ਉਹ ਪਿਤਾ, ਜਿਸ ਨੇ ਆਪਣੀ ਧੀ ਨੂੰ ਆਈਏਐੱਸ ਅਫਸਰ ਬਣਾਉਣ ਲਈ ਘਰ ਤੇ ਰਿਕਸ਼ਾ ਤੱਕ ਵੇਚ ਦਿੱਤਾ, 'ਖ਼ੁਦ ਨੂੰ ਵੇਚਣ ਤੋਂ ਵੀ ਗੁਰੇਜ਼ ਨਾ ਕਰਦਾ'
ਤਸਵੀਰ ਸਰੋਤ, Bhagyashree Raut/BBC
- ਲੇਖਕ, ਭਾਗਿਆਸ਼੍ਰੀ ਰਾਉਤ
- ਰੋਲ, ਬੀਬੀਸੀ ਸਹਿਯੋਗੀ
"ਮੈਂ ਆਪਣਾ ਘਰ ਵੇਚ ਦਿੱਤਾ, ਆਪਣਾ ਰਿਕਸ਼ਾ ਵੇਚ ਦਿੱਤਾ ਪਰ ਮੈਂ ਕੁਝ ਨਹੀਂ ਗੁਆਇਆ। ਕਿਉਂਕਿ, ਉਨ੍ਹਾਂ ਪੈਸਿਆਂ ਨਾਲ, ਮੇਰੀ ਧੀ ਇੱਕ ਵੱਡੀ ਅਫ਼ਸਰ ਬਣ ਗਈ।"
"ਭਾਵੇਂ ਮੈਨੂੰ ਆਪਣੀ ਧੀ ਨੂੰ ਆਈਏਐੱਸ ਅਫ਼ਸਰ ਬਣਾਉਣ ਲਈ ਆਪਣੇ ਆਪ ਨੂੰ ਵੇਚਣਾ ਪੈਂਦਾ, ਮੈਂ ਆਪਣੇ ਆਪ ਨੂੰ ਵੇਚ ਦਿੰਦਾ। ਪਰ, ਮੈਂ ਕਦੇ ਨਿਰਾਸ਼ ਨਾ ਹੁੰਦਾ।"
ਇਹ ਯਵਤਮਾਲ ਤੋਂ ਅਸ਼ਫਾਕ ਅਹਿਮਦ ਦੇ ਮੋਹ ਭਿੱਜੇ ਸ਼ਬਦ, ਜ਼ਿੰਦਗੀ ਪ੍ਰਤੀ ਆਸਵਾਨ ਹੋਣ ਦੀ ਤਾਕਤ ਨਾਲ ਭਰੇ ਹੋਏ ਸਨ।
ਅਸ਼ਫਾਕ ਦੀ ਧੀ ਅਦੀਬਾ ਨੇ ਯੂਨੀਅਨ ਪਬਲਿਕ ਸਰਵਿਸ ਕਮਿਸ਼ਨ ਦੀ ਪ੍ਰੀਖਿਆ ਵਿੱਚ 142ਵਾਂ ਰੈਂਕ ਪ੍ਰਾਪਤ ਕੀਤਾ ਹੈ। ਹੁਣ ਉਹ ਆਈਏਐੱਸ ਬਣ ਗਏ ਹਨ।
ਅਦੀਬਾ ਮੂਲ ਰੂਪ ਵਿੱਚ ਵਿਦਰਭ ਦੇ ਯਵਤਮਾਲ ਤੋਂ ਹਨ। ਉਨ੍ਹਾਂ ਦਾ ਪਰਿਵਾਰ ਸ਼ਹਿਰ ਦੇ ਕਲੰਬ ਚੌਕ ਵਿੱਚ ਕਿਰਾਏ ਦੇ ਮਕਾਨ ਵਿੱਚ ਰਹਿੰਦਾ ਹੈ। ਪਰਿਵਾਰ ਕੋਲ ਹੁਣ ਆਪਣਾ ਘਰ ਨਹੀਂ ਹੈ।
ਅਦੀਬਾ ਦੇ ਪਿਤਾ, ਅਸ਼ਫਾਕ ਅਹਿਮਦ, ਰਿਕਸ਼ਾ ਚਲਾ ਕੇ ਪਰਿਵਾਰ ਦਾ ਪਾਲਣ-ਪੋਸ਼ਣ ਕਰਦੇ ਹਨ। ਅਦੀਬਾ ਦੀ ਬਿਹਤਰ ਜ਼ਿੰਦਗੀ ਦੇ ਭਰੋਸੇ ਨਾਲ, ਉਨ੍ਹਾਂ ਨੇ ਅਦੀਬਾ ਦੀ ਪੜ੍ਹਾਈ ਮੁਕੰਮਲ ਕਰਵਾਉਣ ਵਿੱਚ ਜੀਅ-ਜਾਨ ਲਾਈ।
ਘੱਟ ਗਿਣਤੀ ਕਮਿਸ਼ਨ ਦੇ ਚੇਅਰਮੈਨ ਪਿਆਰੇ ਖਾਨ ਨੇ ਅਦੀਬਾ ਨੂੰ ਵਧਾਈ ਦਿੰਦੇ ਹੋਏ ਕਿਹਾ ਹੈ ਕਿ ਉਹ ਮਹਾਰਾਸ਼ਟਰ ਦੀ ਪਹਿਲੀ ਮੁਸਲਿਮ ਮਹਿਲਾ ਆਈਏਐੱਸ ਅਧਿਕਾਰੀ ਬਣੇਗੀ।
'ਮੈਂ ਆਈਏਐੱਸ ਅਫ਼ਸਰ ਨਹੀਂ ਬਣਨਾ ਚਾਹੁੰਦਾ ਸੀ, ਮੈਂ ਡਾਕਟਰ ਬਣਨਾ ਚਾਹੁੰਦਾ ਸੀ, ਪਰ...'
ਤਸਵੀਰ ਸਰੋਤ, Rais Shaikh/FB
ਅਦੀਬਾ ਦੀ ਪੜ੍ਹਾਈ ਯਵਤਮਾਲ ਦੇ ਇੱਕ ਉਰਦੂ ਮਾਧਿਅਮ ਜ਼ਿਲ੍ਹਾ ਪ੍ਰੀਸ਼ਦ ਸਕੂਲ ਵਿੱਚ ਹੋਈ ਸੀ। ਉਨ੍ਹਾਂ ਨੇ ਕਦੇ ਆਈਏਐੱਸ ਅਫ਼ਸਰ ਬਣਨ ਦਾ ਸੁਪਨਾ ਨਹੀਂ ਦੇਖਿਆ ਸੀ। ਕਿਉਂਕਿ ਪਰਿਵਾਰ ਦੀ ਆਰਥਿਕ ਸਥਿਤੀ ਬਹੁਤ ਮਾੜੀ ਹੈ।
ਪਿਤਾ ਨੇ ਅਦੀਬਾ ਨੂੰ ਰਿਕਸ਼ਾ ਚਲਾਉਣਾ ਸਿਖਾਇਆ। ਇਸ ਲਈ ਅਦੀਬਾ ਦੀ ਇੱਕੋ ਇੱਕ ਇੱਛਾ ਸੀ ਕਿ ਉਹ ਕਿਸੇ ਤਰ੍ਹਾਂ ਆਪਣੀ ਪੜ੍ਹਾਈ ਪੂਰੀ ਕਰੇ ਅਤੇ ਕਿਤੇ ਨੌਕਰੀ ਕਰੇ।
ਸ਼ੁਰੂ ਵਿੱਚ, ਉਹ ਚਾਹੁੰਦੀ ਸੀ ਕਿ ਮੈਂ ਡਾਕਟਰੀ ਦੇ ਖੇਤਰ ਵਿੱਚ ਜਾਵਾਂ। ਪਰ, ਇਸਦੇ ਲਈ ਸਰਕਾਰੀ ਕਾਲਜ ਵਿੱਚ ਦਾਖਲਾ ਲੈਣਾ ਜ਼ਰੂਰੀ ਸੀ।
ਪਰਿਵਾਰ ਦੀ ਵਿੱਤੀ ਹਾਲਤ ਇੰਨੀ ਮਾੜੀ ਸੀ ਕਿ ਕਿਸੇ ਪ੍ਰਾਈਵੇਟ ਕਾਲਜ ਤੋਂ ਡਾਕਟਰੀ ਦੀ ਸਿੱਖਿਆ ਪ੍ਰਾਪਤ ਕਰਨਾ ਸੰਭਵ ਨਹੀਂ ਸੀ।
ਇਸ ਲਈ ਅਦੀਬਾ ਨੇ ਨੀਟ ਪ੍ਰੀਖਿਆ ਲਈ ਤਿਆਰੀ ਕੀਤੀ। ਪਰ ਨਤੀਜੇ ਉਨ੍ਹਾਂ ਦੀ ਉਮੀਦ ਮੁਤਾਬਕ ਨਹੀਂ ਸਨ।
ਅਦੀਬਾ ਦਾ ਸਕੋਰ ਚੰਗਾ ਨਹੀਂ ਸੀ। ਇਸ ਲਈ ਉਨ੍ਹਾਂ ਦੇ ਸਾਹਮਣੇ ਸਵਾਲ ਇਹ ਸੀ ਕਿ ਕੀ ਕਰਨਾ ਹੈ। ਆਪਣੀ ਪਰਿਵਾਰਕ ਸਥਿਤੀ ਦੇ ਕਾਰਨ, ਉਨ੍ਹਾਂ ਲਈ ਪੜ੍ਹਾਈ ਕਰਨਾ ਅਤੇ ਨੌਕਰੀ ਕਰਨਾ ਜ਼ਰੂਰੀ ਸੀ।
ਬੀਬੀਸੀ ਮਰਾਠੀ ਨੇ ਅਦੀਬਾ ਦੇ ਸੰਘਰਸ਼ ਬਾਰੇ ਜਾਣਨ ਲਈ ਉਨ੍ਹਾਂ ਨਾਲ ਗੱਲ ਕੀਤੀ।
ਅਦੀਬਾ ਨੇ ਕਿਹਾ, "ਨੀਟ ਪ੍ਰੀਖਿਆ ਦੇ ਨਤੀਜੇ ਬਹੁਤ ਮਾੜੇ ਸਨ। ਮੈਂ ਇਸ ਕਾਰਨ ਥੋੜ੍ਹੀ ਨਿਰਾਸ਼ ਸੀ। ਪਰ, ਯਵਤਮਾਲ ਵਿੱਚ ਸੇਵਾ ਨਾਮਕ ਇੱਕ ਐੱਨਜੀਓ ਨੇ ਮੇਰੀ ਬਹੁਤ ਮਦਦ ਕੀਤੀ। ਉਨ੍ਹਾਂ ਨੇ ਮੈਨੂੰ ਸਿਵਲ ਸੇਵਾ ਦੀ ਅਹਿਮੀਅਤ ਬਾਰੇ ਯਕੀਨ ਦਿਵਾਇਆ।"
"ਮੈਂ ਸਾਰਾ ਸਮਝਿਆ ਕਿ ਮੈਂ ਯੂਪੀਐੱਸਸੀ ਪ੍ਰੀਖਿਆ ਕਿਵੇਂ ਦੇ ਸਕਦੀ ਹਾਂ। ਇਸ ਲਈ, ਉਨ੍ਹਾਂ ਨੇ ਨਾ ਸਿਰਫ਼ ਮੇਰਾ ਮਾਰਗਦਰਸ਼ਨ ਕੀਤਾ, ਸਗੋਂ ਵਿੱਤੀ ਸਹਾਇਤਾ ਵੀ ਪ੍ਰਦਾਨ ਕੀਤੀ।"
"ਉਸ ਤੋਂ ਬਾਅਦ, ਮੈਂ ਆਪਣੀ ਗ੍ਰੈਜੂਏਸ਼ਨ ਅਤੇ ਯੂਪੀਐੱਸਸੀ ਦੀ ਤਿਆਰੀ ਲਈ ਪੁਣੇ ਗਈ।"
ਅਦੀਬਾ ਕਹਿੰਦੇ ਹਨ, "ਮੈਂ ਪੁਣੇ ਵਿੱਚ ਪ੍ਰਾਈਵੇਟ ਕੋਚਿੰਗ ਲਈ। ਮੈਂ ਆਪਣੀ ਪਹਿਲੀ ਕੋਸ਼ਿਸ਼ ਵਿੱਚ ਅਸਫ਼ਲ ਰਹੀ। ਪਰ ਫਿਰ ਮੈਂ ਮੁੰਬਈ ਦੇ ਹੱਜ ਹਾਊਸ ਚਲੀ ਗਈ। ਮੈਂ ਉੱਥੋਂ ਦੂਜੀ ਵਾਰ ਪ੍ਰੀਖਿਆ ਦਿੱਤੀ। ਇਸ ਵਾਰ ਵੀ ਮੈਂ ਨਿਰਾਸ਼ ਹੀ ਸੀ।"
"ਉਸ ਤੋਂ ਬਾਅਦ, ਮੈਂ ਦਿੱਲੀ ਦੇ ਜਾਮੀਆ ਮਿਲੀਆ ਇਸਲਾਮੀਆ ਗਈ ਅਤੇ ਸਖ਼ਤ ਮਿਹਨਤ ਨਾਲ ਪੜ੍ਹਾਈ ਸ਼ੁਰੂ ਕਰ ਦਿੱਤੀ। ਹੁਣ ਮੈਨੂੰ ਚੌਥੀ ਕੋਸ਼ਿਸ਼ 'ਤੇ ਚੰਗਾ ਨਤੀਜਾ ਮਿਲਿਆ।"
ਅਦੀਬਾ ਨੇ ਖ਼ੁਸ਼ ਹੋ ਕਿਹਾ,"ਅੰਮੀ ਅਤੇ ਅੱਬੂ ਮੇਰਾ 142ਵਾਂ ਰੈਂਕ ਦੇਖ ਕੇ ਬਹੁਤ ਮਾਣ ਮਹਿਸੂਸ ਕਰ ਰਹੇ ਹਨ।"
"ਮੈਂ ਆਪਣੇ ਮਾਪਿਆਂ ਅਤੇ ਉਨ੍ਹਾਂ ਸਾਰਿਆਂ ਦੀ ਬਹੁਤ ਧੰਨਵਾਦੀ ਹਾਂ ਜਿਨ੍ਹਾਂ ਨੇ ਮੈਨੂੰ ਇਸ ਸਫਲਤਾ ਨੂੰ ਹਾਸਿਲ ਕਰਨ ਵਿੱਚ ਮਦਦ ਕੀਤੀ।"
ਅਦੀਬਾ ਕਹਿੰਦੇ ਹਨ,"ਮੈਂ ਆਪਣੇ ਮਾਪਿਆਂ ਦਾ ਮੇਰੇ ਲਈ ਕੀਤੀਆਂ ਕੁਰਬਾਨੀਆਂ ਲਈ ਜਿੰਨਾ ਧੰਨਵਾਦ ਕਰਾਂ, ਉਹ ਬਹੁਤ ਘੱਟ ਹੋਵੇਗਾ। ਮੇਰੀ ਉਨ੍ਹਾਂ ਪ੍ਰਤੀ ਇੱਕ ਜ਼ਿੰਮੇਵਾਰੀ ਹੈ।"
"ਪਰ, ਹੁਣ ਜਦੋਂ ਮੈਂ ਨੌਕਰੀ ਸ਼ੁਰੂ ਕਰ ਦਿੱਤੀ, ਤਾਂ ਮੇਰੇ ਉੱਤੇ ਸਮਾਜ ਪ੍ਰਤੀ ਇੱਕ ਵੱਡੀ ਜ਼ਿੰਮੇਵਾਰੀ ਹੋਵੇਗੀ।"
ਅਦੀਬਾ ਨੇ ਬਹੁਤ ਦ੍ਰਿੜਤਾ ਨਾਲ ਕਿਹਾ,"ਮੈਂ ਸਾਰੀਆਂ ਜ਼ਿੰਮੇਵਾਰੀਆਂ ਨੂੰ ਸਭ ਤੋਂ ਵਧੀਆ ਢੰਗ ਨਾਲ ਨਿਭਾਉਣ ਦੀ ਕੋਸ਼ਿਸ਼ ਕਰਾਂਗੀ।"
'ਮੈਂ ਵੀ ਆਪਣੇ ਆਪ ਨੂੰ ਵੇਚ ਦਿੱਤਾ ਹੁੰਦਾ'
ਤਸਵੀਰ ਸਰੋਤ, Getty Images
ਅਦੀਬਾ ਦੇ ਪਿਤਾ ਦੀ ਆਰਥਿਕ ਸਥਿਤੀ ਬਹੁਤ ਮਾੜੀ ਸੀ। ਇਸ ਲਈ, ਉਨ੍ਹਾਂ ਨੂੰ ਆਪਣੀ ਧੀ ਦੀ ਪੜ੍ਹਾਈ ਦਾ ਖਰਚਾ ਚੁੱਕਣ ਲਈ ਆਪਣਾ ਘਰ ਵੇਚਣਾ ਪਿਆ।
ਉਨ੍ਹਾਂ ਨੇ ਆਪਣੀ ਧੀ ਦੀ ਪੜ੍ਹਾਈ ਲਈ ਆਪਣਾ ਰਿਕਸ਼ਾ ਵੀ ਵੇਚ ਦਿੱਤਾ, ਜੋ ਅਸਲ ਵਿੱਚ ਉਨ੍ਹਾਂ ਦੀ ਰੋਜ਼ੀ ਦਾ ਸਾਧਨ ਸੀ।
ਅਸ਼ਫਾਕ ਅਹਿਮਦ ਕਹਿੰਦੇ ਹਨ, "ਮੈਂ ਆਪਣੀ ਧੀ ਦੀ ਪੜ੍ਹਾਈ ਉੱਤੇ ਜਿੰਨੇ ਵੀ ਪੈਸੇ ਖਰਚ ਕੀਤੇ, ਉਨ੍ਹਾਂ ਦਾ ਮੁੱਲ੍ਹ ਪੈ ਗਿਆ। ਜਦੋਂ ਵੀ ਅਦੀਬਾ ਦਾ ਫ਼ੋਨ ਆਇਆ ਕਿ ਮੈਨੂੰਪੜ੍ਹਾਈ ਲਈ ਪੈਸੇ ਦੀ ਲੋੜ ਹੈ, ਤਾਂ ਮੈਂ ਉਸ ਨੂੰ ਕਿਹਾ ਕਿ ਮੇਰੇ ਕੋਲ ਪੈਸੇ ਹਨ।"
"ਉਸ ਸਮੇਂ ਮੇਰੇ ਕੋਲ ਪੈਸੇ ਨਹੀਂ ਸਨ। ਪਰ, ਮੈਂ ਉਸ ਨੂੰ ਇਸ ਗੱਲ ਦਾ ਅਹਿਸਾਸ ਨਹੀਂ ਹੋਣ ਦਿੱਤਾ। ਕਿਉਂਕਿ, ਉਸਦੀ ਪੜ੍ਹਾਈ ਪ੍ਰਭਾਵਿਤ ਨਹੀਂ ਹੋਣੀ ਚਾਹੀਦੀ।"
"ਮੈਂ ਆਪਣੀ ਧੀ ਨੂੰ ਆਈਏਐੱਸ ਅਫਸਰ ਬਣਾਉਣ ਲਈ ਆਪਣੇ ਪਰਿਵਾਰ ਦਾ ਗੁਜ਼ਾਰਾ ਤੋਰਨ ਲਈ ਵਰਤਿਆ ਜਾਣ ਵਾਲਾ ਰਿਕਸ਼ਾ ਵੀ ਵੇਚ ਦਿੱਤਾ।"
ਅਸ਼ਫਾਕ ਮਾਣ ਨਾਲ ਕਹਿੰਦੇ ਹਨ, "ਮੈਂ ਲੋਕਾਂ ਤੋਂ ਬਹੁਤ ਕੁਝ ਉਧਾਰ ਲਿਆ। ਇਸ ਸਭ ਦੇ ਬਾਵਜੂਦ, ਮੇਰੀ ਧੀ ਨੂੰ ਚੰਗੇ ਨਤੀਜੇ ਨਹੀਂ ਮਿਲੇ, ਪਰ ਮੈਂ ਨਿਰਾਸ਼ ਨਹੀਂ ਹੋਇਆ। ਮੈਨੂੰ ਵਿਸ਼ਵਾਸ ਸੀ ਕਿ ਮੇਰੀ ਧੀ ਇੱਕ ਦਿਨ ਆਈਏਐੱਸ ਅਫ਼ਸਰ ਬਣੇਗੀ ਅਤੇ ਅਸੀਂ ਉਸ ਨੂੰ ਹਰ ਵਾਰ ਇਹੀ ਉਮੀਦ ਦਿੱਤੀ।"
ਅੰਤ ਵਿੱਚ, ਜਿਗਰ ਮੁਰਾਦਾਬਾਦੀ ਦੀ ਇੱਕ ਕਵਿਤਾ ਦਾ ਹਵਾਲਾ ਦਿੰਦੇ ਹੋਏ, ਉਨ੍ਹਾਂ ਨੇ ਦੱਸਿਆ ਕਿ ਉਨ੍ਹਾਂ ਨੇ ਸਥਿਤੀ ਦਾ ਸਾਹਮਣਾ ਕਿਵੇਂ ਕੀਤਾ ਅਤੇ ਇਸ ਤੋਂ ਹਾਸਿਲ ਕੀ ਕੀਤਾ।
ਤਸਵੀਰ ਸਰੋਤ, Sanjay Uttamrao Deshmukh/FB
"ਯੇ ਇਸ਼ਕ ਨਹੀਂ ਅਸਾਂ ਇਤਨਾ ਹੀ ਸਮਝ ਲੀਜੀਏ,
ਏਕ ਆਗ ਕਾ ਦਰੀਆ ਹੈ ਔਰ ਡੂਬ ਕੇ ਜਾਨਾ ਹੈ।"
"ਅਸੀਂ ਇੱਕ ਮੁਸ਼ਕਲ ਸਥਿਤੀ ਨੂੰ ਪਾਰ ਕਰ ਲਿਆ ਹੈ। ਮੈਂ ਘਰ ਵੇਚ ਦਿੱਤਾ, ਮੈਂ ਰਿਕਸ਼ਾ ਵੇਚ ਦਿੱਤਾ ਪਰ ਮੈਂ ਕੁਝ ਨਹੀਂ ਗੁਆਇਆ। ਕਿਉਂਕਿ, ਮੇਰੀ ਧੀ ਉਸ ਪੈਸੇ ਨਾਲ ਇੱਕ ਵੱਡੀ ਅਧਿਕਾਰੀ ਬਣ ਗਈ।"
ਅਸ਼ਫਾਕ ਕਹਿੰਦੇ ਹਨ, "ਜੇਕਰ ਮੈਨੂੰ ਆਪਣੀ ਧੀ ਨੂੰ ਆਈਏਐੱਸ ਅਫ਼ਸਰ ਬਣਾਉਣ ਲਈ ਆਪਣੇ ਆਪ ਨੂੰ ਵੇਚਣਾ ਪੈਂਦਾ, ਤਾਂ ਵੀ ਮੈਂ ਗੁਰੇਜ਼ ਨਾ ਕਰਦਾ। ਪਰ, ਮੈਂ ਕਦੇ ਨਿਰਾਸ਼ ਨਹੀਂ ਹੁੰਦਾ।"
ਅਸ਼ਫਾਕ ਦੇ ਦੋ ਹੋਰ ਬੱਚੇ ਹਨ, ਜਿਨ੍ਹਾਂ ਵਿੱਚ ਅਦੀਬਾ ਵੀ ਸ਼ਾਮਲ ਹੈ। ਵੱਡਾ ਪੁੱਤਰ ਐੱਮਪੀਐੱਸਸੀ ਦੀ ਤਿਆਰੀ ਕਰ ਰਿਹਾ ਹੈ ਜਦੋਂ ਕਿ ਛੋਟਾ ਪੁੱਤਰ ਹੁਣ 12ਵੀਂ ਜਮਾਤ ਵਿੱਚ ਹੈ।
ਸੂਬੇ ਦੇ ਘੱਟ ਗਿਣਤੀ ਕਮਿਸ਼ਨ ਦੇ ਚੇਅਰਮੈਨ ਪਿਆਰੇ ਖਾਨ ਨੇ ਸੋਸ਼ਲ ਮੀਡੀਆ 'ਤੇ ਇੱਕ ਪੋਸਟ ਸਾਂਝੀ ਕਰਦਿਆਂ ਕਿਹਾ, "ਯਵਤਮਾਲ ਜ਼ਿਲ੍ਹੇ ਦੀ ਆਦਿਬਾ ਅਨਮ ਅਸ਼ਫਾਕ ਅਹਿਮਦ ਨੇ ਯੂਪੀਐੱਸਸੀ 2024 ਵਿੱਚ 142ਵਾਂ ਰੈਂਕ ਪ੍ਰਾਪਤ ਕਰਕੇ ਇੱਕ ਅਜਿਹੀ ਉਪਲਬਧੀ ਹਾਸਲ ਕੀਤੀ ਹੈ ਜੋ ਮਹਾਰਾਸ਼ਟਰ ਨੂੰ ਮਾਣ ਦਿਵਾਏਗੀ।"
"ਉਹ ਮਹਾਰਾਸ਼ਟਰ ਦੀ ਪਹਿਲੀ ਮੁਸਲਿਮ ਮਹਿਲਾ ਆਈਏਐੱਸ ਅਧਿਕਾਰੀ ਬਣ ਗਈ ਹੈ। ਇਹ ਸਿਰਫ਼ ਉਸਦੀ ਨਿੱਜੀ ਪ੍ਰਾਪਤੀ ਨਹੀਂ ਹੈ, ਸਗੋਂ ਪੂਰੇ ਭਾਈਚਾਰੇ ਲਈ ਮਾਣ ਅਤੇ ਪ੍ਰੇਰਨਾ ਦਾ ਇੱਕ ਇਤਿਹਾਸਕ ਪਲ ਹੈ।"
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
