Шавкат Мирзиёев Ғарб санкциясига тушган, Россия босқини тарафдори бўлмиш артистни тақдирлади
Сурат манбаси, president.uz
Икки давлат раҳбарлари Россияда ўтаётган “Ўзбекистон маданияти кунлари” арафасида санъаткорларга орден берди. Президент Мирзиёев тақдирлаган икки россиялик санъаткордан бири Сергей Безруков Украинадаги урушни қўллаб-қувватлагани учун Европа Иттифоқи ва Канада санкцияларига тушган.
“Ўзбекистон маданияти кунлари” очилишидан бир кун олдин 18 ноябрда Россия президенти Владимир Путин Ўзбекистон эстрадаси юлдузлари Фаррух Зокиров ҳамда Севара Назархонни “Россия ва Ўзбекистон маданиятларини яқинлаштириш ва ўзаро бойитиш борасидаги самарали фаолияти учун” “Дўстлик” ордени билан тақдирлаган.
Ўша куни Ўзбекистон президенти Шавкат Мирзиёев ўз фармони билан икки нафар россиялик артист — Москва драма театри бадиий раҳбари, театр ва кино актёри Сергей Безруков ҳамда балет раққосаси ва режиссёр Андрис Лиепани “Дўстлик” ордени билан мукофатлаган.
Фармонда ушбу артистлар “Ўзбекистон Республикаси ва Россия Федерацияси ўртасидаги кенг қамровли стратегик шериклик, иттифоқчилик муносабатларини ривожлантириш, халқларимизнинг анъанавий дўстлик ва ҳамжиҳатлик алоқаларини мустаҳкамлаш борасидаги катта хизматлари, ўзининг ёрқин ва бетакрор истеъдоди, хусусан, кино ва театр йўналишидаги сермаҳсул ижодий фаолияти билан маданият ва санъат соҳаларида ҳамкорликни кенгайтириш, маънавий қадриятларимизни асраб-авайлаш ва бойитишга қўшаётган муносиб ҳиссаси учун” тақдирлангани айтилган.
Sergey Bezrukov Rossiya propagandasini tarqatgan va Rossiyaning Ukrainaga agressiv urushini qo‘llab-quvvatlagan.
Театр ва кино актёри Сергей Безруков Россиянинг Украинага бостирб киришини фаол қўлловчи фаол сифатида танилган.
У Россия ҳарбийларини дастаклаш учун ташкил қилинадиган тадбирларда фаол иштирок этади. Аскарларнинг хизмати учун миннатдорчилик билдиради.
Берган интервюларида ва ижтимоий тармоқларда қилган чиқишларида Безруков бир неча маротаба ватанпарварлик ва уруш вақтида мамлакатдаги бирдамлик ҳақида гапирган. Россия фуқароларини ўз аскарларини қўллаб-қувватлашга ва уларнинг ютуқларидан фахрланишга чақирган.
Шунга қарамасдан у тинчлик ва барқарорликка эришиш муҳимлиги ҳақида ҳам гапирган. Можарони бартараф этишда дипломатик ҳаракатларнинг зарурлигини таъкидлаган.
Европа Иттифоқи 2022 йилнинг июл ойида Безруковни санкциядаги Россия фуқаролари сафига қўшди.
Иттифоқ қарорида айтилишича, “Ягона Россия” партиясининг бош оммавий шахсларидан бири бўлмиш Безруков “Россия пропагандасини тарқатган ва Россиянинг Украинага агрессив урушини қўллаб-қувватлаган”, шунингдек, урушда иштирок этаётган Россия ҳарбийларининг олдида чиқиш қилган.
Кейинчалик Канада ҳукумати “дезинформация тарқатишда” алоқадор бўлгани учун Сергей Безруковни санкциялар рўйхатига тиркаган.
Шавкат Мирзиёев нима учун ушбу баҳсли шахсни орденга лойиқ кўргани борасида расмий хабар йўқ.
Ўзбекистон Россиянинг Украинага бостириб кириши масаласида доим бетараф позицияда эканлиги айтилади.
Бироқ Россия Украинага бостириб кирганидан бир ой ҳам ўтмасдан 13 март куни Туркияда ўша вақтдаги Ўзбекистон Ташқи ишлар вазири Абдулазиз Комилов ўзига хос чиқиш қилди.
У Ўзбекистон Украинадаги вазиятдан хавотирда эканлигини ва зўравонликни тўхтатиш кераклиги ҳамда барча масалаларни сиёсий-дипломатик йўллар билан ечиш тарафдори эканлигини айтиб чиқди.
2022 йилнинг 17 март куни эса Олий Мажлис сенатида ҳисобот берган Абдулазиз Комилов Украинада уруш ҳаракатлари зудлик билан тўхтатиши кераклигини таъкидлаган.
“Ўзбекистон Украинанинг мустақиллиги, суверенитети ва ҳудудий яхлитлигини тан олади. Биз Луганск ва Донецк халқ республикаларини тан олмаймиз”, деганди Абдулазиз Комилов.
Ушбу чиқишидан бир ой ўтиб Абдулазиз Комилов ташқи ишлар вазири лавозимидан озод қилинди.
У президент ҳузуридаги Хавфсизлик кенгаши котибининг ташқи сиёсат ва хавфсизлик масалалари бўйича ўринбосари лавозимига тайинланганди.
Телеграм каналимиз:
