ਬਿਲਕਿਸ ਬਾਨੋ ਗੈਂਗਰੇਪ ਮਾਮਲੇ ਦਾ ਦੋਸ਼ੀ ਭਾਜਪਾ ਦੇ ਮੰਚ ਉੱਤੇ ਵਿਧਾਇਕ ਤੇ ਐੱਮਪੀ ਨਾਲ ਦਿਖਿਆ
ਤਸਵੀਰ ਸਰੋਤ, DAHOD DISTRICT INFORMATION DEPARTMENT
ਬਿਲਕਿਸ ਬਾਨੋ ਗੈਂਗਰੇਪ ਮਾਮਲੇ 'ਚ ਬਰੀ ਕੀਤੇ ਗਏ 11 ਦੋਸ਼ੀਆਂ 'ਚੋਂ ਇੱਕ ਸ਼ੈਲੇਸ਼ ਭੱਟ ਨੂੰ ਸ਼ਨੀਵਾਰ ਨੂੰ ਦਾਹੋਦ ਜ਼ਿਲੇ 'ਚ ਆਯੋਜਿਤ ਗੁਜਰਾਤ ਸਰਕਾਰ ਦੇ ਇੱਕ ਸਮਾਰੋਹ 'ਚ ਭਾਜਪਾ ਦੇ ਇੱਕ ਸੰਸਦ ਮੈਂਬਰ ਅਤੇ ਵਿਧਾਇਕ ਦੇ ਨਾਲ ਪਹਿਲੀ ਕਤਾਰ ਵਿੱਚ ਜਗ੍ਹਾ ਦਿੱਤੀ ਗਈ ਸੀ।
ਭਾਰਤੀ ਜਨਤਾ ਪਾਰਟੀ ਦੇ ਦਾਹੋਦ ਤੋਂ ਸੰਸਦ ਮੈਂਬਰ ਜਸਵੰਤਸੀਂਹ ਭਾਭੋਰ ਅਤੇ ਲਿਮਖੇੜਾ ਦੇ ਵਿਧਾਇਕ ਸ਼ੈਲੇਸ਼ ਭਾਭੋਰ ਵੀ ਮੰਚ 'ਤੇ ਬੈਠੇ ਸਨ। ਵਿਧਾਇਕ ਸ਼ੈਲੇਸ਼ ਭਭੌਰ ਜਸਵੰਤਸੀਂਹ ਭਾਭੌਰ ਦੇ ਭਰਾ ਹਨ।
63 ਸਾਲਾ ਸ਼ੈਲੇਸ਼ ਭੱਟ ਅਤੇ ਉਨ੍ਹਾਂ ਦੇ ਭਰਾ ਜਲ ਸਪਲਾਈ ਅਤੇ ਸੀਵਰੇਜ ਬੋਰਡ ਯੋਜਨਾ ਲਈ ਦਾਹੋਦ ਜ਼ਿਲੇ ਦੇ ਸਿੰਗਵਾੜ ਤਾਲੁਕ ਦੇ ਕਰਮਾਡੀ ਪਿੰਡ 'ਚ ਆਯੋਜਿਤ ਇੱਕ ਭੂਮੀਪੂਜਨ ਪ੍ਰੋਗਰਾਮ ਵਿੱਚ ਸ਼ਾਮਿਲ ਹੋਣ ਆਏ ਸਨ।
ਇਸੇ ਪ੍ਰੋਗਰਾਮ ਵਿੱਚ ਸ਼ੈਲੇਸ਼ ਭੱਟ ਵੀ ਮੌਜੂਦ ਸਨ।
ਸਟੇਜ ਪਿੱਛੇ ਲੱਗੇ ਬੈਨਰ 'ਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ, ਮੁੱਖ ਮੰਤਰੀ ਭੂਪੇਂਦਰ ਪਟੇਲ, ਜਲ ਸਪਲਾਈ ਮੰਤਰੀ ਕੁੰਵਰਜੀ ਬਾਵਾਲੀਆ ਅਤੇ ਸੰਸਦ ਮੈਂਬਰ ਜਸਵੰਤਸੀਂਹ ਭਾਭੋਰ ਦੀਆਂ ਤਸਵੀਰਾਂ ਲੱਗੀਆਂ ਹੋਈਆਂ ਸਨ।
ਇਸ ਸਮਾਗਮ ਵਿੱਚ ਸ਼ੈਲੇਸ਼ ਦੀ ਮੌਜੂਦਗੀ ’ਤੇ ਚਰਚਾ ਛਿੜ ਗਈ ਹੈ।
ਤਸਵੀਰ ਸਰੋਤ, ANI
ਬਿਲਕਿਸ ਬਾਨੋ ਮਾਮਲਾ ਤੇ ਸ਼ੈਲੇਸ਼ ਭੱਟ ਦੀ ਰਿਹਾਈ
ਬਿਲਕਿਸ ਬਾਨੋ ਮਾਮਲੇ ਵਿੱਚ ਹਾਲ ਹੀ ਵਿੱਚ 11 ਦੋਸ਼ੀ ਜਿਨ੍ਹਾਂ ਵਿੱਚ ਸ਼ੈਲੇਸ਼ ਭੱਟ ਵੀ ਸ਼ਾਮਿਲ ਸਨ, ਸਜ਼ਾ ਯਾਫ਼ਤਾ ਸਨ।
ਪਰ 15 ਅਗਸਤ, 2022 ਨੂੰ ਇਨ੍ਹਾਂ 11 ਮੁਜਰਮਾਂ ਨੂੰ ਗੋਧਰਾ ਜੇਲ੍ਹ ਤੋਂ ਰਿਹਾਅ ਕਰ ਦਿੱਤਾ ਗਿਆ ਸੀ।
ਰਿਹਾਅ ਹੋਣ ਦੇ ਬਾਅਦ ਇਨ੍ਹਾਂ ਮੁਜਰਮਾਂ ਨੂੰ ਮਠਿਆਈ ਖਵਾਉਣ ਅਤੇ ਉਨ੍ਹਾਂ ਦਾ ਸਵਾਗਤ ਕਰਨ ਦੀਆਂ ਕਈ ਤਸਵੀਰਾਂ ਸਾਹਮਣੇ ਆਈਆਂ ਸਨ।
ਇਹ 11 ਜਣੇ ਸਾਲ 2002 ਦੇ ਗੁਜਰਾਤ ਦੰਗਿਆਂ ਦੌਰਾਨ ਬਿਲਕਿਸ ਬਾਨੋ ਦੇ ਸਮੂਹਿਕ ਬਲਾਤਕਾਰ ਅਤੇ ਉਸ ਦੇ ਪਰਿਵਾਰ ਦੇ ਸੱਤ ਮੈਂਬਰਾਂ ਦੀ ਹੱਤਿਆ ਦੇ ਮਾਮਲੇ ਵਿੱਚ ਉਮਰ ਕੈਦ ਦੀ ਸਜ਼ਾ ਕੱਟ ਰਹੇ ਸਨ।
ਸਾਲ 2008 ਵਿੱਚ ਮੁੰਬਈ ਦੀ ਇੱਕ ਵਿਸ਼ੇਸ਼ ਸੀਬੀਆਈ ਅਦਾਲਤ ਨੇ ਇਸ ਮਾਮਲੇ ਵਿੱਚ ਇਨ੍ਹਾਂ 11 ਲੋਕਾਂ ਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਈ ਸੀ। ਇਸ ਸਜ਼ਾ ਨੂੰ ਬਾਅਦ ਵਿੱਚ ਬੰਬੇ ਹਾਈ ਕੋਰਟ ਨੇ ਇਸ ਫ਼ੈਸਲੇ ਨੂੰ ਬਰਕਰਾਰ ਰੱਖਿਆ ਸੀ।
ਤਸਵੀਰ ਸਰੋਤ, @JSBHABHOR/Twitter
ਸ਼ੈਲੇਸ਼ ਦਾ ਸਮਾਗਮ ਵਿੱਚ ਸ਼ਾਮਿਲ ਹੋਣਾ
ਬੀਬੀਸੀ ਦੇ ਬੀਬੀਸੀ ਪੱਤਰਕਾਰ ਦਕਸ਼ੇਸ਼ ਸ਼ਾਹ ਨੇ ਦੱਸਿਆ ਕਿ ਬਿਲਕਿਸ ਬਾਨੋ ਸਮੂਹਿਕ ਬਲਾਤਕਾਰ ਮਾਮਲੇ ਵਿੱਚ ਦੋਸ਼ੀ ਪਾਏ ਗਏ ਸ਼ੈਲੇਸ਼ ਭੱਟ ਦਾ ਜੇਲ੍ਹ ਤੋਂ ਰਿਹਾਅ ਹੋਣਾ ਪੂਰੇ ਇਲਾਕੇ ਵਿੱਚ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ।
ਇੰਡੀਅਨ ਐਕਸਪ੍ਰੈਸ ਦੀ ਰਿਪੋਰਟ ਮੁਤਾਬਕ ਸ਼ੈਲੇਸ਼ ਭੱਟ ਨੇ ਅਖਬਾਰ ਨੂੰ ਦੱਸਿਆ ਸੀ, "ਇਹ ਇੱਕ ਜਨਤਕ ਸਮਾਗਮ ਸੀ ਜਿਸ ਵਿੱਚ ਮੈਂ ਹਾਜ਼ਰ ਹੋਇਆ ਸੀ... ਮੇਰੇ ਕੋਲ ਕਹਿਣ ਲਈ ਹੋਰ ਕੁਝ ਨਹੀਂ ਹੈ।"
ਜਦੋਂ ਕਿ ਸੰਸਦ ਮੈਂਬਰ ਜਸਵੰਤਸੀਂਹ ਭਾਭੋਰ ਨੇ ਸ਼ੈਲੇਸ਼ ਭੱਟ ਦੀ ਸਟੇਜ 'ਤੇ ਮੌਜੂਦਗੀ ਦੇ ਮੁੱਦੇ 'ਤੇ ਉਠਾਏ ਗਏ ਸਵਾਲਾਂ ਦਾ ਜਵਾਬ ਦੇਣ ਦੀ ਇੰਡੀਅਨ ਐਕਸਪ੍ਰੈਸ ਦੀਆਂ ਕੋਸ਼ਿਸ਼ਾਂ ਦਾ ਜਵਾਬ ਨਹੀਂ ਦਿੱਤਾ।
ਹਾਲਾਂਕਿ, ਉਨ੍ਹਾਂ ਦੇ ਭਰਾ ਅਤੇ ਲਿਮਖੇੜਾ ਦੇ ਵਿਧਾਇਕ ਸ਼ੈਲੇਸ਼ ਭਾਭੋਰ ਦਾ ਹਵਾਲਾ ਦਿੰਦੇ ਹੋਏ ਰਿਪੋਰਟ ਵਿੱਚ ਕਿਹਾ ਗਿਆ ਹੈ, "ਇੱਕ ਵਿਧਾਇਕ ਹੋਣ ਦੇ ਨਾਤੇ, ਮੈਂ ਪ੍ਰੋਗਰਾਮ ਵਿੱਚ ਇੰਨਾ ਰੁੱਝਿਆ ਹੋਇਆ ਸੀ ਕਿ ਮੈਂ ਇਹ ਨਹੀਂ ਦੇਖਿਆ ਕਿ ਮੰਚ 'ਤੇ ਕੌਣ-ਕੌਣ ਬੈਠ ਰਿਹਾ ਹੈ ਜਾਂ ਨਹੀਂ।”
“ਭੱਟ ਬਾਰੇ ਪਤਾ ਨਹੀਂ ਕਰ ਸਕਿਆ ਕਿ ਮੈਨੂੰ ਨਹੀਂ ਪਤਾ ਕਿ, ਉਹ (ਭੱਟ) ਸਮਾਗਮ ਵਿੱਚ ਮੌਜੂਦ ਸੀ ਜਾਂ ਨਹੀਂ।"
ਦਾਹੋਦ ਦੇ ਜ਼ਿਲ੍ਹਾ ਪ੍ਰਸ਼ਾਸਨ ਦੇ ਅਧਿਕਾਰੀਆਂ ਮੁਤਾਬਕ, ਉਹ ਇਸ ਗੱਲ ਤੋਂ ‘ਅਣਜਾਣ’ ਹਨ ਕਿ ਭੱਟ ਨੂੰ ਸਮਾਗਮ ਵਿੱਚ ਕਿਸਨੇ ਬੁਲਾਇਆ ਸੀ।
ਬਿਲਕਿਸ ਬਾਨੋ ਬਲਾਤਕਾਰ ਮਾਮਲਾ ਤੇ ਦੋਸ਼ੀ ਸ਼ੈਲੇਸ਼ ਭੱਟ
- ਗੁਜਰਾਤ ਵਿੱਚ 2002 ਦੇ ਦੰਗਿਆਂ ਦੌਰਾਨ ਬਿਲਕਿਸਬਾਨੋ ਦੇ ਪਰਿਵਾਰ ਦੇ 14 ਮੈਂਬਰਾਂ ਦੀ ਹੱਤਿਆ ਕਰ ਦਿੱਤੀ ਗਈ ਸੀ ਅਤੇ ਸਮੂਹਿਕ ਬਲਾਤਕਾਰ ਕੀਤਾ ਗਿਆ ਸੀ।
- ਉਸ ਸਮੇਂ ਬਿਲਕਿਸ ਦੀ ਉਮਰ 20 ਸਾਲ ਦੇ ਕਰੀਬ ਸੀ। ਮਰਨ ਵਾਲਿਆਂ ਵਿੱਚ ਬਿਲਕਿਸ ਦੀ ਧੀ ਵੀ ਸੀ। ਬਿਲਕਿਸ ਉਸ ਸਮੇਂ ਗਰਭਵਤੀ ਸਨ।
- ਇਸ ਘਟਨਾ ਤੋਂ ਬਾਅਦ ਕੁਝ ਪੁਲਿਸ ਵਾਲਿਆਂ ਨੇ ਬਿਲਕਿਸ ਨੂੰ ਡਰਾ ਧਮਕਾ ਕੇ ਸਬੂਤ ਨਸ਼ਟ ਕਰਨ ਦੀ ਕੋਸ਼ਿਸ਼ ਕੀਤੀ।
- ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਦੀਆਂ ਲਾਸ਼ਾਂ ਨੂੰ ਬਿਨਾਂ ਪੋਸਟਮਾਰਟਮ ਦੇ ਦਫ਼ਨਾਇਆ ਗਿਆ।
- ਪਹਿਲੀ ਗ੍ਰਿਫ਼ਤਾਰੀ 2004 ਵਿੱਚ ਸੁਪਰੀਮ ਕੋਰਟ ਵੱਲੋਂ ਕੇਸ ਸੀਬੀਆਈ ਨੂੰ ਸੌਂਪੇ ਜਾਣ ਤੋਂ ਬਾਅਦ ਹੋਈ ਸੀ।
- ਸਾਲ 2008 ਵਿੱਚ ਮੁੰਬਈ ਦੀ ਇੱਕ ਵਿਸ਼ੇਸ਼ ਸੀਬੀਆਈ ਅਦਾਲਤ ਨੇ ਇਸ ਮਾਮਲੇ ਵਿੱਚ ਇਨ੍ਹਾਂ 11 ਲੋਕਾਂ ਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਈ ਸੀ।
- 5 ਅਗਸਤ, 2022 ਨੂੰ ਇਨ੍ਹਾਂ 11 ਦੋਸ਼ੀਆਂ ਨੂੰ ਗੋਧਰਾ ਜੇਲ੍ਹ ਤੋਂ ਰਿਹਾਅ ਕਰ ਦਿੱਤਾ ਗਿਆ ਸੀ।
- ਦੋਸ਼ੀਆਂ ਵਿੱਚੋਂ ਇੱਕ ਸ਼ੈਲੇਸ਼ ਭੱਟ ਨੂੰ ਗੁਜਰਾਤ ਦੇ ਇੱਕ ਪਿੰਡ ਵਿੱਚ ਭਾਜਪਾ ਆਗੂਆਂ ਨਾਲ ਸਟੇਜ ’ਤੇ ਦੇਖੇ ਜਾਣ ਤੋਂ ਬਾਅਦ ਚਰਚਾ ਛਿੜ ਗਈ ਹੈ
ਅਜਿਹਾ ਪਹਿਲੀ ਵਾਰ ਨਹੀਂ ਹੋਇਆ-ਯਾਕੂਬ
ਇਸ ਘਟਨਾ ਤੋਂ ਬਾਅਦ ਬੀਬੀਸੀ ਨੇ ਬਿਲਕਿਸ ਬਾਨੋ ਦੇ ਪਤੀ ਯਾਕੂਬ ਪਟੇਲ ਨਾਲ ਗੱਲ ਕੀਤੀ। ਉਹ ਦਾਹੋਦ ਵਿੱਚ ਇੱਕ ਸੰਯੁਕਤ ਪਰਿਵਾਰ ਵਿੱਚ ਰਹਿੰਦੇ ਹਨ। ਗੁਜ਼ਾਰਾ ਚਲਾਉਣ ਲਈ ਛੋਟੀ-ਮੋਟੀ ਨੌਕਰੀ ਕਰਦੇ ਹਨ।
ਉਨ੍ਹਾਂ ਨੇ ਬੀਬੀਸੀ ਨੂੰ ਦੱਸਿਆ, “ਅਸੀਂ ਸਾਰੇ ਮਾਨਸਿਕ ਸਦਮੇ ਵਿੱਚ ਹਾਂ। ਇਹ ਤਸਵੀਰਾਂ ਸਾਰਿਆਂ ਲਈ ਸਬੂਤ ਹਨ ਕਿ ਇਹ ਸਰਕਾਰ ਇਨ੍ਹਾਂ ਦੋਸ਼ੀਆਂ ਦੇ ਨਾਲ ਹੈ।”
ਬਿਲਕਿਸ ਬਾਨੋ ਆਪਣੇ ਪਰਿਵਾਰਕ ਮੈਂਬਰਾਂ ਨਾਲ ਰਮਜ਼ਾਨ ਦੇ ਮਹੀਨੇ ਵਿੱਚ ਰੋਜ਼ੇ ਰੱਖ ਰਹੇ ਹਨ। ਇਨ੍ਹਾਂ ਤਸਵੀਰਾਂ ਨੇ ਉਨ੍ਹਾਂ ਦੀ ਸਿਹਤ ਨੂੰ ਵੀ ਪ੍ਰਭਾਵਿਤ ਕੀਤਾ ਹੈ।
ਉਨ੍ਹਾਂ ਦੇ ਪਤੀ ਯਾਕੂਬ ਪਟੇਲ ਨੇ ਕਿਹਾ, ''ਇਨ੍ਹਾਂ ਤਸਵੀਰਾਂ ਨੂੰ ਦੇਖਣ ਤੋਂ ਬਾਅਦ ਬਿਲਕਿਸ ਦੀ ਸਿਹਤ ਠੀਕ ਨਹੀਂ ਹੈ। ਸਿਰਫ਼ ਅਸੀਂ ਹੀ ਜਾਣਦੇ ਹਾਂ ਕਿ ਅਸੀਂ ਕਿਵੇਂ ਦਿਨ-ਰਾਤ ਸਹਿਮਕੇ ਗੁਜ਼ਾਰਦੇ ਹਾਂ। ਅਸੀਂ ਸਾਰੇ ਡਰੇ ਰਹਿੰਦੇ ਹਾਂ ਕਿ ਸਾਡੇ ਨਾਲ ਕਿਸੇ ਵੀ ਸਮੇਂ ਕੁਝ ਵੀ ਹੋ ਸਕਦਾ ਹੈ।”
ਦੋਸ਼ੀਆਂ ਦੀ ਰਿਹਾਈ ਦੇ ਮਾਮਲੇ 'ਚ ਸੁਪਰੀਮ ਕੋਰਟ ਨੇ ਗੁਜਰਾਤ ਸਰਕਾਰ ਨੂੰ ਉਸ ਨੀਤੀ ਦੀ ਵਿਆਖਿਆ ਕਰਨ ਲਈ ਕਿਹਾ ਹੈ, ਜਿਸ ਤਹਿਤ ਪਿਛਲੇ ਸਾਲ ਅਗਸਤ 'ਚ ਸੂਬਾ ਸਰਕਾਰ ਨੇ ਬਿਲਕਿਸ ਬਾਨੋ ਮਾਮਲੇ ਦੇ ਦੋਸ਼ੀਆਂ ਨੂੰ ਰਿਹਾਅ ਕਰ ਦਿੱਤਾ ਸੀ।
ਯਾਕੂਬ ਨੇ ਕਿਹਾ, ''ਮੈਨੂੰ ਖੁਸ਼ੀ ਹੈ ਕਿ ਸੁਪਰੀਮ ਕੋਰਟ ਸਾਡੀ ਪਟੀਸ਼ਨ 'ਤੇ ਸੁਣਵਾਈ ਲਈ ਰਾਜ਼ੀ ਹੋਈ ਹੈ। ਸਾਨੂੰ ਨਿਆਂਪਾਲਿਕਾ ਤੋਂ ਬਹੁਤ ਉਮੀਦਾਂ ਹਨ।”
ਤਸਵੀਰ ਸਰੋਤ, Getty Images
ਕੀ ਇਹ ਦੋਸ਼ੀ ਭਾਜਪਾ ਵਿੱਚ ਸ਼ਾਮਿਲ ਹੋ ਗਏ ਹਨ?
ਰੰਧਿਕਪੁਰ ਦੇ ਸਥਾਨਕ ਲੋਕਾਂ ਦੀ ਮੰਨੀਏ ਤਾਂ ਬਿਲਕਿਸ ਬਾਨੋ ਮਾਮਲੇ ਦੇ ਸਾਰੇ 11 ਦੋਸ਼ੀ ਕਈ ਸਾਲਾਂ ਤੋਂ ਭਾਜਪਾ ਅਤੇ ਆਰਐੱਸਐੱਸ 'ਚ ਨਾਲ ਹਨ। ਪਰ ਪਾਰਟੀ ਦੇ ਕਿਸੇ ਅਧਿਕਾਰੀ ਨੇ ਇਸ ਬਾਰੇ ਕੋਈ ਪੁਸ਼ਟੀ ਨਹੀਂ ਕੀਤੀ ਹੈ।
ਦਾਹੋਦ ਭਾਜਪਾ ਦੇ ਪ੍ਰਧਾਨ ਸ਼ੰਕਰ ਅਮਲੀਆਰ ਨੇ ਕਿਹਾ, "ਭੱਟ ਅਧਿਕਾਰਤ ਤੌਰ 'ਤੇ ਭਾਜਪਾ ਵਿੱਚ ਸ਼ਾਮਲ ਨਹੀਂ ਹੋਏ ਹਨ ਅਤੇ ਨਾ ਹੀ ਕਿਸੇ ਹੋਰ ਦੋਸ਼ੀ ਨੇ ਪਾਰਟੀ ਵਿੱਚ ਸ਼ਾਮਲ ਹੋਣ ਵਿੱਚ ਦਿਲਚਸਪੀ ਦਿਖਾਈ ਹੈ।"
ਉਨ੍ਹਾਂ ਕਿਹਾ ਕਿ ਪਾਰਟੀ ਨੇ ਸ਼ੈਲੇਸ਼ ਭੱਟ ਨੂੰ ਇਸ ਪ੍ਰੋਗਰਾਮ 'ਚ ਨਹੀਂ ਬੁਲਾਇਆ ਸੀ ਪਰ ਹੋ ਸਕਦਾ ਹੈ ਕਿ ਉਹ ਆਮ ਆਦਮੀ ਵਜੋਂ ਪ੍ਰੋਗਰਾਮ 'ਚ ਸ਼ਾਮਲ ਹੋਏ ਹੋਣ, ਜੋ ਸਾਡੇ ਵੱਸ 'ਚ ਨਹੀਂ ਹੈ।
ਦਾਹੋਦ ਜ਼ਿਲ੍ਹੇ ਵਿੱਚ ਭਾਜਪਾ ਦੇ ਇੱਕ ਹੋਰ ਪ੍ਰਮੁੱਖ ਆਗੂ ਨਰਿੰਦਰ ਸੋਨੀ ਨੇ ਕਿਹਾ ਕਿ ਇਹ ਲੋਕਾਂ ਲਈ ਆਯੋਜਿਤ ਇੱਕ ਜਨਤਕ ਸਮਾਗਮ ਸੀ, ਜਿਸ ਵਿੱਚ ਭੱਟ ਸਮੇਤ ਕਈ ਹੋਰ ਲੋਕਾਂ ਨੇ ਸ਼ਿਰਕਤ ਕੀਤੀ ਸੀ।
ਇਹ ਪੁੱਛੇ ਜਾਣ 'ਤੇ ਕਿ ਕੀ ਭੱਟ ਨੂੰ ਮੰਚ 'ਤੇ ਅਗਲੀ ਕਤਾਰ 'ਚ ਬੈਠਣ ਲਈ ਉਨ੍ਹਾਂ ਨੇ ਕਿਹਾ ਸੀ। ਉਨ੍ਹਾਂ ਕਿਹਾ, "ਮੈਨੂੰ ਨਹੀਂ ਪਤਾ ਕਿਉਂਕਿ ਮੈਂ ਸਮਾਗਮ ਵਿੱਚ ਮੌਜੂਦ ਨਹੀਂ ਸੀ।"
ਬੀਬੀਸੀ ਨੇ ਭਾਜਪਾ ਦੇ ਸੰਸਦ ਮੈਂਬਰ ਜਸਵੰਤਸੀਂਹ ਭਾਭੋਰ ਅਤੇ ਲਿਮਖੇੜਾ ਦੇ ਵਿਧਾਇਕ ਸ਼ੈਲੇਸ਼ ਭਾਭੋਰ ਨਾਲ ਵੀ ਕਈ ਵਾਰ ਗੱਲ ਕਰਨ ਦੀ ਕੋਸ਼ਿਸ਼ ਕੀਤੀ ਪਰ ਦੋਵਾਂ ਨੇ ਕਈ ਕੋਸ਼ਿਸ਼ਾਂ ਦੇ ਬਾਵਜੂਦ ਗੱਲ ਨਹੀਂ ਕੀਤੀ।
ਤਸਵੀਰ ਸਰੋਤ, DAXESH SHAH
ਇਸ ਘਟਨਾ ਬਾਰੇ ਸ਼ੈਲੇਸ਼ ਭਾਭੋਰ ਨੇ ਕੁਝ ਦਿਨ ਪਹਿਲਾਂ ਅੰਗਰੇਜ਼ੀ ਅਖਬਾਰ ਇੰਡੀਅਨ ਐਕਸਪ੍ਰੈਸ ਨੂੰ ਦੱਸਿਆ ਸੀ ਕਿ ਵਿਧਾਇਕ ਹੋਣ ਦੇ ਨਾਤੇ ਉਨ੍ਹਾਂ ਨੂੰ ਇਸ ਗੱਲ ਦੀ ਜਾਣਕਾਰੀ ਨਹੀਂ ਸੀ ਕਿ ਇਸ ਪ੍ਰੋਗਰਾਮ ਵਿੱਚ ਕੌਣ ਕੌਣ ਹਿੱਸਾ ਲੈ ਰਿਹਾ ਹੈ।
ਉਂਝ ਇਹ ਪਹਿਲੀ ਵਾਰ ਨਹੀਂ ਹੈ, ਜਦੋਂ ਦੋਸ਼ੀਆਂ ਨੂੰ ਭਾਜਪਾ ਆਗੂਆਂ ਨਾਲ ਦੇਖਿਆ ਗਿਆ ਹੋਵੇ।
ਬਿਲਕਿਸ ਬਾਨੋ ਦੇ ਪਤੀ ਯਾਕੂਬ ਪਟੇਲ ਨੇ ਕਿਹਾ, "ਇਹ ਪਹਿਲੀ ਵਾਰ ਨਹੀਂ ਹੈ ਜਦੋਂ ਸ਼ੈਲੇਸ਼ ਭੱਟ ਨੂੰ ਭਾਜਪਾ ਆਗੂਆਂ ਨਾਲ ਦੇਖਿਆ ਗਿਆ ਹੈ।"
ਜਸਵੰਤਸੀਂਹ ਭਾਭੌਰ ਦੇ ਫ਼ੇਸਬੁੱਕ ਅਕਾਊਂਟ ਦਾ ਸਕਰੀਨ ਸ਼ਾਟ ਦਿਖਾਉਂਦੇ ਹੋਏ ਯਾਕੂਬ ਨੇ ਕਿਹਾ ਕਿ ਭਾਭੌਰ ਅਤੇ ਭੱਟ ਨੂੰ 2020 ਵਿੱਚ ਵੀ ਇੱਕ ਪ੍ਰੋਗਰਾਮ ਵਿੱਚ ਦੇਖਿਆ ਗਿਆ ਸੀ। ਉਸ ਸਮੇਂ ਸ਼ੈਲੇਸ਼ ਭੱਟ ਪੈਰੋਲ 'ਤੇ ਜੇਲ੍ਹ ਤੋਂ ਬਾਹਰ ਸਨ।
ਯਾਕੂਬ ਨੇ ਕਿਹਾ, "ਅਜਿਹੀਆਂ ਬਹੁਤ ਸਾਰੀਆਂ ਉਦਾਹਰਣਾਂ ਹਨ, ਜਦੋਂ ਇਹ ਸਾਰੇ 11 ਲੋਕ ਅੱਜ ਵੀ ਭਾਜਪਾ ਦੇ ਪ੍ਰੋਗਰਾਮਾਂ ਵਿੱਚ ਨਜ਼ਰ ਆਉਂਦੇ ਹਨ।"
ਉਨ੍ਹਾਂ ਨੇ 2002 ਦੇ ਉਸ ਭਿਆਨਕ ਸਾਲ ਨੂੰ ਯਾਦ ਕੀਤਾ ਜਦੋਂ ਉਨ੍ਹਾਂ ਦੀ ਢਾਈ ਸਾਲ ਦੀ ਧੀ ਸਮੇਤ ਪਰਿਵਾਰ ਦੇ 14 ਮੈਂਬਰ ਮਾਰੇ ਗਏ ਸਨ।
ਯਾਕੂਬ ਪਟੇਲ ਨੇ ਕਿਹਾ, "ਇਹ 11 ਦੋਸ਼ੀ ਸ਼ੁਰੂ ਤੋਂ ਹੀ ਭਾਜਪਾ ਦਾ ਹਿੱਸਾ ਸਨ।"
ਉਨ੍ਹਾਂ ਦੱਸਿਆ ਕਿ ਸ਼ੈਲੇਸ਼ ਭੱਟ ਇਸ ਖੇਤਰ ਵਿੱਚ ਭਾਜਪਾ ਦੇ ਪ੍ਰਮੁੱਖ ਆਗੂਆਂ ਵਿੱਚੋਂ ਇੱਕ ਰਹੇ ਹਨ। ਉਹ ਲੰਬੇ ਸਮੇਂ ਤੋਂ ਰਾਸ਼ਟਰੀ ਸਵੈਮ ਸੇਵਕ ਸੰਘ ਨਾਲ ਜੁੜੇ ਹੋਏ ਹਨ।
ਮਹੂਆ ਮੋਇਤਰਾ ਨੇ ਆਲੋਚਨਾ ਕੀਤੀ
ਪੱਛਮੀ ਬੰਗਾਲ ਦੀ ਕ੍ਰਿਸ਼ਨਾਨਗਰ ਲੋਕ ਸਭਾ ਸੀਟ ਤੋਂ ਤ੍ਰਿਣਮੂਲ ਕਾਂਗਰਸ ਦੀ ਸੰਸਦ ਮੈਂਬਰ ਮਹੂਆ ਮੋਇਤਰਾ ਨੇ ਇਸ ਘਟਨਾ ਦੀ ਆਲੋਚਨਾ ਕੀਤੀ ਹੈ।
ਉਨ੍ਹਾਂ ਨੇ ਸੰਸਦ ਮੈਂਬਰ ਅਤੇ ਵਿਧਾਇਕ ਨਾਲ ਸਟੇਜ 'ਤੇ ਸ਼ੈਲੇਸ਼ ਭੱਟ ਦੀ ਮੌਜੂਦਗੀ ਦੀ ਤਸਵੀਰ ਟਵੀਟ ਕੀਤੀ ਅਤੇ ਲਿਖਿਆ, "ਬਿਲਕਿਸਬਾਨੋ ਬਲਾਤਕਾਰੀ ਗੁਜਰਾਤ ਭਾਜਪਾ ਦੇ ਵਿਧਾਇਕ ਨਾਲ ਸਟੇਜ 'ਤੇ।"
ਉਨ੍ਹਾਂ ਨੇ ਅੱਗੇ ਲਿਖਿਆ, "ਮੈਂ ਇਨ੍ਹਾਂ ਰਾਖਸ਼ਾ ਨੂੰ ਮੁੜ ਜੇਲ੍ਹ ਵਿੱਚ ਬੰਦ ਦੇਖਣਾ ਚਾਹੁੰਦੀ ਹਾਂ ਅਤੇ (ਜੇਲ੍ਹ ਦੀ) ਚਾਬੀ ਨੂੰ ਸੁੱਟ ਦੇਣਾ ਚਾਹੁੰਦੀ ਹਾਂ।”
“ਅਤੇ ਮੈਂ ਚਾਹੁੰਦੀ ਹਾਂ ਕਿ ਇਹ ਸ਼ੈਤਾਨੀ ਸਰਕਾਰ ਜੋ ਨਿਆਂ ਦੀ ਇਸ ਕਠੋਰਤਾ ਦੀ ਪ੍ਰਸ਼ੰਸਾ ਕਰਦੀ ਹੈ, ਨੂੰ ਸ਼ਾਸਨ ਤੋਂ ਬਾਹਰ ਕੱਢ ਦਿੱਤਾ ਜਾਵੇ। ਮੈਂ ਚਾਹੁੰਦੀ ਹਾਂ ਕਿ ਭਾਰਤ ਆਪਣਾ ਨੈਤਿਕ ਮਾਪਦੰਡ ਮੁੜ ਹਾਸਲ ਕਰੇ।"
ਤਸਵੀਰ ਸਰੋਤ, MAHUA MOITRA/TWITTER
ਜਸਵੰਤਸੀਂਹ ਭਾਭੋਰ ਨੇ ਵੀ ਟਵੀਟ ਕੀਤਾ
ਪੂਰੇ ਪ੍ਰੋਗਰਾਮ 'ਚ ਸ਼ੈਲੇਸ਼ ਭੱਟ ਦੀ ਮੌਜੂਦਗੀ ਤੋਂ ਜਾਣੂ ਨਾ ਹੋਣ 'ਤੇ ਦਾਹੋਦ ਤੋਂ ਭਾਜਪਾ ਦੇ ਸੰਸਦ ਮੈਂਬਰ ਜਸਵੰਤਸੀਂਹ ਭਾਭੋਰ ਨੇ ਤਸਵੀਰਾਂ ਨਾਲ ਪ੍ਰੋਗਰਾਮ ਦਾ ਵੇਰਵਾ ਟਵੀਟ ਕੀਤਾ।
ਇਨ੍ਹਾਂ ਤਸਵੀਰਾਂ 'ਚ ਸ਼ੈਲੇਸ਼ ਭੱਟ ਵੀ ਸਟੇਜ 'ਤੇ ਨਜ਼ਰ ਆ ਰਹੇ ਹਨ।
ਉਨ੍ਹਾਂ ਟਵੀਟ 'ਚ ਲਿਖਿਆ, ''ਦਾਹੋਦ ਜ਼ਿਲ੍ਹੇ ਦੇ ਲਿਮਖੇੜਾ ਤਾਲੁਕ 'ਚ 101.89 ਕਰੋੜ ਦੀ ਅੰਦਾਜ਼ਨ ਰਾਸ਼ੀ ਨਾਲ ਕਡਾਨਾ ਡੈਮ ਪਾਈਪਲਾਈਨ ਆਧਾਰਿਤ ਲਿਮਖੇੜਾ ਸਮੂਹ ਜਲ ਸਪਲਾਈ ਯੋਜਨਾ ਤਹਿਤ ਸ਼ੁਰੂ ਹੋਣ ਵਾਲੇ ਕੰਮ ਦਾ ਭੂਮੀ ਪੂਜਨ ਕੀਤਾ ਗਿਆ।”
ਤਸਵੀਰ ਸਰੋਤ, @JSBHABHOR
ਕੀ ਸੀ ਬਿਲਕਿਸ ਬਾਨੋ ਗੈਂਗਰੇਪ ਮਾਮਲਾ?
ਗੁਜਰਾਤ ਵਿੱਚ 2002 ਦੇ ਦੰਗਿਆਂ ਦੌਰਾਨ ਬਿਲਕਿਸਬਾਨੋ ਦੇ ਪਰਿਵਾਰ ਦੇ 14 ਮੈਂਬਰਾਂ ਦੀ ਹੱਤਿਆ ਕਰ ਦਿੱਤੀ ਗਈ ਸੀ ਅਤੇ ਸਮੂਹਿਕ ਬਲਾਤਕਾਰ ਕੀਤਾ ਗਿਆ ਸੀ।
ਉਸ ਸਮੇਂ ਬਿਲਕਿਸ ਦੀ ਉਮਰ 20 ਸਾਲ ਦੇ ਕਰੀਬ ਸੀ। ਮਰਨ ਵਾਲਿਆਂ ਵਿੱਚ ਬਿਲਕਿਸ ਦੀ ਧੀ ਵੀ ਸੀ।
ਬਿਲਕਿਸ ਜਿਸ ਨੂੰ ਬਲਾਤਕਾਰ ਤੋਂ ਬਾਅਦ ਗੰਭੀਰ ਹਾਲਤ ਵਿੱਚ ਛੱਡ ਦਿੱਤਾ ਗਿਆ ਸੀ, ਕਿਸੇ ਤਰੀਕੇ ਨੇੜਲੀ ਪਹਾੜੀ 'ਤੇ ਪਹੁੰਚੀ ਤੇ ਉਨ੍ਹਾਂ ਨੇ ਆਪਣੀ ਜਾਨ ਬਚਾਈ।
ਇਸ ਘਟਨਾ ਤੋਂ ਬਾਅਦ ਕੁਝ ਪੁਲਿਸ ਵਾਲਿਆਂ ਨੇ ਬਿਲਕਿਸ ਨੂੰ ਡਰਾ ਧਮਕਾ ਕੇ ਸਬੂਤ ਨਸ਼ਟ ਕਰਨ ਦੀ ਕੋਸ਼ਿਸ਼ ਕੀਤੀ।
ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਦੀਆਂ ਲਾਸ਼ਾਂ ਨੂੰ ਬਿਨਾਂ ਪੋਸਟਮਾਰਟਮ ਦੇ ਦਫ਼ਨਾਇਆ ਗਿਆ।
ਬਿਲਕਿਸ ਦੀ ਜਾਂਚ ਕਰਨ ਵਾਲੇ ਡਾਕਟਰ ਨੇ ਕਿਹਾ ਕਿ ਉਨ੍ਹਾਂ ਨਾਲ ਬਲਾਤਕਾਰ ਨਹੀਂ ਹੋਇਆ। ਬਿਲਕਿਸ ਨੂੰ ਇਸ ਮਾਮਲੇ ਵਿੱਚ ਜਾਨੋਂ ਮਾਰਨ ਦੀਆਂ ਧਮਕੀਆਂ ਵੀ ਮਿਲੀਆਂ ਹਨ।
ਹਾਲਾਂਕਿ, ਬਿਲਕਿਸ ਨੇ ਆਪਣੀ ਲੜਾਈ ਜਾਰੀ ਰੱਖੀ ਤੇ ਹਮਲਾਵਰਾਂ ਨੂੰ ਪਛਾਣ ਲਿਆ।
ਪਹਿਲੀ ਗ੍ਰਿਫ਼ਤਾਰੀ 2004 ਵਿੱਚ ਸੁਪਰੀਮ ਕੋਰਟ ਵੱਲੋਂ ਕੇਸ ਸੀਬੀਆਈ ਨੂੰ ਸੌਂਪੇ ਜਾਣ ਤੋਂ ਬਾਅਦ ਹੋਈ ਸੀ।
ਤਸਵੀਰ ਸਰੋਤ, Getty Images
ਨੈਸ਼ਨਲ ਹਿਊਮਨ ਰਾਈਟਸ ਕਮਿਸ਼ਨ ਦੀ ਮਦਦ ਨਾਲ ਬਿਲਕਿਸ ਦਾ ਕੇਸ ਮਹਾਰਾਸ਼ਟਰ ਟਰਾਂਸਫ਼ਰ ਕਰ ਦਿੱਤਾ ਗਿਆ ਅਤੇ ਦੋਸ਼ੀਆਂ ਨੂੰ ਸਜ਼ਾ ਸੁਣਾਈ ਗਈ।
ਸੁਪਰੀਮ ਕੋਰਟ ਨੇ ਬਿਲਕਿਸ ਦੀ ਇਸ ਦਲੀਲ ਨੂੰ ਸਵੀਕਾਰ ਕੀਤਾ ਸੀ ਕਿ ਗੁਜਰਾਤ ਦੀਆਂ ਅਦਾਲਤਾਂ ਨਿਆਂ ਨਹੀਂ ਦੇ ਸਕਦੀਆਂ।
ਨਿਆਂ ਲਈ 17 ਸਾਲਾਂ ਦੀ ਲੜਾਈ ਵਿੱਚ, ਬਿਲਕਿਸ ਅਤੇ ਉਸਦੇ ਪਤੀ ਯਾਕੂਬ ਰਸੂਲ ਨੂੰ ਆਪਣੇ ਪੰਜ ਬੱਚਿਆਂ ਦੇ ਨਾਲ ਦਸ ਘਰ ਬਦਲਣੇ ਪਏ।
ਬੀਬੀਸੀ ਪੱਤਰਕਾਰ ਗੀਤਾ ਪਾਂਡੇ ਨਾਲ ਇੱਕ ਇੰਟਰਵਿਊ ਵਿੱਚ ਬਿਲਕਿਸ ਨੇ ਕਿਹਾ, "ਪੁਲਿਸ ਅਤੇ ਸਿਸਟਮ ਨੇ ਹਮਲਾਵਰਾਂ ਦਾ ਸਾਥ ਦਿੱਤਾ ਹੈ। ਗੁਜਰਾਤ ਵਿੱਚ ਵੀ ਅਸੀਂ ਆਪਣਾ ਮੂੰਹ ਬੰਦ ਰੱਖਦੇ ਹਾਂ। ਅਸੀਂ ਕਿਸੇ ਨੂੰ ਆਪਣਾ ਪਤਾ ਨਹੀਂ ਦਿੰਦੇ।"
2002 ਵਿੱਚ ਜਦੋਂ ਉਸ ਨਾਲ ਸਮੂਹਿਕ ਬਲਾਤਕਾਰ ਕੀਤਾ ਗਿਆ ਤਾਂ ਬਿਲਕਿਸ ਗਰਭਵਤੀ ਸੀ। ਉਸ ਸਮੇਂ ਉਸ ਦੀ ਤਿੰਨ ਸਾਲ ਦੀ ਧੀ ਸਲੇਹਾ ਨੂੰ ਵੀ ਬੇਰਹਿਮੀ ਨਾਲ ਮਾਰ ਦਿੱਤਾ ਗਿਆ ਸੀ।
ਅੱਜ ਬਿਲਕਿਸ ਦੇ ਬੱਚਿਆਂ ਵਿੱਚ ਇੱਕ ਵੱਡੀ ਧੀ ਹਾਜਰਾ, ਇੱਕ ਹੋਰ ਧੀ ਫ਼ਾਤਿਮਾ ਅਤੇ ਉਨ੍ਹਾਂ ਦੇ ਪੁੱਤ ਯਾਸੀਨ ਦੇ ਨਾਲ-ਨਾਲ ਇੱਕ ਛੋਟੀ ਧੀ ਸਲੇਹਾ ਸ਼ਾਮਲ ਹਨ।
ਬਿਲਕਿਸ ਨੇ ਸਭ ਤੋਂ ਛੋਟੀ ਧੀ ਦਾ ਨਾਂ ਸਲੇਹਾ ਉਸ ਧੀ ਵਾਲਾ ਹੀ ਰੱਖਿਆ ਹੈ ਜਿਸ ਨੂੰ ਉਸ ਦੀਆਂ ਅੱਖਾਂ ਸਾਹਮਣੇ ਕਤਲ ਕਰ ਦਿੱਤਾ ਗਿਆ ਸੀ।
(ਬੀਬੀਸੀ ਪੰਜਾਬੀ ਨਾਲ FACEBOOK, INSTAGRAM, TWITTERਅਤੇ YouTube 'ਤੇ ਜੁੜੋ)
