ہارون رشید بی بی سی، اردو ڈاٹ کام، اسلام آباد

	کچھ لوگوں نے مسجد کی دیواروں کو پھر سے سرخ رنگ کرنا شروع کر دیا تھا

مسجد کے گرد کسی بھی صورتحال سے نمٹنے کے لیے اسلام آباد پولیس کے علاوہ ایلیٹ فورس اور پنجاب پولیس کی اضافی نفری بھی تعینات کی گئی ہے۔

لال مسجد کھلتے ہی ہنگامہ آرائی

لال مسجد رنگ بدلا ڈھنگ وہی

تاہم مقامی انتظامیہ نے چوبیس روز بعد پہلی مرتبہ آبپارہ سے میلوڈی جانے والی سڑک کو عام ٹریفک کے لیئے کھول دیا ہے۔ سڑک کے کھلنے پر عوام نے سکھ کا سانس لیا ہے۔

اس اہم اور مصروف سڑک کی بندش سے عام لوگوں کے علاوہ پبلک ٹرانسپورٹ بھی متبادل راستہ استعمال کرنے پر مجبور تھی۔

مشتعل افراد کی جانب سے مسجد کو جمعہ کو کئے جانے والے سرخ رنگ کو بھی ایک مرتبہ پھر ہلکا پیلا رنگ دے دیا گیا ہے۔

پولیس نے جی سکس کے علاقے میں اضافی ناکے بھی ختم کر دیئے ہیں۔

حکومت نے جمعہ کے ہنگامے کے بعد مسجد کو تاحکم ثانی بند کرنے کا حکم جاری کر دیا تھا۔ مبصرین کے خیال میں جمعہ کے واقعات کے بعد اب شاید حکومت مسجد کافی طویل عرصے تک بند رکھے گی۔

ضلعی انتظامیہ کا کہنا ہے کہ وہ علماء اور علاقے کے لوگوں سے مذاکرات کرے گی جس کے بعد ہی مسجد کو دوبارہ کھولنے کے بارے میں کوئی فیصلہ کیا جائے گا۔

لال مسجد میں ہنگاموں کے دوران قریب ہی آبپارہ مارکیٹ میں ایک خودکش حملے میں چودہ افراد ہلاک جبکہ ساٹھ زخمی ہوئے تھے۔

وفاقی حکومت نے کل رات آبپارہ اور ایف ایٹ خودکش حملوں میں ہلاک ہونے والے افراد کے لیے ایک لاکھ جبکہ زخمیوں کے لیے پچاس ہزار روپے کے معاوضے کا اعلان کیا تھا۔

ادھر مسجد میں شدت پسندوں کے خلاف کارروائی کے دوران لاپتہ ہونے والے طلبہ کے والدین نے وزیر اعظم شوکت عزیز سے ملاقات کی جس میں وزیر اعظم نے انہیں اڈیالہ جیل میں اپنے پیاروں کی تلاش میں ہرممکن مدد کرنے کی یقین دہانی کرائی ہے۔