Ўзбекистон: “Сардоба” қайта қурилади, Спутник V’га рухсат ва ҳарбийларга янги имтиёз – янгиликлар, Мирзиёев, O‘zbekiston, Mirziyoyev, dunyo, yangiliklar

Ўзбекистон: "Сардоба" қайта қурилади, Спутник V'га рухсат берилди ва ҳарбийларга янги имтиёз - ўзбек ҳукуматининг ёпиқ қарори, президент одамларни ўйладими ва Ўзбекистон учун янги эътироф. bbcuzbek.com дайжести.

Ёпиқ қарор

Сардоба сув омборини қайта қуриш юзасидан ҳукуматнинг ёпиқ қарори қабул қилинган.

Бу ҳақда Қурилиш вазирлиги мулозими Насрулло Бобоев сўзларига асосланиб, Daryo.uz нашри хабар берган.

Бобоевнинг маълум қилишича, сув омборини тиклашга тайёргарлик ишлари бошлаб юборилган.

У тиклаш ишлари икки босқичда кечишини маълум қилган.

Бироқ масъул қурилиш муддатларини очиқлай олмаслигини билдирган.

Бобоев, ҳозирда, омборнинг сув босимига асл бардошлилик қобилияти илмий жиҳатдан ўрганилаётганини қўшимча қилган.

Нашр билан суҳбатда илмий ўрганиш ишлари чет эл илмий-тадқиқот марказлари жалб қилингани ҳам тилга олинган.

"Бунда бир нечта мустақил экспертлар гуруҳи қилинган ишлар натижаларини таҳлил қилади ва ўз хулосаларини беради. Шундан келиб чиқиб, кейинги босқич ишлари давом эттирилади", деган Бобоев.

Ўтган йилнинг май ойида юз берган фожиа ортидан қарийб 90 минг инсон ўз уйини ташлаб чиқишга мажбур бўлган, минглаб хонадонлар тошқиндан жиддий зарар кўрган эди.

Фожиадан икки ҳафта ўтиб, Сирдарёга навбатдаги сафари чоғида, президент Шавкат Мирзиёев авария сабабларини ўрганишга хорижлик экспертлар жалб этилишини таъкидлаганди.

Ўтган йилнинг 25 декабрь куни Олий суд "Сардоба иши" юзасидан жами 17 киши устидан ёпиқ суд жараёни бошланганини хабар қилган.

Спутник V'га рухсат берилди

Ўзбекистонда Россиянинг Спутник V вакцинасини оммавий қўллашга рухсат берилган.

Республика махсус комиссияси вакцинанинг учинчи босқич синовлари натижалари асосида шундай қарор олган.

Ҳозирда, Ўзбекистон ушбу вакцинадан 1 миллион доза харид қилиш ишларини бошлагани хабар қилинган.

Спутник V вакцинаси намуналари Ўзбекистонга илк бор ўтган йилнинг декабрь ойи бошида олиб келинган эди.

Ўтган ҳафтада эса Республика махсус комиссияси вакцинани сертификатлаштириш ва рўйхатдан ўтказиш таклифини маъқуллагани маълум бўлган эди.

Ҳудудий тамойил

Эндиликда, ўзбекистонлик ҳарбий хизматчилар ўз вилоятида хизмат қилиши мумкин.

Мудофаа вазирлиги кадрлар бош бошқармаси бошлиғи Шермуҳаммад Саидаҳматов билдиришича, президентнинг тегишли қарори билан ҳарбий хизматни ўташ тартиби тўғрисидаги низомга "ҳудудий тамойил" тушунчаси киритилган.

"Баъзи бир лавозим ва мутахассисликлар - у ошпаз бўладими, ҳайдовчи ёки тиббий хизматчи - ўз ҳудудида хизмат қилиш имкони яратилди", деган Саидаҳматов.

Шунингдек, у оилада ёлғиз ўғил бўлган ҳарбийларга ҳам ўз туғилиб ўсган ҳудудида хизмат қилиш ҳуқуқи берилганини қўшимча қилган.

Вакцина ҳаммуаллифи

Ўзбекистон коронавирусга қарши Хитой вакцинаси ҳаммуаллифи ўлароқ тан олинган.

Ўзбекистон 24 телеканалининг хабар беришича, мамлакат Хитойнинг ZF-2001 вакцинаси синовларида фаол иштирок этгани учун илмий жараёнларда тенг шерик сифатида эътироф этилган.

Вакцина Ўзбекистонда ZF-VakUz номи билан тарқатилиши маълум бўлган.

Ўтган йилнинг сўнггида Ўзбекистонда Хитой вакцинасини синаш ишлари бошланган эди.

16 февраль ҳолатига кўра, синовда иштирок этган ўзбекистонликларнинг умумий сони 14 мингдан зиёдни ташкил этган.

6,823 нафар кўнгилли вакцинанинг 1-дозаси, 2,556 нафари вакцинанинг 2-дозаси ва 6 нафар кўнгилли 3-доза билан эмланган.

Расмийлар аҳолининг маълум қатламларини вакцина билан эмлаш ишлари март ойининг биринчи ярмида бошланишини маълум қилганлар.

1,723 мансабдор

2020 йилда коррупциявий жиноят содир этган 1,723 нафар мансабдор жиноий жавобгарликка тортилган.

Бу ҳақда Бош прокуратура матбуот котиби Ҳаёт Шамсутдинов маълум қилган.

Бироқ у мансабдорлар тоифаси ва жиноят турлари кўламига ойдинлик киритмаган.

Шамсутдинов ўтган йилларда очилмай қолган 1 125 та жиноят фош этилди, қидирувда бўлган 2 446 нафар шахс ушланганини билдирган.

$3 миллионлик электромобиль

2020 йилда Ўзбекистонга қарийб $3 миллион қийматдаги 131 та электромобиль импорт қилинган.

Бу ҳақда Давлат статистика қўмитаси маълум этган.

Бу 2019 йилдаги рақамлардан уч баробардан кўпроқдир.

Ўзбекистон 2018 йилда хориждан атиги 13 та электромобиль импорт қилган бўлса, 2019 йилда бу рақам 39 тага етган эди.

Қўмита 2020 йилда электромобиллар, асосан, Хитой (92 та) ва Корея (13 та)дан олиб келинганини қўшимча қилган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek