علی سلمان بی بی اردو ڈاٹ کام، لاہور

	’سولہ سو چون شکایات کیں لیکن چند پر معمولی کارروائی کے سوا الیکشن کمیشن نے کچھ نہیں کیا۔‘

میاں نواز شریف نے اس موقع پر پری پول رگنگ یعنی قبل از انتخابات دھاندلی کے حوالے سے پریس میں ایک حقائق نامہ جاری کیا۔ یہ حقائق نامہ ایک سو سترہ صفحات پر مشتمل ہے اور اس میں مسلم لیگ نون نے دستاویزی ثبوت بھی دئیے ہیں جو ان کے بقول الیکشن کمیشن کو بھی فراہم کردئیےگئے ہیں۔

انہوں نے کہا کہ الیکشن کمیشن جانبدار ہے اور اس نے شواہد ملنے کے باوجود اپنی آنکھیں بند کررکھی ہیں اس لیے وہ کہہ سکتے ہیں کہ اٹھارہ فروری کے انتخابات منصفانہ اور شفاف نہیں ہونگے۔

ان کا کہنا تھا کہ الیکشن کمیشن کو اب تک ان کے امیدواروں نے سولہ سو چون شکایات کی ہیں لیکن چند پر معمولی کارروائی کے سوا اس نے کچھ نہیں کیا۔

نواز شریف نے کہا کہ الیکشن کمیشن میں نہ تو دھاندلی روکنے کی صلاحیت ہے اور نہ وہ اسے روکنے پر آمادہ ہے۔’الیکشن کمیشن حال ہی میں حکمرانی سے سبکدوش ہونے والی مسلم لیگ قاف کی تابعدار ہے۔‘

سابق وزیر اعظم نے کہا کہ وہ اس یقین کے ساتھ انتخابات میں جا رہے ہیں کہ عوام دھاندلی کے منصوبے ناکام بنائیں گے۔ انہوں نے واضح کیا کہ وہ ہرصورت انتخابات میں حصہ لیں گے تاہم ان کا کہنا تھا کہ اگر دھاندلی کی گئی تو اس کے تباہ کن نتائج سامنے آئیں گے۔

الیکشن کمیشن میں نہ تو دھاندلی روکنے کی صلاحیت ہے اور نہ وہ اسے روکنے پر آمادہ ہے۔الیکشن کمیشن حال ہی میں حکمرانی سے سبکدوش ہونے والی مسلم لیگ قاف کی تابعدار ہے۔ میاں نواز شریف

انہوں نے مزید کہا کہ انتخابات کے بعد وہ ہر اس پارٹی سے اتحاد بنانے کو تیارہونگے جس کا اولین کام عدلیہ کی دو نومبر والی پوزیشن پر بحالی ہوگا۔

میاں نواز شریف نے کہا کہ انہوں نے انتخابات سے قبل دھاندلی کے ثبوت بین الاقوامی اداروں اور مبصرین کو بھجوا دئیے ہیں اور ان سے رابطے کرکے بھی انہیں صورتحال سے آگاہ کیا جارہا ہے۔

نواز شریف نے پاکستان میں شفاف انتخابات کے لیے یورپی یونین کی کوششوں کو سراہا اور کہا کہ مبصرین صحیح سمت میں کام کررہے ہیں اور حکومتی پابندیوں کے باوجود حقائق تلاش کرنے کی کوشش کررہے ہیں۔

ایوانِ صدر سے  ایوان صدر سے یہ ہدایات جاری ہوئی ہیں کہ دھاندلی کے پلان پر سختی سے عملدرآمد کیا جائے۔ ضلعی پولیس افسروں اور انتظامیہ کو ہدایات دی گئی ہیں کہ وہ دھاندلی کریں اور کسی کی پرواہ نہ کریں۔ میاں شہباز شریف

مسلم لیگ نون کے صدر شہباز شریف نے کہا کہ اٹھارہ فروری کو عوام کنگز پارٹی کا سیاسی جنازہ نکال دیں گے۔ انہوں نے کہا کہ تازہ ترین اطلاع یہ ہے کہ ایوان صدر سے یہ ہدایات جاری ہوئی ہیں کہ دھاندلی کے پلان پر سختی سے عملدرآمد کیا جائے۔ انہوں نے کہا کہ ضلعی پولیس افسروں اور انتظامیہ کو ہدایات دی گئی ہیں کہ وہ دھاندلی کریں اور کسی کی پرواہ نہ کریں۔

شہباز شریف نے کہا کہ وہ پولیس اور دیگر انتظامیہ کو متنبہ کرتے ہیں کہ وہ دھاندلی کےمکروہ منصوبے پر عمل پیرا ہونے کی غیر آئینی کوشش نہ کریں ورنہ انیس فروری کو سورج طلوع ہوگا تو انہیں عوام کے کٹہرے میں کھڑا کیا جائے گا اور ایسی سزا دی جائے گی جس کی مثال نہیں ملتی۔

مسلم لیگی رہنما اسحاق ڈار نے پری پول رگنگ کے بارہ طریقوں کے بارے میں میڈیا کو آگاہ کیا اور کہا کہ قاف لیگ کی سبکدوش اور عبوری حکومتیں کھلی دھاندلی کے ماسٹر پلان کر انتہائی ڈھٹائی سے عمل پیرا ہیں۔