Беларусь: Лукашенко яна панд едими? - Belarus, Lukashenko, Rossiya, yangiliklar
Сурат манбаси, Reuters
Беларусь: Лукашенко яна панд едими? - Биргина пойтахт Минскнинг ўзида яна ўн минглаб одам намойишга чиққан. Намойишлар кучли хавфсизлик чоралари манзарасида кечган. Кеча, якшанба куни яна юзлаб намойишчи ҳибсга олинган.
Оммавий намойишлар пойтахт Минскдан ташқари Беларуснинг яна қатор шаҳарларида бўлиб ўтган.
Намойишлар кучли хавфсизлик чоралари манзарасида кечган.
Президент саройи яқинидаги намойишчиларни тарқатиш учун милиция гармдорили газ қўллаган, дубинкаларини ишга солган.
Аммо буларнинг ҳеч бири одамларни ортга қайтара олмаган.
Кузатувчиларга кўра, якшанба, 6 сентябрь Беларусдаги сўнгги намойишчиларнинг қисқача тарихчасида энг муҳим кунга айланган.
Беларусдаги оммавий намойишлар 9 август кунги зиддиятли президент сайлови ортидан бошланиб кетган.
Унда кетма-кет олтинчи бор мамлакатнинг амалдаги президенти Александр Лукашенконинг ғолиб чиққани эълон қилинган.
Мухолифат ва намойишчилар бунга ишонмаяпти, уларга кўра, сайлов натижалари "сохталаштирилган" ва Лукашенко "кетиши керак".
Сурат манбаси, Reuters
Лукашенко улар билан музокарага бормоқчи эмас, оммавий намойишларни бостириш ҳаракатида, ўтган тўрт ҳафта ичида камида тўрт киши ўлган, юзлаб одамлар тан жароҳати олишган.
Қатор мухолифат етакчилари эса, Беларусни тарк этишган.
Қамоқ таҳдиди остида қолган Ольга Ковалькова уларнинг сўнггиси бўлган.
У шу шанба куни Польшага чиқиб кетган.
1994 йилдан буён қудратда қолаётган Александр Лукашенко Ғарбни Беларусь ишларига аралашаётганликда айблаган.
Намойишчилар, инсон ҳақлари фаоллари ва кузатувчиларга кўра, махсус милиция кучлари намойишларни шафқатсизларча бостиришга уринмоқда.
Вазиятга БМТнинг Беларусь бўйича махсус маърузачиси Анаис Марин ҳам эътибор қаратган.
Анаис Марин Александр Лукашенконинг президент этиб қайта сайланиши "тўлиқ манипуляция қилинган"и ва "одамларнинг овози ўғирланган"ини айтган.
У Беларусь полициясини қийноқ қўллашда айблаган, бунга "шунчалик ёмон калтакланганидан комага тушиб қолган 16 ёшли ўспирин"нинг ҳодисасини мисол қилиб келтирган.
БМТнинг Беларусь бўйича махсус маърузачиси, "Масъуллар ўзбошимчалик билан қўлга олинган барчани озод этишлари шарт" эканини таъкидлаган.
Унинг айтишича, "Ҳукумат ўз халқига қарши телбаларча уруш олиб бормоқда".
Сурат манбаси, NATALIA FEDOSENKO/TASS
Александр Лукашенконинг айтишича, сайловларда қаллоблик бўлмаган.
Аксинча, айрим Европа Иттифоқига аъзо давлатлар, айниқса, Польша ва Литва Беларусдаги тузумни ўзгартиришга уринишмоқда.
66 ёшли президент Беларусни ҳимоя қилишга ваъда ҳам берган.
Пайшанба куни эса, Александр Лукашенко Россия билан янада яқинлашиш эҳтимолини назардан соқит этмади.
Намойишлар ўзларини "тегишли хулосалар чиқаришга ундагани"ни айтди.
Беларусдаги оммавий намойишлар фонида Александр Лукашенко камида икки бор қўлида автомат билан кўриниш берди.
Беларусь Россия, Украина ва қатор Европа Иттифоқига аъзо давлатларга бевосита чегарадош мамлакат бўлади.
Айниқса, Россия билан тарихан яқин алоқаларга эга ва асосий энергия таъминоти ҳам Россияга боғлиқ.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
