 | | | | | | | |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
جسٹس قافلے کا بھرپور استقبال | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
چیف جسٹس آف پاکستان جسٹس افتخار محمد چودھری وکلاء کی ایک تقریب سے خطاب کے لیے صوبہ سرحد کے شہر ابیٹ آباد کی طرف روانہ ہیں اور راستے میں جگہ جگہ ان کا استقبال کیا جا رہا ہے۔ جسٹس افتخار ابیٹ آباد روانگی کے لیے صبح نو بجے اسلام آباد میں واقع اپنی سرکاری رہائش گاہ سے نکلے تو سینکڑوں وکلاء نے ان کا استقبال کیا اور حسب معمول ان پر پھولوں کی پتیاں نچھاور کیں۔ وفاقی دارالحکومت کی انتظامیہ نے اگرچہ دفعہ 144 کے تحت پانچ یا اس سے زائد افراد کے اکٹھے ہونے پر پابندی لگا رکھی تھی لیکن جسٹس افتخار کا قافلہ بغیر کسی رکاوٹ کے اسلام آباد کی سڑکوں سے ہوتا ہوا جی ٹی روڈ (جرنیلی سڑک) پر پہنچا۔ ہمارے نامہ نگار رفاقت علی نے، جو جسٹس افتخار کے قافلے کے ساتھ سفر کر رہے ہیں، اطلاع دی ہے کہ اسلام آباد سے ہری پور کا سفر جو عام حالات میں دو گھنٹے میں طے ہوجاتا ہے وہ سات گھنٹے میں مکمل ہوا ہے۔ راستے میں آنے والے دیہاتوں، قصبوں اور شہروں میں سیاسی کارکنوں اور عام شہریوں نے استقبال کیا۔
ہری پور پہنچنے پر جسٹس افتخار کے وکلاء اعتزاز احسن، علی احمد کرد، حامد خان اور قاضی محمد انور نے وکلاء اور عوام کے ایک بڑے اجتماع سے خطاب کیا۔ اعتزاز احسن نے اپنے خطاب میں کہا کہ کور کمانڈروں کی یہ خام خیالی ہے کہ وہ جنرل مشرف کو بچا لینگے۔ ’اب انہیں ہر دوسرے روز میٹنگ کرنا پڑے گی‘۔ انہوں نے کہا کہ عوام اب سڑکوں پر نکل آئے ہیں اور وہ سمجھتے ہیں کہ انہیں انصاف فراہم کرنے کی کوشش کرنے والے کو اس کے منصب سے ہٹانے کی کوشش کی گئی ہے۔ ان کا کہنا تھا کہ اب کوئی طاقت عوام کا راستہ نہیں روک سکتی۔ چیف جسٹس کے وکیل نے کہا کہ حکومت عدلیہ کے کچھ لوگوں کو وکلاء کے خلاف استعمال کرنے کا ارادہ رکھتی ہے اور اس سلسلے میں حامد خان اور علی احمد کرد کے خلاف کارروائی کا امکان ہے۔ انہوں نے اعلان کیا کہ اگر ایسا ہوتا ہے تو سب وکلاء ان کے بیانات کی تائید میں بیان حلفی داخل کرائینگے۔ اس سے قبل ٹیکسلا میں وکلاء نے جی ٹی روڈ کے ساتھ ہی تقریب کا انتظام کر رکھا تھا، جس سے جسٹس افتخار کے وکلاء علی احمد کرد اور بیرسٹر اعتزاز احسن نے خطاب کیا۔
علی احمد کرد نے اپنی جذباتی تقریر میں کہا: ’جنگ کا مزا اب آئے گا، ایک طرف عوام اور دوسری طرف مشرف اور ان کے چند وفادار کور کمانڈر ہیں‘۔ اعتزاز احسن نے کہا کہ علی احمد کرد کی تقریر عوام کی آواز ہے۔ اس موقع پر وکلاء اور سیاسی کارکنوں نے زبردست نعرے بازی کی۔ سرفہرست نعروں میں تھے زندہ ہیں وکیل زندہ ہیں، کھال اتارو ملک سنوارو اور چیف تیرے جا نثار بے شمار۔ پاکستان کے سرکاری خبر رساں ادارے اے پی پی نے اسلام آباد کے ڈپٹی کمشنر محمد علی کے ایک بیان کا حوالہ دیتے ہوئے کہا تھا کہ دفعہ 144 کے نفاذ کی صورت میں کسی بھی قسم کا اجتماع کرنے والوں کو انتظامیہ سے پیشگی اجازت لینا ہوتی ہے لیکن جسٹس افتخار کے حامیوں کی جانب سے ایسی کوئی اجازت طلب نہیں کی گئی۔ تاہم جسٹس افتخار کے وکیل اعتزاز احسن کا مؤقف تھا کہ ایسی کسی اجازت طلب کرنے کی کوئی ضرورت نہیں ہے۔ | 
اسی بارے میں  جسٹس افتخار ایبٹ آباد پہنچ رہے ہیں02 June, 2007 | پاکستان سیمینار، سماعت فل بینچ کرےگا31 May, 2007 | پاکستان ’بندوق بردار کو کیسے ہٹایا جائے‘30 May, 2007 | پاکستان ’خفیہ اداروں کے سربراہ دباؤ ڈالتے رہے‘29 May, 2007 | پاکستان وکلاء کی جدوجہد، عوام بھی شامل26 May, 2007 | پاکستان | ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
| |||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
کور کمانڈروں کی یہ خام خیالی ہے کہ وہ جنرل مشرف کو بچا لینگے، اب انہیں ہر دوسرے روز میٹنگ کرنا پڑے گی
