عزیزاللہ خان بی بی سی اردو ڈاٹ کام کوئٹہ

سپن بولدک کے منتظم حاجی فضل دین آغا نے بتایا ہے یہ ٹرک تاجروں کے تھے جو رات کے وقت اوزو سکی کے علاقے کے قریب کھڑے تھے اس دوران پندرہ سے بیس افراد موقع پر پہنچے اور اسلحے کے زور پر ٹرکوں کو ڈرائیوروں سمیت سڑک سے دور لے گئے۔ فضل دین نے بتایا ہے کہ حملہ آورطالبان گروہ سے تعلق رکھتے ہیں انھوں نے ڈرائیوروں سے رقم بھی چھینی ہے اور ٹرکوں کو آگ لگا دی ہے۔ فضل دین نے بتایا ہے کہ یہ ٹرک افغان اور پاکستانی تاجروں کے تھے اور ان میں پاکستانی ڈرائیور بھی شامل تھے لیکن ٹرکوں میں کسی قسم کا سامان لدا ہوا نہیں تھا۔

فضل دین آغا نے بتایا ہے اس واردات کے دوران ایک ڈرائیور پر فائرنگ کی گئی لیکن ڈرائیور محفوظ رہا اور طالبان کی آپس میں لڑائی شروع ہو گئی جس سے ان کا ایک آدمی جس کا نام محبوب بتایا گیا ہے زخمی ہوا ہے اور اس وقت سپین بولدک کے ہسپتال میں زیر علاج ہے۔

یاد رہے کہ دو روز قبل قندھار میں امریکی اڈے کے لیے لے جانے والے آئل ٹینکر پر چمن میں نا معلوم افراد نے فائرنگ کی تھی لیکن کسی قسم کا کوئی نقصان نہیں ہوا ہے۔تیل کے ٹینکروں پر پہلے بھی دو مرتبہ حملے ہو چکے ہیں۔

سین بولدک میں تاجروں کے ٹرکوں پر حملہ اپنی نوعیت کا پہلا واقعہ ہے اس بارے میں جب فضل دین آغا سے پوچھا کے طالبان کی دشمنی تو حکومت کے ساتھ ہے تاجروں کی گاڑیوں کو آگ لگانے کا کیا مقصد ہے تو انھوں نے کہا کہ اس کا علم انھیں نہیں ہے تاہم ہو سکتا ہے کہ رقم چھیننے کے لیے انھوں نے یہ سب کیا ہو۔