انتخاب امیر بی بی سی اردو ڈاٹ کام، اسلام آباد

	مہمند ایجنسی میں مزار پر قبضہ کرنے والے ماسک پہنے ہوئے شدت پسند

صوبہ سرحد کے شمالی ضلع دیر زیریں کے گاؤں تالاش میں واقع مدرسہ ضیاء العلوم کے قاری احسان اللہ نے بی بی سی سے بات کرتے ہوۓ کہا کہ لال مسجد فوجی آپریشن کے بعد ان کے مدرسے میں پڑھنے والے طلب علموں کی تعداد اسی سے بڑھ کر ایک سو بیس ہوگئی ہے جس سے اندازہ ہوتا ہے کہ والدین کا مدرسوں میں اعتماد بڑھا ہے۔

جب ان سے پوچھا کہ اس اضافے کی وجہ آج کل سکولوں میں گرمیوں کی چھٹیاں تو نہیں ہیں تو انھوں نے بتایا کہ ان کے مدرسہ میں سہ پہر کے بعد کلاسیں لگتی ہیں۔

ضلع دیر ہی میں واقع مدرسہ احیاء العلوم کے سربراہ مولانا ہدایت اللہ کے مطابق لال مسجد آپریشن کی وجہ سے ان کے مدرسے کے طلباء کی تعداد پر کوئی فرق نہیں پڑا ۔ لیکن انہوں نے کہا کہ لال مسجد پر فوجی آپریشن کے بعد والدین اپنے بچوں اور بچیوں کو مدارس بھجوانے سے خائف ہیں کیونکہ اسلام آباد کے واقع نے والدین کے ذہنوں میں کئی شکوک و شبہات کو جنم دیا ہے۔

لیکن اسلام آباد کی جناح سپر مارکیٹ میں خریداری کرتی ہوئی کالج کی طالبہ مہوش کے خیال میں لال مسجد کے واقع کے بعد اب حکومت کو مدارس پر زیادہ توجہ دینی چاہیے اور ان پر گہری نظر رکھنے کی ضرورت ہے۔ انہوں نے کہا کہ مدارس کے بارے میں حکومت کو معلومات اکھٹی کرنی چاہیے کہ اگلے سال کتنے طلبا و طالبات نے مدارس میں داخلہ لیا اور مدارس میں پڑھائے جانے والے مضامین کا جائزہ لیا جانا چاہیے۔

صوبہ پنجاب سے تعلق رکھنے والے چوہدری بشارت کا کہنا تھا کہ مدارس میں پڑھنے والوں کو دہشت گرد بنایا جاتا ہے اور مدارس کی وجہ سے پہلے افغانستان کو تباہ کیا گیا تو اب یہ لوگ پاکستان کے پیچھے پڑ گئے ہیں۔ ان کی بات سے اختلاف کرتے ہوئے ان ہی کے دوست کا کہنا تھا کہ تمام مدارس کو دہشت گردی کے اڈے کہنا درست نہیں کیونکہ مدارس دینی تعلیم کے احیاء و ترویج کے حوالے سے گراں قدر خدمات سر انجام دے رہے ہیں۔

	لال مسجد میں طلبہ اور فوج کے درمیان خونریز لڑائی ہوئی تھی

مدارس کے بارے میں عوامی خدشات کو رد کرتے ہوۓ دینی حلقوں خصوصاٌ وفاق المدارس العربیہ کا کہنا ہے کہ لال مسجد اور جامعہ حفصہ کو طاقت کے استعمال سے خالی کرانے کی حکومتی حکمتِ عملی سے مدارس کے بارے میں منفی تاثر پھیلنے کی بجائے پاکستان کی بین الاقوامی سطح پر بدنامی ہوئی ہے ۔

وفاق المدارس العربیہ کے سیکریٹری جنرل حنیف جالندھری نے بی بی سی سے بات کرتے ہوئے کہا کہ صرف ایک مدرسے کی وجہ سے عوام اور حکومت کو بیس ہزار سے زائد مدرسوں کے بارے میں شک میں مبتلا نہیں ہونا چاہیے۔

لیکن جب ان کی توجہ اس طرف مبذول کرائی گئی کہ اگر مدرسے میں پڑھنے والی طالبات ہاتھوں میں ڈنڈے لیے بازاروں میں نکلیں گی اور ایک سرکاری مسجد کو خالی کرنے کے لیے حکومت کو فوجی آپریشن کا سہارا لینا پڑے گا تو اس سے ملکی اور بین الاقوامی سطح پر مدرسوں کے بارے میں کس طرح کا تاثر ابھرے گا تو وفاق المدارس العربیہ کے سیکریٹری جنرل مولانا حنیف جالندھری نے کہا کہ مدارس کے بارے میں تاثر متاثر نہیں پڑنا چاہیے کیونکہ لال مسجد آپریشن کے دوران ان کی تنظیم نے قانون کو اپنے ہاتھ میں لینے والوں کے مخالفت کی اور مسئلے کا پرامن حل تلاش کرنے کی کوشش کی۔

ان کا کہنا تھا کہ ان کے ادارے کی سربراہی میں چلنے والے تمام مدارس میں پر امن ماحول میں تعلیم دی جاتی ہے ۔ انھوں نے کہا کہ بچوں اور بچیوں کے والدین مطمئن ہیں اور کبھی کسی نے مدارس کے کردار کے بارے میں شکوک کا اظہار نہیں کیا۔