ఆవు, గేదె పాలే తాగాలా? గాడిద, గుర్రం, ఒంటె పాలకు డిమాండ్ ఎందుకు పెరుగుతోంది? బీపీ, డయాబెటిస్, ఆటిజం తగ్గించే పాలు ఉంటాయా

ఆవు పాలు, గేదె పాలు.. సాధారణంగా ఎక్కువ మంది వినియోగించేది ఈ రెండు రకాలే. చిన్నారులైతే తల్లి పాలు తాగుతారు.

నేరుగా ఆవులు, గేదెల నుంచి పితికి తెచ్చి విక్రయించే వారి దగ్గర కొంటే ఎక్కువగా ఆప్షన్లు ఉండవు కానీ ప్యాకెట్ పాలు అయితే టోన్డ్, డబుల్ టోన్డ్, ఫుల్ క్రీమ్ ఇలా రకరకాల ఆప్షన్లు ఉంటాయి.

ఎన్ని ఆప్షన్లు ఉన్నా విరివిగా దొరికే పాలలో ప్రధాన రకాలు ఆవు పాలు, గేదె పాలే.

కానీ, ఇప్పుడు ఆ పరిస్థితి మారుతోంది. గాడిద, ఒంటె, మేక పాలు కూడా ఈ రెండింటి సరసన చేరుతున్నాయి.

రోజువారీ వినియోగంలో ఆవు, గేదె పాల స్థానాన్ని ఆక్రమించే పరిస్థితి ఇంకా లేకపోయినా ఆన్‌లైన్‌లో కొనుగోలు చేసే సదుపాయం రావడంతో కొన్ని ఇతర జంతువుల పాలు కూడా అందుబాటులోకి వస్తున్నాయి.

ఆవు, గేదెల పాలు కాకుండా ఇతర జంతువుల పాల వినియోగం కొత్తేమీ కాకపోయినా ఇటీవల కాలంలో డిమాండ్ మళ్లీ పెరుగుతోంది. ముఖ్యంగా గ్రామీణ ప్రాంతాలు, ఒక మోస్తరు పట్టణాలలో వీధుల్లో తిరుగుతూ గాడిద పాలు విక్రయించేవారు కనిపిస్తున్నారు.

చిన్నపిల్లలకు ఈ పాలు పడితే మంచిదంటూ చాలామంది కొనుగోలు చేస్తున్నారు కూడా.

ఇక ఒంటె పాల విషయానికొస్తే తెలుగు రాష్ట్రాలలో లేనప్పటికీ రాజస్థాన్, గుజరాత్ వంటి రాష్ట్రాలలోని వివిధ ప్రాంతాలలో ఒంటె పాల వినియోగం ఉంది.

ఇప్పుడు అమూల్ వంటి సంస్థలు వీటిని బాటిళ్లలో నింపి ఆన్‌లైన్‌లోనూ అమ్ముతుండటంతో తెలుగు రాష్ట్రాలలో కూడా నగర ప్రాంతాలలో దొరుకుతోంది.

అమూల్ సంస్థ వెబ్‌సైట్‌తో పాటు ఫ్లిప్‌కార్ట్, అమెజాన్ వంటి ఈకామర్స్ సైట్లలోనూ ఒంటె పాలు దొరుకుతున్నాయి. 200 మిల్లీ లీటర్లు, అర లీటరు పరిమాణంలో అందుబాటులో దొరుకుతోంది. దేశంలోని అనేక ప్రాంతాలకు డెలివరీ చేస్తున్నారు.

దిల్లీ వంటి ప్రాంతాలలో మేక పాలను ఆన్‌లైన్లో విక్రయించే సంస్థలూ ఉన్నాయి. మేక పాలు కూడా కొత్తదేమీ కాదు. దేశంలోని అనేక ప్రాంతాలు, వివిధ కులాలలో మేకపాలను విరివిగా వినియోగించే అలవాటు ఉంది.

తెలుగు రాష్ట్రాలలోనూ మేక పాల వినియోగం ఉంది. మహాత్మాగాంధీ కూడా తాను మేక పాలు తాగినట్లు తన ఆత్మ కథలో రాసుకున్నారు.

ఇంతకీ పాలలో ఏం ఉంటుంది?

పాలలో ప్రధానంగా మాంసకృత్తులు ఉంటాయి. దీంతో పాటు ఫాస్ఫరస్, కాల్షియం, విటమిన్ ఏ, విటమిన్ బీ2( రిబోఫ్లెవిన్), విటమిన్ బీ12, పొటాషియం, జింక్, కోలిన్, మెగ్నీషియం, సెలీనియం వంటి పోషకాలు ఉంటాయి.

మాంసకృత్తులు ఉండడంతో కండర నిర్మాణానికి, కాల్షియం ఉండడంతో ఎముకల పటిష్టతకు మంచిదని వైద్యులు సూచిస్తుంటారు.

భారతదేశంలోను, ప్రపంచలోని ఇతర దేశాలలోనూ ఆవు, గేదెల పాలతో పాటు ఇతర జంతువుల పాల వినియోగమూ ఉంది.

మేక పాలు - ఆవుపాలు పడని వారికి ప్రత్యామ్నాయం

తెలుగు రాష్ట్రాలు, కర్ణాటక, రాజస్థాన్, గుజరాత్, దిల్లీ, ఉత్తర్‌ప్రదేశ్, మధ్యప్రదేశ్‌లోని కొన్ని ప్రాంతాలలో మేక పాల వినియోగం ఉంది.

భారత్, అమెరికా కేంద్రంగా పనిచేసే మార్కెట్ రీసెర్చ్ సంస్థ ‘గ్రాండ్ వ్యూ రీసెర్చ్’ నివేదిక ప్రకారం.. 2022లో ప్రపంచ వ్యాప్తంగా మేక పాల మార్కెట్ విలువ 12.45 బిలియన్ డాలర్లు(సుమారు రూ. లక్ష కోట్లు).

ఆవు, గేదె పాల కంటే మేక పాలలో లాక్టోజ్ తక్కువగా ఉండడం వల్ల ఇది సులభంగా జీర్ణమవుతుందని, లాక్టోజ్ అరిగించుకోలేని వాళ్లు మేక పాలు వినియోగిస్తుంటారని ఈ నివేదిక పేర్కొంది.

ప్రపంచంలోని మేక పాల వినియోగంలో నేరుగా పాల వినియోగం 63.7 శాతం ఉంటే చీజ్, పెరుగు, ఇతర ఉత్పత్తుల రూపంలో సుమారు 36 శాతం వినియోగం ఉన్నట్లు ఈ నివేదిక పేర్కొంది.

భారత్, పాకిస్తాన్, బంగ్లాదేశ్, తుర్కియే , అమెరికా, కెనడా, మెక్సికో, జర్మనీ, యూకే, ఇటలీ, చైనా, జపాన్, ఆస్ట్రేలియా, బ్రెజిల్, సౌదీ అరేబియా, దక్షిణాఫ్రికా తదితర దేశాలలో మేక పాల వినియోగం ఉన్నట్లు ఈ నివేదికలో పేర్కొన్నారు.

ప్రపంచవ్యాప్తంగా మేక పాల వ్యాపారంలో అత్యధికంగా ఆసియాపసిఫిక్ దేశాలలోనే 52.7 శాతం రెవెన్యూ వస్తున్నట్లు పేర్కొన్నారు.

గాడిద పాలు.. అందం పెంచుతుందా?

‘గ్రాండ్ వ్యూ రీసెర్చ్’ మార్కెట్ అధ్యయనం ప్రకారం.. 2021లో ప్రపంచవ్యాప్తంగా 23.2 మిలియన్ డాలర్ల (సుమారు రూ. 190 కోట్లు) మేర గాడిద పాలు, పాల ఉత్పత్తుల వ్యాపారం జరిగింది.

ముఖ్యంగా బ్రిటన్, జర్మనీ వంటి యూరప్ దేశాలలో గాడిద పాల ఉత్పత్తుల వినియోగం అధికంగా ఉందని ఈ నివేదిక పేర్కొంది.

గాడిద పాల పొడి, గాడిద పాలతో చేసిన సబ్బులు, క్రీములు వంటి చర్మ సౌందర్య ఉత్పత్తులపై ప్రపంచవ్యాప్తంగా ఆసక్తి పెరగడంతో వినియోగం పెరిగి గాడిద పాలకు డిమాండ్ పెరిగినట్లు ఈ నివేదిక పేర్కొంది.

దీంతో పాటు 2022-28 మధ్య వార్షిక వృద్ధి రేటు 9.9 శాతం ఉండొచ్చనీ ఈ నివేదిక అంచనా వేసింది.

అయితే, ప్రపంచ మార్కెట్లో 65 శాతం గాడిద పాలు పొడి రూపంలోనే విక్రయమవుతోంది.

మేక పాలు లాగే ఇందులోనూ లాక్టోజ్ తక్కువగా ఉండడం వల్ల ఆవు, గేదె పాలను అరిగించుకోలేని సమస్య ఉన్నవారికి ఇది మంచిదని అధ్యయనాలు చెప్తున్నాయి.

గాడిద పాలలో సూక్ష్మజీవులు తక్కువగా ఉండడం వల్ల మిగతా పాల కంటే ఇది ఎక్కువ నిల్వ ఉంటుంది.

ప్రాచీన కాలంలో గ్రీకులు పిల్లలకు గాడిద పాలు పట్టేవారని, రోమన్లు గాడిద పాలను సౌందర్య సాధనంగా వాడేవారని చరిత్ర చెప్తోంది.

19వ శతాబ్దం వరకు బ్రిటన్‌లోనూ గాడిద పాలను తల్లి పాలకు ప్రత్యామ్నాయంగా విస్తృతంగా వాడేవారని 2011 నాటి బీబీసీ కథనంలో పేర్కొన్నారు.

క్లియోపాత్రా తన అందం పెంచుకోవడానికి గాడిద పాలలో స్నానం చేసేవారనీ చెప్తారు.

ఒంటె పాలు - రోగాలను తగ్గిస్తుందా?

అమెరికా ఫుడ్ అండ్ డ్రగ్ అడ్మినిస్ట్రేషన్ ప్రకారం ఒంటె పాలలో సుమారు 3 శాతం కొవ్వు పదార్థాలు ఉంటాయి. అయితే, ప్రాంతం బట్టి ఈ శాతం మారుతుంది.

మిగతా జంతువుల పాలతో పోల్చితే ఒంటె పాలలో సుగర్స్, కొలెస్ట్రాల్ తక్కువగా ఉంటాయి. ఇందులో పొటాషియం, ఐరన్, కాపర్, మెగ్నీషియం, విటమిన్ సి, కాల్షియం వంటి ఖనిజాలతో పాటు ఏ, బీ, సీ, డీ, ఈ, విటమిన్లు ఉంటాయి.

కాల్షియం, కేలియం కూడా ఉంటాయి.

అయితే, ఆవులు, గేదెలతో పోల్చినప్పుడు ఒంటెలు తక్కువ పాలిస్తాయి.

డాటా బ్రిడ్జ్ మార్కెట్ రీసెర్చ్ నివేదిక ప్రకారం 2022లో ప్రపంచవ్యాప్తంగా ఒంటె పాల మార్కెట్ 6.64 బిలియన్ డాలర్లు(సుమారు రూ. 54 వేల కోట్లు).

పాశ్చురైజ్ చేసిన పాలు, ఫ్లేవర్డ్ మిల్క్, చీజ్‌తో పాటు ఇన్ఫాంట్ ఫార్ములా రూపంలోనూ ఒంటె పాలు ప్రపంచవ్యాప్తంగా విక్రయమవుతోంది.

అమెరికా, కెనడా, మెక్సికో, జర్మనీ, స్వీడన్, పోలాండ్, డెన్మార్క్, ఇటలీ, బ్రిటన్, ఫ్రాన్స్, స్పెయిన్ సహా ఇతర అనేక యూరప్ దేశాలు.. ఆసియాలో చైనా, జపాన్, భారత్, దక్షిణ కొరియా సహా ఇతర దేశాలు.. అరబ్ దేశాలు, లాటిన్ అమెరికా దేశాలలోనూ ఒంటె పాలకు గిరాకీ పెరుగుతోందని డాటా బ్రిడ్జ్ మార్కెట్ రీసెర్చ్ నివేదిక పేర్కొంది.

ఆటిజం పిల్లల అమ్మలు ఏం చెప్తున్నారంటే..

ఆటిజంతో బాధపడేవారికి ఒంటె పాలు మంచిదని, డయాబెటిస్ రోగులకూ ఒంటె పాలు మంచిదని చెప్తున్నప్పటికీ శాస్త్రీయంగా దీన్ని పూర్తిగా బలపరిచే ఆధారాలు ఇంకా లభించలేదు.

ఆటిజం స్పెక్ట్రమ్ డిజార్డర్‌తో బాధపడుతున్న ఓ బాలుడి తల్లి సహా మరికొందరు ఆటిజం చిన్నారుల తల్లులు, ఒంటె పాలు తాగించడం వల్ల తమ ఆటిజం పిల్లలలో కొంత మెరుగుదల కనిపించిందని చెప్పినట్లు నేషనల్ సెంటర్ ఫర్ బయోటెక్నాలజీ ఇన్ఫర్మేషన్ అనుబంధ ‘నేషనల్ లైబ్రరీ ఆఫ్ మెడిసన్’లో వారి అనుభవాలను పొందుపరిచారు.

మధుమేహానికి మందా?

మధుమేహ రోగులలో బ్లడ్ సుగర్ మోతాదు ఒంటె పాల వల్ల తగ్గినట్లు కొన్ని అధ్యయనాలు సూచించాయి.

అయితే, ఇందులో ఎక్కువగా టైప్ 1 డయాబెటిస్ రోగులపైనే అధ్యయనాలు జరిగాయి.

దీనిపైనా మరింత లోతైన, సమగ్రమైన అధ్యయనాలు జరగాల్సి ఉంది.

గుర్రం పాలు - బ్రెస్ట్ క్యాన్సర్ తగ్గిస్తుందా

యూరప్‌లోని కొన్ని ప్రాంతాలలో, మధ్య ఆసియాలోనూ గుర్రం పాల వినియోగం ఉంది. ఇతర జంతువుల పాల కంటే ఇది జీర్ణకారి అని చెప్తారు.

కజక్‌స్థాన్, కిర్గిజిస్థాన్, అజర్‌బైజాన్, అర్మేనియా ప్రాంతాలలో ఈ పాల వినియోగం ఎక్కువగా ఉంది.కజక్‌స్థాన్‌లోని నజర్‌బయేవ్ యూనివర్సిటీకి చెందిన పరిశోధకులు గుర్రం పాలపై అధ్యయనం చేశారు.

‘ఫంక్షనల్ ఫుడ్స్ ఇన్ హెల్త్ అండ డిసీజ్’ మ్యాగజీన్‌లో ప్రచురితమైన ఈ అధ్యయన పత్రంలో వారు గుర్రం పాలలో అల్బూమిన్ అధికంగా ఉండడం వల్ల రక్తపోటు నియంత్రణలో ఉంచేందుకు తోడ్పడుతుందని పేర్కొన్నారు.

గుర్రంపాలలోని లైసోజైమ్, లాక్టోఫెర్రిన్‌ల కారణంగా జీర్ణవ్యవస్థకు మంచిదని ఈ అధ్యయనం సూచించింది.

రొమ్ము క్యాన్సర్ వంటివి నివారించే లక్షణం ఉందని ఈ అధ్యయనం సూచించింది.

ప్రపంచవ్యాప్తంగా విరివిగా దొరికే ఆవు, గేదె పాలలో లాక్టోజ్ శాతం అధికంగా ఉండడం వల్ల చాలామందికి ఇది పడదు. ప్రపంచ ఆరోగ్య సంస్థ అంచనా ప్రకారం2025 నాటికి ప్రపంచ జనాభాలో సగం మంది పాల అలర్జీల కారణంగా ఇబ్బంది పడే అవకాశాలున్నాయి.

సాధారణ పాలలో ఉండే పోషకాలు కలిగి ఉంటూ అలర్జీ కలిగించని ఇతర జంతువుల పాల వైపు ప్రజలు మళ్లుతున్నారు. ఈ క్రమంలోనే ఇతర జంతువుల పాల వినియోగం పెరుగుతోంది.

మేక, గాడిద, ఒంటె పాలతో పాటు గొర్రె పాల వినియోగం కొన్నిచోట్ల ఉంది. ఆస్ట్రేలియా, న్యూజీలాండ్‌లో గొర్రె పాలను వినియోగిస్తున్నారు.

ఇండియాలో పాల వినియోగం, ఉత్పత్తి ఎక్కువే

భారత్‌‌లో పాల వినియోగం, ఉత్పత్తి ఏటా పెరుగుతున్నాయి. 1950-51లో ఇండియాలో 1.7 కోట్ల టన్నుల పాలు ఉత్పత్తి కాగా 2020-21లో అది 21 కోట్ల టన్నులకు పెరిగింది.

అంతేకాదు.. ప్రపంచంలో పాల ఉత్పత్తిలో సగటు పెరుగుదల రేటు 2 శాతం కాగా భారత్‌లో అది 6 శాతంగా ఉంది.

మరోవైపు పాల వినియోగం కూడా దేశంలో గణనీయంగా పెరిగింది.

1970లో దేశంలో తలసరి పాల వినియోగం 107 గ్రాములు ఉండగా 2020-21లో ఇది 427 గ్రాములుగా ఉంది.

2021లో ప్రపంచంలో తలసరి పాల వినియోగం సగటు 322 గ్రాములుగా ఉంది.

తలసరి పాల వినియోగంలో భారత్‌లో నాలుగో స్థానంలో ఏపీ

భారత్‌లో 2019-20లో తలసరి పాల వినియోగం 406 గ్రాములు కాగా ఆ ఏడాది ఆంధ్రప్రదేశ్‌లో తలసరి వినియోగం 799 గ్రాములు, తెలంగాణలో తలసరి వినియోగం 410 గ్రాములు ఉంది. పంజాబ్, హరియాణా, రాజస్థాన్‌ల తరువాత ఏపీ నాలుగో స్థానంలో ఉంది.

మరిగించిన పాలే తాగాలి

ఆవు, గేదె, గాడిద, మేక అని కాకుండా పెంపుడు జంతువుల పాలు ఏవైనా తాగొచ్చని, కానీ.. తల్లిపాలే అన్నిటికంటే మేలని చిన్నపిల్లల వైద్య నిపుణులు భార్గవ ‘బీబీసీ’తో చెప్పారు.

ఆవు, గేదె సహా ఏ జంతువు పాలైనా మరిగించిన తరువాతే తాగాలని సూచించారు.

పాలను మరిగించడం వల్ల అందులోని పోషకాలు ఏమీ తగ్గవని.. మరిగించడం వల్ల పాలలోని బాక్టీరియా నాశనమై ఇతర ఆరోగ్య ఇబ్బందులు రాకుండా నివారించొచ్చని ఆయన చెప్పారు.

వ్యాధుల ప్రమాదం లేకుండా..

పెంపుడు జంతువుల పాలతో సాధారణంగా ఎలాంటి ఇబ్బంది ఉండదని పశువైద్య నిపుణులు బీఎస్ మూర్తి చెప్పారు.

మేక పాలలో ఉండే కొన్ని రకాల బాక్టీరియాల వల్ల అది ఆవు, గేదె పాలతో పోల్చినప్పుడు తక్కువ గంటలు నిల్వ ఉంటుందని.. కాబట్టి వీలైనంత వేగంగా దాన్ని మరిగించి తాగేయాలని చెప్పారు.

ఆవు, గేదె, గాడిద, మేక, ఒంటె ఏదైనా కానీ పాలలో ప్రధానంగా ఉండే ప్రోటీన్, కొన్ని మినరల్స్, విటమిన్స్ మారవని.. జంతువును బట్టి కొన్నిట్లో వేర్వేరు మినరల్స్ ఉంటాయని తెలిపారు.

ఏ జంతువు పాలైనా నేరుగా తాగడం మంచిది కాదని.. మరిగించిన తరువాతే తాగాలని చెప్పారు.

ఆయా పశువులకు ఏవైనా వ్యాధులు ఉండి, అవి స్రావాల ద్వారా సంక్రమించేవి అయితే పచ్చి పాలు తాగడం ప్రమాదకరమవుతుందని చెప్పారు.

పొదుగువాపు వంటి వ్యాధులు వచ్చినప్పుడు పెంపుడు ఆవులు, గేదెలకు కూడా పొదుగు, సిరల వాపు వస్తుందని, పాలతో పాటు రక్తం కూడా వస్తుందని.. అలాంటి పాలు తాగడం ఏమాత్రం ఆరోగ్యం కాదని చెప్పారు.

అందుకే పాలను బాగా మరిగిస్తే బాక్టీరియ, వ్యాధికారక క్రిములు నశించి పాలు ఆరోగ్యకరమవుతాయని తెలిపారు.

(ఆధారం: ప్రపంచ ఆరోగ్య సంస్థ, భారత ఆరోగ్య మంత్రిత్వ శాఖ, హార్వర్డ్ యూనివర్సిటీ-హెల్త్ పబ్లిషింగ్, వెబ్ఎండీ, ఇంటర్నేషనల్ యూనియన్ ఆఫ్ క్రిస్టలోగ్రఫీ జర్నల్స్, నేషనల్ డెయిరీ డెవలప్‌మెంట్ బోర్డ్)

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)