Беларусь: Лукашенко музокарага бормайди - Belarus, Lukashenko, Rossiya

Беларусь: Лукашенко музокарага бормайди - пойтахт Минск яна бир йирик намойишга саҳна бўлган. Ўн минглаб одам кўчага чиққан. Якшанба кунги намойиш Лукашенконинг туғилган кунига тўғри келган. Лукашенко яна бир бор автоматда кўриниш берган.

Беларусь, уч ҳафтадирки, оммавий норозилик намойишлари ичида.

Намойишчилар 9 август кунги президент сайлови натижалари "сохталаштирилган"идан норози.

Сайловда бу гал ҳам амалдаги президент Александр Лукашенконинг кўпчилик овоз билан ғалаба қозонгани эълон қилинган.

Бу Лукашенконинг кетма-кет олтинчи президент сайловидаги "ғалабаси" бўлган.

Лукашенко четда Европанинг "сўнгги диктатори" сифатида ҳам баҳо топиб келади.

Ўзбекистон, аксарият минтақа давлатлари ва Россия унинг сайловдаги ғалабасини расман тан олишган, табриклашган.

Аммо Беларусь мухолифати бунга ишонмаяпти, мамлакатда намойишлар тинмаяпти, улар Лукашенко кетишини талаб қилишмоқда.

Беларусь мухолифати 13 ва 23 август кунлари мамлакат тарихида кузатилмаган норозилик намойишлари уюштиришга муваффақ бўлган.

Бу икки намойишда юз минглаб кишиларнинг кўчаларга чиққани хабар берилган.

Аммо, Би-би-си мухбири Стив Розенбергнинг хабар беришича, кеча, якшанба кунгиси аввалгиларидан анча фарқ қилган.

Кўча ва майдонларга катта сондаги милиция кучлари ташланган, кучли қўриқланган.

Милиция ва ҳарбийлар намойишларни тўхтатиш аҳдида қатъий экандек кўринган.

Минск марказидаги йирик майдонлар, Мустақиллик Саройи ва қатор метро станцияларига кириш ёпиб қўйилган.

Ҳуқуқ-тартибот ходимлари ва намойишчилар ўртасида тўқнашувлар кузатилган.

Хабарларга кўра, юздан ортиқ одам ҳибсга олинган.

Якшанба кунги намойишлар Александр Лукашенконинг туғилган кунига тўғри келган. У 66 ёшни қаршилаган.

Россиянинг "Новости" ахборот агентлиги сўнгги намойишлар чоғида унинг қерда экани билан қизиққан.

Бунга жавобан Лукашенко матбуот котиби агентликка унинг Мустақиллик Саройи сатҳида қўлида автомат билан юрган суратини юборган.

Намойишчилар ҳам унга ҳадя кўтариб келгандек кўринишган.

Пуфак, плакатлар билан бирга, картондан ясалган улкан суварак, "диктатура учун қабр", маҳбуслар ташилувчи ўйинчоқ машинагача кўтариб келишган.

Намойишлар пойтахт Минскдан ташқари Беларуснинг яна бир қанча шаҳрларида ҳам кузатилган.

Лукашенко ўтган ҳафта ҳуқуқ-тартибот идораларига Минскдаги намойишларни бостиришга буйруқ берган.

У кеча, якшанба куни намойишчиларга кўриниш бермаган, ўрнига ёрдамчиси Николай Латишенок чиққан.

Латишенок ҳукумат мухолифат билан музокараларга киришмаслиги, намойишлар ноқонуний экани ва сайловлар тоза ўтганини айтган.

Сўнгги жума куни президент Владимир Путин вазият издан чиқса, Россия Беларусга куч киритиши эҳтимолини назардан соқит этмаган.

Путиннинг айтишича, шахсан Лукашенко илтимоси билан Беларусга ташланажак кучлар аллақачон шай, тайёр қилиб қўйилган.

Беларусь мухолифатининг Мувофиқлаштириш кенгаши бу ғояга кескин қарши чиққан.

"Беларусда фойдаланиш учун Россия ёки бошқа бирор бир давлат ҳудудида қуролли гуруҳ тузиш мумкин эмас"лигини айтган.

Кенгаш ўз баёнотида "бу халқаро ҳуқуқ ва беларусь жамиятининг якдил, қатъий мавқеига зид" эканини айтган.

Нато Бош котиби Йенс Столтенберг пайшанба куни Россия ва дунёнинг қолган барча давлатларига мурожаат билан чиққан.

Уларни Беларусь ишларига аралашмасликка чақирган.

Кремль эса, аввалроқ Ғарбни худди шундай қилишга уринаётганликда айблаб чиққанди.

Россия президенти Беларусга ташланиши мумкин бўлган кучлар қай бир кучишлатар тизимлариники эканини очиқламаган.

Беларусь яна Россия шамсияси остидаги Коллектив Хавфсизлик Шартномасига аъзо давлат бўлади.

Коллектив Хавфсизлик Шартномаси ташкилоти жиддий низолар ичида қолган аъзо давлатга тинчликни сақлаш кучларини юбориш ҳуқуқига эга саналади.

Воқеаларнинг худди шу каби ривожи манзарасида Беларуснинг иккинчи Украинага айланишига оид хавотирлар ҳам кучайиб бормоқда.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek