббиёт ходимлари (447 минг нафар), сурункали касалликлари бор аҳоли (888 минг нафар), ўқитувчилар (689 минг нафар), мактабгача таълим ходимлари (223 минг нафар) ва ҳуқуқ-тартибот органлари ходимлари (180 минг нафар) рўйхатдан жой олган.

253 минг ишсиз аёл

Мамлакатда 17 миллиондан ошиқ аёл истиқомат қилади ва улардан 433 минг нафари "Аёллар дафтари"га киритилган.

Бу ҳақда Маҳалла ва оилани қўллаб-қувватлаш вазирлиги матбуот котиби Саодат Боймирзаева маълум қилган.

Масъул "Аёллар дафтари"га киритилган хотин-қизларнинг 253 минг нафари ишсиз, 90 мингдан зиёди эса тиббий ва ҳуқуқий-психологик ёрдамга муҳтож эканини тилга олган.

Ўрнатилган тартибга кўра, мазкур "дафтар"га ижтимоий ҳимояга муҳтож, ишсиз, боқувчисини йўқотган, эҳтиёжманд ва бошқа хотин-қизлар киритилади.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek