علی سلمان بی بی سی اردو ڈاٹ کام، لاہور

	پریس کانفرنس میں جاوید ہاشمی کے ساتھ لیاقت بلوچ اور ذوالفقار کھوسہ بھی موجود تھے

اتوار کو لاہور میں اخباری کانفرنس سے خطاب کرتے ہوئے انہوں نے صدر مشرف سے مستعفی ہونے کا مطالبہ کیا۔

مسلم لیگ کا ’باغی‘

فوجی اقتدار، ملک کی تباہی برقرار

رہائی کے بعد جاوید ہاشمی کا استقبال

جاوید ہاشمی گرفتاری سے رہائی تک

ان کا کہنا تھا کہ سیاسی جماعتیں انتخابات کے لیے امیدوارں کی نامزدگیوں کے لیے اپنے اجلاس بلا کر صدر مشرف کے ’الیکشن جال‘ میں نہ پھنسیں۔ انہوں نے کہا کہ وہ جلد ہی قوم کو خوشخبری سنانے کے قابل ہوجائیں گے کہ آئندہ انتخابات جنرل مشرف کے بغیر ہو رہے ہیں۔

پیپلز پارٹی کو سمجھائیں گے  ہم پیپلز پارٹی کو کھینچ کر اپنے ساتھ رکھنا چاہیں گے، کیونکہ یہ سولہ کروڑ عوام کےحق کی بات ہے۔ ہم منتیں بھی کریں گے اور انہیں سمجھائیں گے بھی جاوید ہاشمی

مخدوم جاوید ہاشمی نے کہا کہ وہ چاہتے ہیں کہ ملک میں انتخابات کی تیاریوں کی بجائے مشرف مخالف تحریک چلائی جائے، کیونکہ فردِ واحد کی مرضی کے تحت ہونیوالے انتخابات ملک کے لیے مزید مشکلات پیدا کرینگے۔

جاوید ہاشمی اتحاد برائے بحالی جمہوریت یعنی اے آر ڈی کے صدر بھی ہیں۔ مسلم لیگ (نواز) کے علاوہ پیپلز پارٹی بھی اس اتحاد کا حصہ ہے۔ تاہم بےنظیر بھٹو اور جنرل مشرف کے درمیان مبینہ ڈیل کی خبروں سے اتحاد غیر یقینی صورتحال کا شکار ہے۔

جاوید ہاشمی نے کہا کہ پیپلز پارٹی اگر ایسا کچھ کر رہی ہے تو انہیں اس پر افسوس ہے، تاہم انہوں نے اس عزم کا اظہار کیا کہ وہ اے آر ڈی ختم نہیں ہونے دیں گے۔

انہوں نے کہا ’ہم پیپلز پارٹی کو کھینچ کر اپنے ساتھ رکھنا چاہیں گے، کیونکہ یہ سولہ کروڑ عوام کےحق کی بات ہے۔ ہم منتیں بھی کریں گے اور انہیں سمجھائیں گے بھی۔‘ جاوید ہاشمی کا کہنا تھا کہ کل جماعتی جمہوری محاذ یعنی اے پی ڈی ایم انتخابی اتحاد نہیں ہے بلکہ یہ ’اتحادوں کا اتحاد‘ ہے۔

مشرف مخالف تحریک  ملک میں انتخابات کی تیاریوں کی بجائے مشرف مخالف تحریک چلائی جائے، کیونکہ فردِ واحد کی مرضی کے تحت ہونیوالے انتخابات ملک کے لیے مزید مشکلات پیدا کرینگے جاوید ہاشمی

اخباری کانفرنس میں جاوید ہاشمی کے ساتھ مجلس عمل پنجاب کے صدر لیاقت بلوچ اور مسلم لیگ (نواز) کے صوبائی صدر سردار ذالفقار علی کھوسہ بھی موجود تھے۔

پریس کانفرنس کے بعد جاوید ہاشمی ایک قافلے کے ساتھ اسلام آباد روانہ ہوئے جہاں وہ پیر کو قومی اسمبلی کے اجلاس میں شرکت کرینگے۔ قافلے میں شامل مسلم لیگی کارکن ’گو مشرف گو، وزیراعظم نواز شریف، ایک بہادر آدمی ہاشمی ہاشمی‘ کے نعرے لگا رہے تھے۔

بغاوت کے مقدمے میں پونے چار سال تک جیل میں رہنے کے بعد جاوید ہاشمی سنیچر کو لاہور کی کوٹ لکھپت جیل سے رہا ہوئے ہیں۔ رہائی کے بعد وہ ایک جلوس کی شکل میں داتا دربار اور علامہ اقبال کے مزار پر حاضری دینے گئے تھے۔