عبدالحئی کاکڑ بی بی سی اردو ڈاٹ کام، پشاور

	عمر خالد کا کہنا ہے کہ مقامی لوگ بلا خوف و خطر مسجد میں آکر نماز پڑھ سکتے ہیں

انہوں نے کہا کہ اس مقصد کے حصول کے لیے مسلح جدوجہد سے بھی گریز نہیں کیا جائے گا۔

مہمند ایجنسی: مزار پر لال مسجد کا بورڈ

کچھ مسلح افراد نے جن کے لیے ’مقامی طالبان‘ کی اصطلاح بھی استعمال کی جاتی ہے، اتوار کو مہمند ایجنسی کے غازی آباد کے علاقے میں جنگ آزادی کے ایک اہم رہنماء حاجی صاحب ترنگزئی کےمزار اور اس سے ملحقہ مسجد انتظام سنبھال لیا اور ایک بورڈ لگا دیا تھا جس پر لال مسجد لکھا ہوا تھا۔

عمر خالد نے مذکورہ مسجد سے بذریہ ٹیلی فون بی بی سی اردو ڈاٹ کام سے بات کرتے ہوئے کہا کہ انہوں نے لال مسجد کے آپریشن پر غمزدہ مسلمانوں کویہ اطمینان دلانے کے لیے مسجد پر قبضہ کر لیا ہے کہ لال مسجد سے شروع ہونے والے شرعی نظام کے نفاذ کامشن جاری رہے گا۔

ان کا کہنا تھا کہ انہوں نے فی الوقت شرعی نظام کے نفاذ کا اعلان نہیں کیا ہے البتہ وہ پاکستان میں شرعی نظام کا نفاذ چاہتے ہیں اور اسکے لیے چاہے انہیں جدوجہد کیوں نہ کرنی پڑے۔ان کامزید کہنا تھا کہ اگر حکومت نے انکا راستہ روکنے کی کوشش کی تو وہ پھر مسلح جدوجہد شروع کرنے کے لیے بھی تیار ہیں۔

	قبائلیوں کے ساتھ ویسے بھی اسلحہ ہوتا ہے لہذا اس سے ڈرنے کی کوئی ضرورت نہیں: عمر خالد

عمر خالد کا کہنا ہے کہ مقامی لوگ بلا خوف و خطر مسجد میں آکر نماز پڑھ سکتے ہیں لیکن جب ان سے پوچھا گیا کہ یہ کیسے ممکن ہے کہ لوگ مسلح افراد کی موجودگی یا بندوق کے سائے میں نماز پڑھیں تو انکا جواب تھا کہ ’قبائلیوں کے ساتھ ویسے بھی اسلحہ ہوتا ہے لہذا اس سے ڈرنے کی کوئی ضرورت نہیں ہے‘۔

انہوں نے کہا کہ ابھی تک ان کے خلاف کوئی حکومتی اقدام نہیں ہوا ہے اور نہ ہی حکومت نے ان کے ساتھ کوئی رابطہ قائم کیا ہے۔ ان کے بقول جلد ہی طالبات کے لیے درس و تدریس کا آعاز کر دیا جائے گا۔ اس سوال کہ جواب میں کہ کیا وہ مسجد سے اپنا قبضہ ختم کرنے کا کوئی ارادہ ارادے رکھتے ہیں تو طالب کمانڈر کا کہنا تھا کہ ’نہیں کبھی نہیں ہم مرتے دم تک مسجد سے اپنا قبضہ ختم نہیں کریں گے‘۔