You’re viewing a text-only version of this website that uses less data. View the main version of the website including all images and videos.
ਸ਼ੂਗਰ ਦਾ ਮਹਿਜ਼ 15 ਰੁਪਏ ਵਿੱਚ ਟੈਸਟ, ਨਾ ਸੂਈ ਲਾਉਣ ਦੀ ਲੋੜ ਪਵੇਗੀ ਤੇ ਨਾ ਹੀ ਖੂਨ ਦੀ ਇੱਕ ਵੀ ਬੂੰਦ ਕੱਢੀ ਜਾਵੇਗੀ
- ਲੇਖਕ, ਅਮਰੇਂਦਰ ਯਾਰਲਾਗੱਡਾ
- ਰੋਲ, ਬੀਬੀਸੀ ਪੱਤਰਕਾਰ
ਸ਼ੂਗਰ ਦੀ ਜਾਂਚ ਕਰਨ ਦੇ ਬਹੁਤ ਸਾਰੇ ਤਰੀਕੇ ਉਪਲੱਬਧ ਹਨ।
ਹਾਲਾਂਕਿ, ਬਿਟਸ ਪਿਲਾਨੀ ਦੇ ਹੈਦਰਾਬਾਦ ਕੈਂਪਸ ਦੇ ਖੋਜਕਰਤਾਵਾਂ ਨੇ ਇੱਕ 'ਬਾਇਓਸੈਂਸਰ' ਵਿਕਸਤ ਕੀਤਾ ਹੈ ਜੋ ਘੱਟ ਕੀਮਤ 'ਤੇ ਅਤੇ ਥੋੜ੍ਹੇ ਸਮੇਂ ਵਿੱਚ ਸ਼ੂਗਰ ਦੇ ਪੱਧਰ ਦਾ ਪਤਾ ਲਗਾਉਂਦਾ ਹੈ।
ਖੋਜਕਰਤਾਵਾਂ ਦਾ ਕਹਿਣਾ ਹੈ ਕਿ ਇਹ ਟੈਸਟ ਸਿਰਫ਼ 15 ਰੁਪਏ ਵਿੱਚ ਕੀਤਾ ਜਾ ਸਕਦਾ ਹੈ ਅਤੇ ਇਸਦੇ ਲਈ ਖੂਨ ਦੀ ਇੱਕ ਵੀ ਬੂੰਦ ਲੈਣ ਦੀ ਲੋੜ ਨਹੀਂ।
ਸ਼ੂਗਰ ਦੀ ਜਾਂਚ ਲਈ, ਰਵਾਇਤੀ ਤਰੀਕਿਆਂ ਵਿੱਚ ਉਂਗਲੀ 'ਚ ਸੂਈ ਚੁਭੋ ਕੇ, ਖੂਨ ਦਾ ਨਮੂਨਾ ਲੈਣਾ ਅਤੇ ਗਲੂਕੋਜ਼ ਦੇ ਪੱਧਰ ਨੂੰ ਮਾਪਣਾ ਸ਼ਾਮਲ ਹੈ।
ਬਿਟਸ ਪਿਲਾਨੀ ਦੇ ਖੋਜਕਰਤਾਵਾਂ ਦਾ ਕਹਿਣਾ ਹੈ ਕਿ ਉਹ ਸੂਈ ਦਾ ਇਸਤੇਮਾਲ ਕੀਤੇ ਬਿਨਾਂ ਸਰੀਰ ਵਿੱਚ ਗਲੂਕੋਜ਼ ਅਤੇ ਲੈਕਟੋਜ਼ ਦੇ ਪੱਧਰ ਨੂੰ ਮਾਪ ਸਕਦੇ ਹਨ।
ਬਾਇਓਸੈਂਸਰ ਦੀ ਮਦਦ ਨਾਲ ਪਛਾਣ
ਬਿਟਸ ਪਿਲਾਨੀ, ਹੈਦਰਾਬਾਦ ਦੇ ਖੋਜਕਰਤਾਵਾਂ ਨੇ ਇੱਕ ਬਾਇਓਸੈਂਸਰ ਵਿਕਸਤ ਕੀਤਾ ਹੈ।
ਖੋਜਕਰਤਾਵਾਂ ਦਾ ਕਹਿਣਾ ਹੈ ਕਿ ਇਹ ਮਨੁੱਖੀ ਸਰੀਰ ਦੇ ਮੈਟਾਬੋਲਿਜ਼ਮ ਬਾਰੇ ਜਾਣਕਾਰੀ ਇਕੱਠੀ ਕਰਕੇ ਪ੍ਰਦਾਨ ਕਰਦਾ ਹੈ।
ਬਿਟਸ ਦੇ ਪ੍ਰੋਫੈਸਰ ਸੰਕੇਤ ਗੋਇਲ ਨੇ ਕਿਹਾ, "ਪਸੀਨੇ ਅਤੇ ਪਿਸ਼ਾਬ ਦੀ ਵਰਤੋਂ ਕਰਕੇ ਰੀਅਲ ਟਾਈਮ ਵਿੱਚ ਗਲੂਕੋਜ਼ ਅਤੇ ਲੈਕਟੋਜ਼ ਦੇ ਪੱਧਰਾਂ ਨੂੰ ਜਾਣਨਾ ਸੰਭਵ ਹੋਵੇਗਾ।''
ਬਿਰਲਾ ਇੰਸਟੀਚਿਊਟ ਆਫ਼ ਟੈਕਨਾਲੋਜੀ ਐਂਡ ਸਾਇੰਸ (ਬਿਟਸ) ਪਿਲਾਨੀ ਦੇ ਹੈਦਰਾਬਾਦ ਕੈਂਪਸ ਵਿਖੇ ਐਮਈਐਮਐਸ, ਮਾਈਕ੍ਰੋਫਲੂਇਡਿਕਸ ਐਂਡ ਨੈਨੋਇਲੈਕਟ੍ਰੋਨਿਕਸ (ਐਮਐਮਐਨਈ) ਲੈਬ ਦੇ ਪ੍ਰੋਫੈਸਰ ਸੰਕੇਤ ਗੋਇਲ ਨੇ ਇਸ ਖੋਜ ਲਈ ਮੁੱਖ ਜਾਂਚਕਰਤਾ ਵਜੋਂ ਕੰਮ ਕੀਤਾ ਹੈ।
ਪ੍ਰੋਫੈਸਰ ਡੀ. ਸ਼੍ਰੀਰਾਮ ਨੇ ਇਸ ਦੇ ਲਈ ਸਹਿ-ਮੁੱਖ ਜਾਂਚਕਰਤਾ ਵਜੋਂ ਕੰਮ ਕੀਤਾ। ਪੀਐੱਚਡੀ ਸਕਾਲਰ ਸੋਨਲ ਪਾਂਡੇ ਨੇ ਵੀ ਇਸ ਖੋਜ ਵਿੱਚ ਹਿੱਸਾ ਲਿਆ ਹੈ।
ਇਹ ਖੋਜ ਨੂੰ ਇੰਡੀਅਨ ਕੌਂਸਲ ਆਫ਼ ਮੈਡੀਕਲ ਰਿਸਰਚ (ਆਈਸੀਐਮਆਰ) ਦੇ ਸਹਿਯੋਗ ਨਾਲ ਕੀਤੀ ਗਈ ਹੈ।
ਇਹ ਤਰੀਕਾ ਕਿਵੇਂ ਕੰਮ ਕਰਦਾ ਹੈ?
ਇਹ ਬਾਇਓਸੈਂਸਰ ਇਲੈਕਟ੍ਰੋਕੈਮੀਕਲ ਸੈਂਸਿੰਗ ਉੱਤੇ ਕੰਮ ਕਰਦਾ ਹੈ।
ਇਹ ਬਾਇਓਸੈਂਸਰ, ਸੈਂਸਰਾਂ ਨਾਲ ਲੈਸ ਹੈ ਜੋ ਪੌਲੀ ਐਮਾਈਡ ਸ਼ੀਟ 'ਤੇ ਇੰਕ ਜੈੱਟ ਪ੍ਰਿੰਟਿੰਗ ਤਕਨਾਲੋਜੀ ਨਾਲ ਕੰਮ ਕਰਦੇ ਹਨ।
ਇਸ ਬਾਰੇ ਦੱਸਦਿਆਂ ਸੋਨਲ ਪਾਂਡੇ ਨੇ ਸਮਝਾਇਆ, "ਅਸੀਂ ਇਸ ਵਿੱਚ 2.5ਵੀਂ ਪੀੜ੍ਹੀ ਦੇ ਸੈਂਸਰ ਦੀ ਵਰਤੋਂ ਕੀਤੀ ਹੈ। ਇਹ ਬਾਇਓਸੈਂਸਰ ਪਸੀਨੇ ਅਤੇ ਪਿਸ਼ਾਬ ਤੋਂ ਸਰੀਰ ਵਿੱਚ ਗਲੂਕੋਜ਼ ਦੇ ਪੱਧਰਾਂ ਦਾ ਪਤਾ ਲਗਾਉਂਦਾ ਹੈ ਅਤੇ ਇਸਨੂੰ ਮਾਪਣ ਲਈ ਇੱਕ ਪੋਰਟੇਬਲ ਪੋਟੈਂਸ਼ੀਓਸਟੈਟ (ਇੱਕ ਪ੍ਰਕਾਰ ਦਾ ਪੈਮਾਨਾ) ਦੀ ਵਰਤੋਂ ਕਰਦਾ ਹੈ। ਫਿਰ ਇਹ ਇੱਕ ਸਮਾਰਟਫੋਨ ਨੂੰ ਸਿਗਨਲ ਭੇਜਦਾ ਹੈ। ਇਹ ਗਲੂਕੋਜ਼ ਅਤੇ ਲੈਕਟੋਜ਼ ਦੇ ਪੱਧਰਾਂ ਨੂੰ ਦਰਸਾਉਂਦਾ ਹੈ।"
ਉਨ੍ਹਾਂ ਕਿਹਾ ਕਿ ਇਹ ਸੈਂਸਰ ਨਾ ਸਿਰਫ਼ ਪਸੀਨੇ ਅਤੇ ਪਿਸ਼ਾਬ ਤੋਂ, ਸਗੋਂ ਟਿਸ਼ੂ ਤੋਂ ਵੀ ਗਲੂਕੋਜ਼ ਅਤੇ ਲੈਕਟੋਜ਼ ਦੇ ਪੱਧਰ ਦਾ ਪਤਾ ਲਗਾ ਸਕਦਾ ਹੈ।
ਸੋਨਲ ਪਾਂਡੇ ਨੇ ਕਿਹਾ ਕਿ ਬਾਇਓਸੈਂਸਰ ਅਤੇ ਪੋਟੈਂਸ਼ੀਓਸਟੈਟ 700 ਤੋਂ 800 ਰੁਪਏ ਵਿੱਚ ਉਪਲੱਬਧ ਹਨ ਅਤੇ ਟੈਸਟ ਦੀ ਕੀਮਤ ਸਿਰਫ 15 ਰੁਪਏ ਹੈ।
ਸਟੀਕ ਜਾਣਕਾਰੀ
ਸੋਨਲ ਪਾਂਡੇ ਨੇ ਕਿਹਾ ਕਿ ਬਾਇਓਸੈਂਸਰ ਦੀ ਵਰਤੋਂ ਕਰਕੇ ਕੀਤੇ ਗਏ ਟੈਸਟ ਦੇ ਸਟੀਕ ਨਤੀਜੇ ਸਾਹਮਣੇ ਆਏ ਹਨ।
ਉਨ੍ਹਾਂ ਸਮਝਾਇਆ, "ਬਾਇਓਸੈਂਸਰ ਨੇ ਪਸੀਨੇ ਅਤੇ ਪਿਸ਼ਾਬ ਵਿੱਚ ਗਲੂਕੋਜ਼ ਦੇ 2.6 ਮਾਈਕ੍ਰੋਮੋਲਰ ਪੱਧਰ ਦਿਖਾਏ। ਇਹ ਲੈਕਟੋਜ਼ ਵਿੱਚ 1 ਮਿਲੀਮੋਲਰ ਪੱਧਰ ਜਾਪਦਾ ਸੀ। ਇਹਨਾਂ ਦੋ ਪੱਧਰਾਂ ਦੇ ਆਧਾਰ 'ਤੇ, ਰਿਕਵਰੀ ਦਰ 96-102 ਫੀਸਦੀ ਸੀ।''
ਇਹ ਸਮਝ ਆਇਆ ਕਿ ਬਾਇਓਸੈਂਸਰ ਇੱਕੋ ਸਮੇਂ ਗਲੂਕੋਜ਼ ਅਤੇ ਲੈਕਟੋਜ਼ ਦੇ ਪੱਧਰਾਂ ਨੂੰ ਮਾਪ ਸਕਦਾ ਹੈ।
ਸੋਨਲ ਪਾਂਡੇ ਨੇ ਬੀਬੀਸੀ ਨੂੰ ਦੱਸਿਆ, "ਅਸੀਂ ਇਸ ਸਮੇਂ ਇੱਕ ਬਾਇਓਸੈਂਸਰ ਵਿਕਸਤ ਕੀਤਾ ਹੈ ਜਿਸਦੀ ਲੈਬ ਵਿੱਚ ਜਾਂਚ ਕੀਤੀ ਜਾ ਸਕਦੀ ਹੈ। ਇਸ ਦੇ ਲਈ ਜੋ ਵੀ ਸਹਿਯੋਗ ਸਾਨੂੰ ਮਿਲੇਗਾ, ਉਸਦੇ ਅਧਾਰ 'ਤੇ ਅਸੀਂ ਇਸਨੂੰ ਵਪਾਰਕ ਪੱਧਰ 'ਤੇ ਲਿਆਉਣ ਦੀ ਯੋਜਨਾ ਬਣਾ ਰਹੇ ਹਾਂ।''
ਪ੍ਰੋਫੈਸਰ ਡੀ. ਸ਼੍ਰੀਰਾਮ ਨੇ ਕਿਹਾ ਕਿ ਦੁਨੀਆਂ ਭਰ ਵਿੱਚ ਸ਼ੂਗਰ ਦੇ ਮਰੀਜ਼ਾਂ ਦੀ ਗਿਣਤੀ ਵਧ ਰਹੀ ਹੈ ਅਤੇ ਇਸਨੂੰ ਇਸੇ ਅਧਾਰ 'ਤੇ ਤਿਆਰ ਕੀਤਾ ਗਿਆ ਹੈ ਕਿ ਸ਼ੂਗਰ ਦੀ ਜਾਂਚ ਲਈ ਲੋਕਾਂ 'ਤੇ ਪੈਂਦੇ ਵਿੱਤੀ ਬੋਝ ਨੂੰ ਘੱਟ ਕੀਤਾ ਜਾ ਸਕੇ।
ਪ੍ਰੋਫੈਸਰ ਡੀ. ਸ਼੍ਰੀਰਾਮ ਨੇ ਕਿਹਾ, "ਸਾਡਾ ਉਦੇਸ਼ ਸੂਈਆਂ ਦੀ ਲੋੜ ਤੋਂ ਬਿਨਾਂ ਘੱਟ ਕੀਮਤ 'ਤੇ ਬਾਇਓਮਾਰਕਰ ਤਿਆਰ ਕਰਨਾ ਹੈ। ਅਸੀਂ ਉਸ ਲੋੜ ਨੂੰ ਪੂਰਾ ਕਰਨ ਲਈ ਇੱਕ ਬਾਇਓਸੈਂਸਰ ਵਿਕਸਤ ਕੀਤਾ ਹੈ।''
ਬੀਆਈਟੀਐਸ ਖੋਜਕਰਤਾਵਾਂ ਦੀ ਖੋਜ ਦੇ ਨਤੀਜੇ 'ਐਲਸੇਵੀਅਰ ਜਰਨਲ' ਵਿੱਚ ਪ੍ਰਕਾਸ਼ਿਤ ਕੀਤੇ ਗਏ ਹਨ।
2022 ਤੱਕ 83 ਕਰੋੜ ਲੋਕਾਂ ਤੱਕ ਪਹੁੰਚ
ਸਰੀਰ ਵਿੱਚ ਇਨਸੁਲਿਨ ਦੇ ਪੱਧਰ ਵਿੱਚ ਕਮੀ ਕਾਰਨ ਸ਼ੂਗਰ ਰੋਗ ਹੁੰਦਾ ਹੈ।
ਜਦੋਂ ਪੈਨਕ੍ਰੀਆਜ਼ ਸਹੀ ਮਾਤਰਾ ਵਿੱਚ ਇਨਸੁਲਿਨ ਪੈਦਾ ਨਹੀਂ ਕਰਦਾ, ਤਾਂ ਖੂਨ ਵਿੱਚ ਗਲੂਕੋਜ਼ (ਸ਼ੂਗਰ) ਦਾ ਪੱਧਰ ਵਧ ਜਾਂਦਾ ਹੈ।
ਜੇਕਰ ਸਹੀ ਮਾਤਰਾ ਵਿੱਚ ਇਨਸੁਲਿਨ ਪੈਦਾ ਹੁੰਦਾ ਹੈ, ਤਾਂ ਖੂਨ ਵਿੱਚ ਗਲੂਕੋਜ਼ ਦਾ ਪੱਧਰ ਕੰਟਰੋਲ ਵਿੱਚ ਰਹਿੰਦਾ ਹੈ।
ਸ਼ੂਗਰ ਸਮੇਂ ਦੇ ਨਾਲ ਸਰੀਰ ਵਿੱਚ ਵੱਖ-ਵੱਖ ਪ੍ਰਣਾਲੀਆਂ ਨੂੰ ਪ੍ਰਭਾਵਿਤ ਕਰ ਸਕਦੀ ਹੈ, ਜਿਸ ਵਿੱਚ ਨਸਾਂ, ਖੂਨ ਦੀਆਂ ਨਾੜੀਆਂ ਅਤੇ ਖੂਨ ਦੀ ਸਪਲਾਈ ਪ੍ਰਣਾਲੀ ਸ਼ਾਮਲ ਹੈ।
ਵਿਸ਼ਵ ਸਿਹਤ ਸੰਗਠਨ ਦੇ ਅਨੁਸਾਰ, 1990 ਵਿੱਚ ਦੁਨੀਆਂ ਭਰ ਵਿੱਚ 200 ਮਿਲੀਅਨ ਲੋਕ ਸ਼ੂਗਰ ਤੋਂ ਪੀੜਤ ਸਨ, ਅਤੇ ਇਹ ਗਿਣਤੀ 2022 ਤੱਕ 830 ਮਿਲੀਅਨ ਤੱਕ ਪਹੁੰਚ ਗਈ ਹੈ।
ਅੰਤਰਰਾਸ਼ਟਰੀ ਡਾਇਬਟੀਜ਼ ਫੈਡਰੇਸ਼ਨ ਦਾ ਅੰਦਾਜ਼ਾ ਹੈ ਕਿ 2050 ਤੱਕ ਹਰ ਅੱਠ ਬਾਲਗਾਂ ਵਿੱਚੋਂ ਇੱਕ ਨੂੰ ਸ਼ੂਗਰ ਰੋਗ ਹੋਵੇਗਾ।
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
