دلاور خان وزیر بی بی سی اردو ڈاٹ کام، ڈیرہ اسماعیل خان

	اطلاعات کے مطابق بمباری کے بعد علاقے میں خوف و ہراس پھیل گیا (فائل فوٹو)

جنوبی وزیرستان میں پولیٹیکل انتظامیہ کے ذرائع نے بی بی سی کو بتایا کہ امریکی جہازوں نے وانا سے کوئی پینتیس کلومیٹر دور مغرب کی جانب تور ژاور میں ایک آبادی پر بمباری کی ہے جس کے نتیجہ میں بیس افراد ہلاک ہوگئے ہیں۔

اتحادی بوکھلا گئے ہیں: حاجی عمر

ہلاک ہونے والوں کا تعلق احمد زئی وزیر قبائل کے ذیلی قبیلے گنگی خیل سے ہے۔

انتظامیہ کے ذرائع نے بتایا ہے کہ یہ علاقہ افغان سرحد کے اوپر واقع ہے جہاں آبادی سرحد کے آرپار چلی گئی ہے اور اس علاقے سے چند کلومیٹر دور افغانستان میں اتحادی فوج نے طالبان کے خلاف ایک بڑا آپریشن شروع کیا ہے۔

دوسری طرف سنیچر کے روز ہی قبائلی علاقے شمالی وزیرستان کے علاقے شوال کے گاؤں مانڑہ میں سرحد پار سے ہونے والے ایک حملے میں کم از کم بارہ افراد ہلاک ہو گئے تھے۔

شوال کے علاقے میں پاکستان نامی ہوٹل پر تین بجے کے قریب گن شپ ہیلی کاپٹروں سے بمباری کی گئی جس کے نتیجہ میں بارہ افراد ہلاک ہوگئے۔ ہلاک ہونے والوں میں نو کا تعلق احمد زئی وزیر قبائل سے ہیں اور تین کا تعلق اتمان زئی وزیر قبائلی سے ہیں عینی شاہد محمداللہ سیدگی

پاکستانی فوج کے ترجمان میجر جنرل وحید ارشد نے بی بی سی کو بتایا کہ پاکستان نے افغانستان میں اتحادی افواج سے سخت احتجاج کرتے ہوئے اس حملے کے متعلق وضاحت طلب کی ہے۔

انہوں نے کہا کہ جمعہ اور سنیچر کی درمیانی شب کو افغانستان کے صوبہ پکتیکا میں اتحادی افوج اور مبینہ شر پسندوں کے درمیان ہونے والی چھڑپوں کے دوران کچھ راکٹ پاکستان کے قبائلی علاقے شوال کے مانڑہ میں واقع بعض گھروں پر بھی گرے۔

انہوں نے کہا کہ اتحادی افواج نے پاکستانی حدود کی خلاف ورزی نہیں کی ہے اور نہ ہی یہ میزائل حملہ تھا۔

پاکستان نے افغانستان میں اتحادی افواج سے سخت احتجاج کرتے ہوئے شوال میں حملے کے متعلق وضاحت طلب کی ہے ترجمان پاک فوج

شوال سے میرانشاہ پہنچنے والے ایک عینی شاہد محمداللہ سیدگی نے بی بی سی کو بتایا کہ کہ ہوٹل پر تین بجے کے قریب گن شپ ہیلی کاپٹروں سے بمباری کی گئی جس کے نتیجہ میں بارہ افراد ہلاک ہوگئے۔ ہلاک ہونے والوں میں نو کا تعلق احمد زئی وزیر قبائل سے ہیں اور تین کا تعلق اتمان زئی وزیر قبائلی سے ہیں۔

انہوں نے بتایا کہ بمباری میں تین گاڑیاں بھی مکمل طور پر تباہ ہوگئیں۔

ان کا کہنا تھا کہ ہوٹل مکمل طور زمین بوس ہوگیا۔ مقامی افراد نے ملبہ ہٹا کر
لاشوں کو باہر نکالا۔

اس واقعہ کے بعد علاقے میں ایک بار پھر سخت خوف و ہراس پھیل گیا ہے اور کہا جا رہا ہے کہ امن معاہدہ ٹوٹنے والا ہے۔