ఆ విగ్రహం ధ్వంసం చేశారనటం ఫేక్ న్యూస్: ఏపీ పోలీసులు

బీబీసీ రాసిన 'మత ప్రచారకులను రావొద్దంటున్న ఈ బోర్డులు నిజంగానే ఉన్నాయా?' కథనానికి ఫేస్‌బుక్‌ కామెంట్లలో.. ''నరసరావుపేటలో దారుణం. శృంగేరీ శంకర మఠం సమీపంలో ఉన్న సరస్వతీ విగ్రహం దారుణంగా ద్వoసం.. విగ్రహంపై మద్యం పోసి బాటిళ్లతో కొట్టారు.. ఎందుకింత కక్ష..ఏంటీ పైశాచికత్వం?!'' అంటూ ఓ ఫొటో పోస్టు చేశారు.

అదే ఫొటో సామాజిక మాధ్యమాలలో విస్తృతంగా చక్కర్లు కొడుతోంది. అయితే అది ఫేక్ న్యుస్ అని గుంటూరు (రూరల్) జిల్లా పోలీసులు దృవీకరించారు. ''ఉదయం నరసరావుపేటలో సరస్వతీ దేవీ విగ్రహాన్ని ధ్వంసం చేస్తున్నట్లు వచ్చిన న్యూస్ పూర్తిగా సత్యదూరం, కావాలని దుష్ప్రచారం చేస్తున్నారు'' అని పోలీసులు ట్విటర్ ద్వారా తెలిపారు.

ఆ విగ్రహం ధ్వంసం గురించి ఆ స్థల యజమాని వివరణ ఇస్తున్న వీడియో కూడా ఒకటి పోస్టు చేశారు. రెండు సంవత్సరాల కిందటే ఆ విగ్రహం పగిలిందని వివరించారు స్థల యజమాని కపిలవాయి విజయ కుమార్‌.

''ఈ స్థలాన్ని 20 సంవత్సరాల క్రితం కృష్ణవేణి కాలేజీకి అద్దెకు ఇవ్వడం జరిగింది. రెండు సంవత్సరాల కిందట వారు బిల్డింగులు కూలకొట్టినప్పుడే ఈ విగ్రహం పగిలిపోయింది. కానీ సోషల్‌ మీడియాలో ఇది ఇప్పుడే పగలగొట్టారని కొంత మంది చేస్తున్న ప్రచారం అవాస్తవం'' అని ఆయన ఆ వీడియోలో తెలిపారు.

కపిలవాయి విజయ కుమార్‌తో బీబీసీ మాట్లాడింది. ‘‘విగ్రహం కాలేజిలో ప్రతిష్టించిన విగ్రహం కాదు. కృష్ణవేణి కాలేజి వారు పక్కనే ఉన్న బిల్డింగు స్లాబు కూలగొట్టే క్రమంలో పగిలిపోయింది. అందుకే ఆ విగ్రహం అక్కడే ఉంచేశారు. ఇప్పుడు కొందరు దాన్ని మతం పేరుతో ప్రచారం చేస్తున్నారు" అని ఆయన వివరించారు.

దీనిపై ఆంధ్రప్రదేశ్ డిజీపీ గౌతమ్ సావంగ్ బీబీసీతో మాట్లాడుతూ.. ''కేసు నమోదు చేశాము. అవాస్తవ ప్రచారానికి పాలుపడ్తున్న వారిపై చర్యలు తీసుకుంటాము'' అని చెప్పారు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)