Чүйдө аялын атып өлтүрүүгө шектелген адам кармалды
Сүрөттүн булагы, Getty Images
Чүй облусунун Москва районунда 63 жаштагы киши аялын атып өлтүрдү деген шек менен кармалды.
Облустун ички иштер башкы башкармалыгы кабарлагандай, милицияга маалымат 1-ноябрда түшкөн. Окуя Бала-Айылчы айылында болгон.
Ал жерге тергөө ыкчам тобу барган учурда Э.С. аттуу адам мас абалында үй-бүлөлүк чырдан улам өзүнүн 46 жаштагы жубайын мылтык менен атып салганы, аял алган жаратынан ошол жерде каза болгону аныкталган.
"Бул факты боюнча Москва РИИБдин тергөө кызматы тарабынан Кыргыз Республикасынын Кылмыш-жаза кодексинин 122-беренеси (Киши өлтүрүү) боюнча кылмыш иши козголду", – деп айтылат милициянын маалыматында.
Шектүү Москва райондук милиция бөлүмүнүн убактылуу кармоочу жайына киргизилди.
Тиешелүү соттук-медициналык экспертизалар дайындалып, тергөө амалдары улантылууда.
Башкы прокуратуранын маалыматына караганда, быйылкы жылдын сегиз айында 21 аял киши колдуу болгон. Былтыр жалпысынан 35 аял өлтүрүлгөн.
Быйыл Ош облусунун Кара-Кулжа районунун тургуну, беш баланын энеси, 38 жаштагы Айзирек Эралиева Өзгөн районунун Алга айылына 20 жылдык кечеге барып келгенден кийин 26-майда күйөөсүнүн колунан ажал тапкан.
Айзиректин күйөөсү, 40 жаштагы Белекбай Абдирасуловго карата "Адам өлтүрүү", "Куралды, ок-дарыларды мыйзамсыз жүгүртүү" беренеси боюнча кылмыш иши козголгон. Өзгөн райондук соту аны 18 жылга эркинен ажыраткан.
WPS (Аялдар, тынчтык жана коопсуздук индекси) деп аталган көрсөткүчкө ылайык, Кыргызстан 2021 жана 2023-жылдары эки ирет катары менен Борбор Азияда аялдар үчүн кооптуу өлкө катары таанылган. Кийинки индекс быйыл, 2025-жылы жарыяланат.
