عزیزاللہ خان بی بی سی اردو ڈاٹ کام، کوئٹہ

	بلوچستان میں سوئی گیس کی تنصیبات پر وقفے وقفے سے حملے جاری رہتے ہیں

کوئٹہ کے پولیس افسر محمد اکبر نے بتایا ہے کہ فوٹوگرافر ڈاکٹر چشتتی مجاہد ہسپتال جانے کے لیے گھر سے نکلے تھے اور گاڑی میں بیٹھ رہے تھے کہ اچانک پہلے سے گھات لگائے بیٹھے ایک شخص نے ان پر دو فائر کیے۔ پولیس کے مطابق انہیں ایک گولی سر میں اور ایک سینے پر لگی ہے۔

ڈاکٹر چشتتی مجاہد کوئٹہ کے علاقے سیٹلائیٹ ٹاؤن میں رہائش پذیر تھے اور ہیپلر ہسپتال میں کام کرنے کے علاوہ ہفت روزہ اخبار جہاں میں بلوچستان کی سیاسی ڈائری اور چلتن کارنر کے نام سے غیر سیاسی موضوعات پر کالم لکھا کرتے تھے۔ اس کے علاوہ وہ گورنر ہاؤس میں مختلف شخصیات کے دوروں کی فوٹو گرافی بھی کیا کرتے تھے۔

ادھر آواران سے پولیس نے بتایا ہے کہ کل رات نامعلوم افراد نے انتخابی کمیشن کے دفتر اور ٹیلیفون ایکسچینج کے قریب تین راکٹ داغے ہیں ۔ اس حملے میں الیکشن کمیشن کے کمپیوٹر اور دیگر سامان تباہ ہوگیا اور عمارت کی چھت گر گئی۔

ڈیرہ بگٹی سے آمدہ اطلاعات کے مطابق نامعلوم افراد نے دو بڑی گیس پائپ لائنوں کو دھماکوں سے اڑا دیا ہے۔ ان میں ایک بیس انچ قطر کی پائپ لائن ہے جو پیر کوہ سے سوئی جاتی ہے اور دوسری اٹھارہ انچ قطر کی پائپ لائن سوئی سے کراچی کے لیے گیس کی ترسیل کرتی ہے۔

خود کو کالعدم تنظیم بلوچ ریپبلکن آرمی کا ترجمان ظاہر کرنے والے سرباز بلوچ نامی شخص نے گیس پائپ لائنوں پر حملوں کی ذمہ داری اپنی تنظیم کی جانب سے قبول کی ہے۔