తెలంగాణ బడ్జెట్ 2024: ఏ రంగానికి ఎంత కేటాయించారు, వేటిని అభివృద్ధి చేస్తామని చెప్పారు?

తెలంగాణలో కాంగ్రెస్ ప్రభుత్వం మొదటిసారి పూర్తి స్థాయి బడ్జెట్ ప్రవేశ పెట్టింది. ఇందులో మొత్తం 2 లక్షల 91 వేల కోట్ల రూపాయల పద్దు ప్రతిపాదనలు చేసింది.

శాసనసభలో బడ్జెట్ ప్రవేశపెట్టిన ఉప ముఖ్యమంత్రి, ఆర్థిక మంత్రి మల్లు భట్టి విక్రమార్క సుదీర్ఘంగా ప్రసంగించారు. ‘‘తెలంగాణ రాష్ట్రం ఏర్పడ్డాక పదేళ్లలో ఆశించిన అభివృద్ధి జరగలేదు. రాష్ట్రం ఏర్పడినప్పుడు ఉన్న రూ.75,577 కోట్ల అప్పు, గతేడాది డిసెంబర్ నాటికి రూ.6,71,757 కోట్లకు చేరింది. గత పాలకులు ప్రభుత్వాన్ని సొంత జాగీరులా ఆర్థిక క్రమశిక్షణ లేకుండా నడిపారు’’ అన్నారు భట్టి.

తమ ప్రభుత్వం చేపట్టిన వివిధ కార్యక్రమాలు, ఉద్యోగ నియామకాలు, జీతాలు మొదటి తారీఖున ఇవ్వడం, ప్రజావాణి, రుణ మాఫీ, రైతు భరోసా, రైతు కూలీ సాయం, ధరణి లోపాలు, ఇందిరమ్మ ఇళ్ళు తదితర విషయాల గురించి కూడా వివరంగా చెప్పారు.

బీబీసీ న్యూస్ తెలుగు వాట్సాప్ చానల్‌లో చేరడానికి ఇక్కడ క్లిక్ చేయండి

జాతీయ సగటు కంటే తక్కువ వృద్ధి రేటు

2023-24 ఆర్థిక సంవత్సరానికి తెలంగాణ జీఎస్డీపీ ప్రస్తుత ధరల ఆధారంగా రూ.14,63,963 కోట్లు. గతేడాదితో పోలిస్తే 11.9 శాతం వృద్ధి రేటు నమోదు కాగా, జాతీయ స్థాయిలో ఇది 9.1 శాతంగా ఉంది.

ఆర్థిక రంగం వృద్ధిలో దేశ సగటు 7.6 శాతం కాగా, తెలంగాణ 7.4 శాతం వృద్ధి రేటు నమోదు చేసింది. 2023-24 ప్రస్తుత ధరల ప్రకారం తెలంగాణ తలసరి ఆదాయం 3,47,299 రూపాయలు.

బీఆర్ఎస్ ప్రభుత్వం తరచూ తలసరి ఆదాయంలో దేశంలోనే తెలంగాణ ముందున్న విషయాన్ని చెబుతూ వస్తే, అదే అంశంలో తెలంగాణ జిల్లాల మధ్య తలసరి ఆదాయ తేడాలు ఎక్కువగా ఉన్నాయన్న విషయాన్ని కాంగ్రెస్ ఎత్తి చూపింది. జాతీయ తలసరి ఆదాయం రూ.1,83,236. కంటే తెలంగాణ తలసరి ఆదాయం ఎక్కువగా ఉన్నప్పటికీ, జిల్లాల మధ్య తీవ్ర అంతరం ఉందని బడ్జెట్‌లో భట్టి చెప్పారు.

‘‘రంగారెడ్డి జిల్లా తలసరి ఆదాయం రూ.9,46,862 కాగా, వికారాబాద్ తలసరి ఆదాయం రూ.1,80,241 మాత్రమే. ఈ ఆదాయ అంతరాలు తగ్గించడానికి తమ ప్రభుత్వం కృషి చేస్తుంది’’ అని భట్టి అన్నారు.

‘ట్రాఫిక్ తగ్గిస్తాం, మెట్రో విస్తరిస్తాం’

మంత్రి భట్టి విక్రమార్క చెప్పిన విషయాలు..

వ్యవసాయ రంగానికి పెద్దపీట

భరోసా కల్పించలేని బడ్జెట్: కేసీఆర్

తెలంగాణ ప్రధాన ప్రతిపక్షనేత కేసీఆర్ బడ్జెట్ రోజు అసెంబ్లీకి వచ్చారు. బడ్జెట్ పూర్తయిన తరువాత మీడియా పాయింట్‌కి వచ్చి బడ్జెట్‌పై స్పందించారు.

కేసీఆర్ సభకు రావడంతో అంతటా ఆసక్తికర వాతావరణం నెలకొంది.

‘‘ఈ బడ్జెట్ ఎవరికీ కూడా భరోసా కల్పించేలా లేదు. డబ్బొచ్చినప్పుడల్లా ఆర్థిక మంత్రి ప్రతి మాటను ఒత్తి ఒత్తి చెప్పడం తప్ప కొత్తగా చెప్పిందేమీ లేదు. కొత్త సంక్షేమ పథకాలు కూడా ఏమీ లేవు. ⁠కొత్త ప్రభుత్వం తర్వాత ఆరు మాసాల సమయం ఇవ్వాలని అనుకున్నాం. ఇది రైతు శత్రు ప్రభుత్వం. ⁠ధాన్యం కొనుగోలు, విద్యుత్, నీరు సరఫరా చేయడం లేదు. ఇండస్ట్రియల్ పాలసీ లేదు. కథలు చెప్పారు తప్ప బడ్జెట్‌లో ఏమీ లేదు. దీనికి వ్యతిరేకంగా మేం పోరాడతాం’’ అని కేసీఆర్ అన్నారు.

(బీబీసీ తెలుగును వాట్సాప్‌,ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)