ఆస్కార్ 2020: జోకర్ సినిమాకు 11 నామినేషన్లు

13 జనవరి 2020

ఈ ఏడాది ఆస్కార్ అవార్డులకు నామినేషన్లను ప్రకటించారు. ఇందులో 11 నామినేషన్లతో 'జోకర్' అగ్రస్థానంలో నిలిచింది.

కామిక్ బుక్ విలన్ 'జోకర్' మూలాల కథను చెప్పే ఈ సినిమా.. ఉత్తమ చిత్రం, ఉత్తమ దర్శకుడు, ఉత్తమ నటుడు (వాకీన్ ఫీనిక్స్)తో పాటు మరో ఎనిమిది విభాగాల్లో అవార్డులకు నామినేట్ అయింది.

ఇక ద ఐరిష్‌మాన్, 1917, వన్స్ అపాన్ ఎ టైమ్ ఇన్ హాలీవుడ్ చిత్రాలు.. ఒక్కోటి 10 నామినేషన్లతో రెండో స్థానంలో నిలిచాయి.

బ్రిటన్‌కు చెందిన సింథియా ఎరీవో, ఆంథొని హాప్కిన్స్, జొనాథన్ ప్రైస్, ఫ్లోరెన్స్ పగ్‌లు ఉత్తమ నటన అవార్డుల కోసం పోటీ పడుతున్నారు.

జోకర్ సినిమా.. గత వారం ప్రకటించిన బ్రిటిష్ అకాడమీ ఫిల్మ్ అవార్డులకు సైతం 11 నామినేషన్లు పొందింది.

అయితే, ఉత్తమ దర్శకుడి విభాగంలో మరోసారి అందరూ పురుషుల పేర్లనే నామినేట్ చేయటం పట్ల విమర్శలు వినిపిస్తాయనటంలో సందేహం లేదు.

2018లో లేడీ బర్డ్ సినిమాతో ఉత్తమ దర్శకత్వం విభాగానికి నామినేట్ అయిన దర్శకురాలు గ్రెటా జెర్విగ్ ఈసారి తన 'లిటిల్ ఉమెన్' సినిమాతో ఆ నామినేషన్ పొందలేకపోయారు.

ఆస్కార్ అవార్డుల్లో ఉత్తమ దర్శకుల కేటగిరీలో ఇప్పటివరకూ కేవలం ఐదుగురు మహిళలు మాత్రమే నామినేట్ అయ్యారు. వారిలో 'ద హర్ట్ లాకర్' దర్శకురాలు కాథరిన్ బిగెలో ఒక్కరే అవార్డు గెలుచుకున్నారు.

Skip ఎక్కువమంది చదివినవి and continue reading

ఎక్కువమంది చదివినవి

End of ఎక్కువమంది చదివినవి

‘నెట్‌ఫ్లిక్స్‌’కు 20 నామినేషన్లు

మ్యారేజ్ స్టోరీ, ద ఐరిష్‌మాన్, ద టు పోప్స్ సినిమాల వెనుక ఉన్న సబ్‌స్క్రిప్షన్ దిగ్గజం ‘నెట్‌ఫ్లిక్స్’ మొత్తంగా 20 నామినేషన్లు పొందింది.

వీటిలో ఉత్తమ యానిమేషన్ చిత్రం విభాగంలో ఈ సంస్థకు చెందిన రెండు సినిమాలు - ఐ లాస్ట్ మై బాడీ, క్లాస్ - ఉన్నాయి. ఇవి.. మిస్సింగ్ లింక్, టాయ్ స్టోరీ 4, హౌ టు ట్రైన్ యువర్ డ్రాగన్ సినిమాలతో పోటీపడుతున్నాయి.

92వ అకాడమీ అవార్డుల ప్రకటన, ప్రదానోత్సవం ఫిబ్రవరి 9వ తేదీన లాస్ ఏంజెలెస్‌లో జరుగుతుంది.

ఈ ఏడాది కూడా గత ఏడాది తరహాలోనే ఒక వ్యాఖ్యాత మొత్తం కార్యక్రమం నడిపించటం ఉండదు. ఒక్కో విభాగాన్ని పలువురు సెలబ్రిటీ అతిథులు ప్రకటిస్తారు.

గత ఏడాది ‘బొహీమియన్ రాప్సొడి’ ఉత్తమ నటుడు సహా నాలుగు ఆస్కార్లు గెలుచుకుంది.

నిరుడు ఉత్తమ చిత్రంగా గ్రీన్ బుక్ నిలవగా, ఉత్తమ నటిగా ఒలీవియా కోల్మన్ (ద ఫేవరైట్) ఎంపికయ్యారు.