رفاقت علی بی بی سی اردو ڈاٹ کام، اسلام آباد

	جاوید ہاشمی کو فوج پر تنقید کرنے کے الزام میں سزا سنائی گی تھی

جاوید ہاشمی کو تین سال پہلے فوج پر تنقید کرنے کے الزام میں سزا سنائی گی تھی۔مخدوم جاوید ہاشمی کے وکیل نےعدالت کو بتایا کہ ان کے مؤکل کی زیادہ سے زیادہ سات سال سزا ہے اور جیل مینوئل میں دی گئی رعایتوں کی روشنی میں اب وہ رہائی کے مستحق ہیں۔

چیف جسٹس افتخار محمد چودھری نے کہا کہ ریکارڈ سے لگتا ہے کہ مخدوم جاوید ہاشمی اپنی سزا پوری کر چکے ہیں اور اگر حکومت ان کی جیل میں رکھنا چاہتی ہے تو عدالت کو بتائے کہ وہ کس بنا پر ان کو جیل میں رکھ سکتی ہے۔

مقدمے کی سماعت شروع ہوئی تو حکومت کی طرف سے ایڈوکیٹ آن ریکارڈ ارشد چودھری نے عدالت کو بتایا کہ نوٹیفکیشن کے مطابق اب عدالت میں چھٹیاں ہیں اور اس مقدمے کو ایک ماہ کے لیے ملتوی کر دیا جائے۔

مقدمے کی سماعت کو جمعہ تک ملتوی کرتے ہوئے عدالت کو حکم دیا کہ اگرحکومت جاوید ہاشمی کے مقدمے کی سماعت کو لمبے عرصے تک ملتوی کرانا چاہتی ہے تو اسے جاوید ہاشمی کے لیے کوئی متبادل انتظام کرنا پڑے گا کیونکہ وہ بادی النظر میں اپنی سزا پوری کر چکے ہیں۔

جاوید ہاشمی کو تین سال پہلے فوج پر تنقید کرنے کے الزام میں مجموعی طور پر انیس سال قید کی سزا سنائی گی تھی۔جاوید ہاشمی کی ایک جرم میں زیادہ سے زیادہ سات سال سزا ہے اور تمام سزائیں ایک ساتھ چل رہی ہیں۔

سرکاری وکیل نےعدالت کی توجہ سپرنٹنڈنٹ جیل کے اس خط کی طرف بھی دلائی جس میں انہوں نے کہا کہ جاوید ہاشمی کو غداری کے الزام میں سزا دی گئی ہے اس لیے ان کو جیل مینوئل میں دی گئی رعایتیں نہیں مل سکتیں اور ان کو سات سال تک جیل میں رہنا پڑے گا۔

مقدمے کی سماعت کے دوران جسٹس فقیر محمد کھوکھر نے کہا کہ درخواست گزار کی ایک یہ شکایت بھی ہے کہ لاہور ہائی کورٹ نے جاوید ہاشمی کی اپیل کی ایک بار بھی سماعت نہیں کی ۔

مقدمے کی اگلی سماعت تین اگست کو ہوگی۔ سپریم کورٹ کا تین رکنی بینچ چیف جسٹس افتخار محمد چودھری، جسٹس رانا بھگوان داس اور جسٹس فقیر محمد کھوکھر پر مشتمل تھا۔