عزیزاللہ خان بی بی سی اردو ڈاٹ کام، کوئٹہ

	کالعدم تنظیم بلوچ ریپبلکن آرمی نے دھماکے کی ذمہ داری قبول کی ہے

ڈیرہ بگٹی کے تحصیل سوئی سے پولیس اہلکاروں نے بتایا ہے کہ پیر کوہ کے مقام پر بارودی سرنگ کے ایک دھماکے میں ایک شخص ہلاک اور ایک زخمی ہوا ہے۔ دونوں افراد موٹر سائیکل پر سوار تھے اور پولیس کے مطابق ڈیرہ بگٹی میں کھیتی باڑی کرتے تھے۔

دریں اثناء اپنے آپ کو کالعدم تنظیم بلوچ ریپبلکن آرمی کا ترجمان ظاہر کرنے والے سرباز بلوچ نامی شحص نے ٹیلیفون پر اس دھماکے کی ذمہ داری قبول کی ہے اور الزام عائد کیا ہے کہ دونوں افرد سرکار کے مخبر تھے۔ سرباز بلوچ کے مطابق ان دونوں افرد کو تنبیہ کی گئی تھی کہ وہ اس سے باز رہیں۔

اس کے علاوہ کاہان میں بارودی سرنگ کے دھماکے میں فرنٹئر کور کے دو اہلکار زخمی ہوئے ہیں۔ پولیس کے مطابق دونوں اہلکار پانی بھرنے گئے تھے کہ اچانک بارودی سرنگ سے ٹکرا گئے۔ جس سے ایک اہلکار کی دونوں ٹانگیں اور ایک اہلکار کی آنکھ ضائع ہو گئی ہے۔

یاد رہے ڈیرہ بگٹی اور کاہان میں دسمبر دو ہزار پانچ میں شروع کی گئی مبینہ فوجی کارروائی کے بعد سے اس طرح کے دھماکوں کی اطلاعات ان دونوں شہروں کے علاوہ صوبے کی دیگر اضلاع سے بھی موصول ہوتی رہتی ہیں۔

گزشتہ دنوں بلوچستان کے انسپکٹر جنرل پولیس سعود گوہر نے بتایا تھا کہ سن دو ہزار چھ کی نسبت سن دو ہزار سات میں دہشت گردی کی کارروائیوں میں انیس فیصد اضافہ ہوا ہے۔