Ўзбекистон: “Ёшлар ишсиз юрса, мен қандай кабинетда ўтираман” ва “Британча штамм” қандай аниқланди? — янгиликлар Мирзиёев, O‘zbekiston, Mirziyoyev, dunyo, yangiliklar

Президент матбуот хизмати давлат раҳбарининг ҳафталик фаолияти ҳақидаги "Махсус ракурс" кўрсатувининг навбатдаги сонини тақдим қилган.

Кўрсатувда 27 январь куни ўтган ёшлар бандлиги мавзусидаги селектор тафсилотларига урғу берилган.

Президент Мирзиёев ёшлар сиёсатига масъулларни қаттиқ танқидга тутган.

"Бечора болалар Тошкентда ишсиз юрса, мен кабинетда қандай тинч ўтираман? У менинг фарзандим. Нега у четда хор бўлиб юриши керак?" дея мансабдорларни саволга тутган президент.

Давлат раҳбари 18-30 ёшлар орасидаги ўзбекистонликларнинг 17 фоизи ёки 844 минг нафари ишсиз эканини билдирган.

У расман қайд этилмаган ишсиз инсонлар сони бунданда кўп эканини таъкидлаган.

Шунингдек, Мирзиёев ишсизликка доир статистика киритилмаган маълумотларни илк бор очиқлаган.

"Масалан, Фарғона вилоятида 18 ёшдан 30 ёшгача бўлган 703 минг фуқаронинг 81 минг нафари ишсиз сифатида рўйхатга олинган.

Қайта ҳисоб-китоблардан сўнг бу рақам яна 100 мингга кўпайган", дейилади кўрсатувда.

Ишсизлар ёшларнинг расмий сонидаги бундай ноаниқликлар бошқа ҳудудларда ҳам кузатилаётгани қўшимча қилинган.

Президент, бундан ташқари, 25 январь куни Тошкент шаҳридаги қурилишларни ҳам танқид остига олган.

"Мен Тошкентда 4-5 йил ишлаганман, оғайни. Бу ерда 120 мм.лик кичик канализация қўйганмиз. У ерда тўққиз қаватли уй қўйиб қўйибсан. Худо хайрингни берсин, канализацияни чиқарадиган насос қўйишимиз керакми?" дея савол билан юзланган у шаҳар ҳокими Жаҳонгир Ортиқхўжаев томон.

5 кунда аниқланган "британча штамм"

30 январ куни Соғлиқни сақлаш вазирлиги Ўзбекистонда илк бор коронавируснинг "британча штамми" аниқланганини хабар қилган эди.

Хабарда вируснинг янги кўриниши Дубайдаги саёҳатдан 23 январь куни қайтган тошкентлик 10 яшар қизалоқда аниқлангани билдирилган.

Ўз навбатида, ўзбекистонликлар нега бу ҳақда орадан бир ҳафта ўтиб хабар берилганидан таажжубга тушган.

Жамоатчиликка юзага келган мубҳамликка Инновацион ривожланиш вазирлиги ҳузуридаги Илғор технологиялар маркази директори ўринбосари Алишер Абдуллаев ойдинлик киритган.

Абдуллаевнинг сўзларига кўра, "британча штамм"ни генетик аниқлаш жараёнига 5 кун сарфланган.

"Шу кунгача марказимиз томонидан "Британия штамми" мавжудлиги эҳтимоли бўлган COVID-19 вируси аниқланган 33 нафар беморнинг бурун бўшлиғидан олинган суртмалар текширилди", билдирган у.

Профессор Абдуллаев янги штаммга хос мутацияларни аниқлаш бир неча мураккаб босқичдан иборат бўлишини маълум қилган.

"Шу ўринда биз битта эмас, балки ҳар бир мутация учун алоҳида таҳлиллар ўтказганимизни таъкидлаш жоиз. Бу синовлар илк бора амалга оширилаётгани учун хатога йўл қўймаслик ўта муҳимлигини эътиборга олиш лозим", деган у.

Бундан аввал Инновацион ривожланиш вазирлиги ўзбекистонлик олимлар томонидан "британча штамм"ни аниқловчи тест тизими яратилаётганини хабар қилган эди.

Вакцина синовлари қамрови кенгайтирилди

Коронавирусга қарши Хитой вакцинаси синовида иштирок этаётган кўнгиллилар сони 9 минг нафарга етказилади.

Инновацион ривожланиш вазирлиги айни вақтда вакцина синовларининг учинчи босқичи давом этаётганини маълум қилган.

Бунга қадар синовлар 5 минг кўнгиллини ўзига қамраб олган эди.

Расмийлар тадқиқот кўламининг кенгайтирилишига асосий сабаб қилиб, тадқиқот иштирокчилари сонининг иккинчи ва учинчи доза эмлаш босқичида камайиш эҳтимоли мавжудлиги билан изоҳлаганлар.

Шунингдек, вакцинанинг инсонга таъсири организмда вирус бўлган вақтда аниқланганидан, мамлакатда эпидемиологик вазият барқарорлашгани ҳам вакцина таъсирини ўрганиш ишларини қийинлаштираётгани қўшимча қилинган.

Вазирлик вакцина синовларида иштирок этаётган кўнгиллиларнинг ярми вакцина эмас, платсебо олаётганини ҳам эслатиб ўтган.

"Куймайдиган" пенсиялар

Вафот этган пенционернинг олинмай қолган пенсияси яқинларига тўлаб берилади.

Адлия вазирлигининг эслатишича, амалдаги қонунчиликка кўра, ота-онаси, эри (хотини), пенционер билан у вафот этган кунигача биргаликда яшаб турган оила аъзолари унинг пенсиясини олишлари мумкин бўладилар.

Яқинлар боқувчисини йўқотганлик пенсияси билан таъминланадиганлар доирасига кирмаганлари тақдирида ҳам пулни олиш ҳуқуқига эга бўладилар.

Пенционер вафот этган ой учун олинмай қолган пенсия пули кўрсатиб ўтилган оила аъзоларига ойнинг у вафот топгунга қадар ўтган кунлари учун тўланади.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek