حسن مجتبی بی بی سی اردو ڈاٹ کام، نیویارک

	بینظیر بھٹو نے نیویارک میں پاکستان لیگ آف امریکہ کے اجلاس میں شرکت کی

بینظیر بھٹو نے وضاحت کی کہ فوجی حکمران جنرل پرویز مشرف اور ان کے درمیاں ان کی وطن واپسی اور وردی اتارنے کے مسئلے پر مفاہمت ہوئی ہے۔

وردی پر صدر سے خفیہ مفاہمت

نیویارک میں پاکستانیوں کی ایک تنظیم پاکستان یو ایس ليگ کی طرف سے پاکستان کے یوم آزادی کے جلسے سے خطاب کے بعد پی پی پی کی سربراہ بینظیر بھٹو سکیورٹی کے حصار میں کھانے کی میز پر صحافیوں کے ایک گروپ سے بات چیت کر رہی تھیں۔

بینظیر بھٹو نے کہا کہ جنرل پرویز مشرف سے مذاکرات کامیاب ہوں یا ناکام وہ ہر صورت ستمبر سے اکتوبر کے درمیان وطن واپس جانا چاہتی ہیں۔ ایک سوال کے جواب میں انہوں نے کہا کہ وہ چاہتی ہیں کہ اکتوبر میں عید سے قبل وہ وطن واپس ہوں۔

انہوں نے اپنے اس بیان کو دہرایا کہ ان کی پارٹی کسی بھی صورت میں باوردی صدر قبول نہیں کرے گي۔ انہوں نے کہا کہ سنہ دو ہزار دو میں بھی ان کے فوجی صدر پرویز مشرف سے مذاکرات ہوئے جس کے دوران انتخابات کے بعد حکومت کی تشکیل روک دی گئی تھی اور مذاکرات ناکام ہونے پر پیپلز پارٹی میں سے ایک دھڑا بنا کر حکومت قائم کی گئي تھی۔ انہوں نے کہا ان کے فوجی صدر پرویز مشرف سے مذاکرات ناکام ہوں یا کامیاب پاکستان میں جمہوریت اور ا نصاف کے نظام کیلیے ایک پر امن راستہ تلاش کیا جانا چاہیے۔

انہوں نے سندھی قوم پرست رہنما اور امریکی شہری ڈاکٹر صفدر سرکی سمیت پاکستان میں خفیہ ایجنسیوں کے ہاتھوں سیاسی لوگوں کی گمشدگیوں کی مذمت کرتے ہوئے کہا کہ اس سے قبل وہ لاطینی امریکہ میں ایسی گمشدگیوں کے بارے میں سنتی تھیں لیکن اب پاکستان میں بھی فوجی حکومت کے ہاتھوں شہریوں کوگرفتار کرکے گم کرنے کی خبریں آتی ہیں۔ انہوں نے کہا کہ پاکستانی نژاد امریکی شہری ڈاکٹر صفدر سرکی ایک سال سے زیادہ عرصے سے غائب ہیں اور ان کی بیوی اور بچے انتہائي پریشان ہیں۔

سنہ 2002 بھی مشرف سے مذاکرات  سنہ دو ہزار دو میں بھی فوجی صدر پرویز مشرف سے مذاکرات ہوئے جس کے دوران انتخابات کے بعد حکومت کی تشکیل روک دی گئی اور مذاکرات ناکام ہونے پر پیپلز پارٹی میں سے ایک دھڑا بنا کر حکومت قائم کی گئي تھی بینظیر

انہوں نے اپنے ایک پیشرو مقرر کی تقریر کا حوالہ دیتے ہوئے کہا کہ اس سے قبل جج دو اقسام کے فیصلے لکھتے تھے ایک حکومت کو خوش کرنے کے لیے اور دوسری صحیح ججمنٹ۔ انہوں نے ججمنٹ کی پہلی قسم کے طور پر اپنے خلاف انیس سو ننانوے میں دیے جانے والے فیصلے کا ذکر کرتے ہوئے کہا کہ ان کے خلاف یہ ججمنٹ سماعت کرنے والے جج نے نہیں بلکہ وزیر قانون نے لکھی تھی۔

انہوں نے امید ظاہر کی کہ پاکستان کی عدلیہ کی آزادی کا دور شروع ہوا ہے جس سے عام لوگوں، خواتین اور اقلیتوں کے ساتھ انصاف کیا جائے گا۔ بینظیر بھٹو پاکستان یوا یس لیگ کی جانب سے پاکستان کی یوم آزادی تقریب میں مہمان خصوصی تھیں۔

انہوں نے کہا کہ ان کی پارٹی نے عوام کے لیے انگریزی حروف تہجی کی چار ’ایز‘ پر مبنی منشور جاری کیا ہے۔ ایک: ایجوکیشن یا تعلیم، دو: انرجی یا توانائي، تین: انوائرونمنٹ یا ماحولیات اور چار: ایمپلائیمنٹ یا روزگار۔

انہوں نے کہا کہ پاکستان کے عوام کو امن، انصاف اور جمہوریت صرف جمہوری حکومت ہی مہیا کر سکتی ہے۔

انہوں نے کہا کہ جب جب پاکستان میں فوجی حکومتیں آئي ہیں تب تب ملک میں مذہبی جما‏عتوں نے دہشت اور انتہا پسندی کی فضا قائم کی ہے۔

انہوں نے کہا کہ انیس سو اکہتر میں یحیٰی خان کے دور حکومت میں الشمس اور البدر قائم کی گئي تھیں، جنرل ضیاء الحق کے دنوں ميں فرقہ واریت اور موجودہ مشرف حکومت میں خود کش بمبار پیدا ہوئے ہیں۔

چیف جسٹس کی بحالی امید کی کرن  پاکستان میں چیف جسٹس کی بحالی سے عوام میں امید کی ایک کرن ابھری ہے کہ صرف سیاسی مسئلوں پر ہی نہیں عام لوگوں سے بھی انصاف ہوگا بینظیر بھٹو

انہوں نے لال مسجد کا حوالہ دیتے ہوئے کہا کہ پانچ سال قبل تک لال مسجد تو اسلام آباد میں موجود تھی لیکن وہاں مدرسے کے نام پر اسلحہ اور خود کش بم بار چھپائے گئے۔ انہوں نے کہا کہ اس سے قبل غازی رشید اسلحہ سمیت گرفتار ہوئے تھے لیکن وفاقی وزیر مذہبی امور کی سفارش پر رہا کردیے گئے۔

انہوں کہا کہ اگر کسی شخص کو امریکی ہوم لینڈ سکیورٹی نیویارک میں اسلحہ سمیت گرفتار کرے تو اس کی سفارش کرنے والے کو بھی سازش میں شریک ہونے پرگرفتار کر لے گي لیکن پاکستان میں غازی رشید کی سفارش کرنے والے وزیر کو ان کے عہدے پر موجود رہنے دیا گيا۔

انہوں نے کہا کہ ہر اخبار میں یہ خبر شائع ہوئی ہے کہ نیٹو پر حملے کے لیے قبائلی علاقے خود کش بمباروں کیلے محفوظ جنت بن گئے ہیں۔ انہوں نے کہا کہ اس سے ملک ٹوٹنے کا خطرہ پیدا ہوگیا ہے۔

انہوں نے کہا کہ ہمارا ملک پہلے ہی ٹوٹ جانے سے دوچار ہوچکا ہے اس لیے ملک کو ٹوٹنے سے بچانے کیلیے جمہوری نظام او اس کی طرف پر امن پیش رفت انتہائي ضروری ہے۔ ملک اور خطے میں امن انصاف اور آزادی صرف جمہوری حکومت ہی لاسکتی ہے جس سے عام آدمی کے لیے انصاف پر مبنی معاشرہ قائم ہو گا۔