Mae Pandora George yn 36 oed, ac yn fam lawn-amser sy'n byw yng Nghaerdydd gyda'i gwr a'i dau blentyn.
"Pan ddechreuodd fy merch i mewn ysgol gynradd Gymraeg do'n i ddim yn gallu siarad gair o Gymraeg, ac i fod yn onest, roedd y sefyllfa'n codi ofn arna i. Ro'n i wir yn poeni na fyddwn i'n gallu ei helpu hi gyda'i gwaith cartref na siarad gyda'i hathrawon, heb sôn am ddeall beth ar wyneb y ddaear oedd yn digwydd yn y cyngerdd Nadolig.
Ro'n i'n teimlo bod y Cymry'n dod o'r blaned Mawrth a finne o'r blaned Fenws - er mai un o Essex ydw i go iawn! Roedd gen i ychydig o broblem gyda fy agwedd, felly er mwyn ceisio dod drosti, fe ymunais â dosbarth Cymraeg i Rieni a pharatoi i chwalu fy ofnau gyda 2 awr yr wythnos o Pobol Y Cwm, neu rywbeth.
Mae'r cwrs, sy'n para am ddwy flynedd, yn gyflwyniad hamddenol iawn i'r iaith - y syniad yw eich bod chi'n gwneud rhywbeth tebyg yn y dosbarth i'r hyn y mae'ch plentyn chi'n ei ddysgu yn yr ysgol. Yn ystod yr wythnosau cyntaf roedden ni'n canu llawer o hwiangerddi, ond roedd y ffordd undonog roedden ni'n mwmian y geiriau'n codi cywilydd mawr arna i. Ar ôl y caneuon daeth Gweddi'r Arglwydd gyda seren aur fel gwobr - nid lle yn y nefoedd. Ond roedd y dysgu'n anodd, ac erbyn wythnos pedwar roeddwn i'n dechrau poeni.
Er mwyn fy helpu i gyda'r gwersi, mi wnes i roi lluniau o rannau o gorff Po ar waliau'r gegin a'r Anthem Genedlaethol yn y ty bach. Roedd rhai o'r bobl ddaeth i'n ty ni'n meddwl mod i'n mynd yn wirion. Y cyfan roedd fy mhlant i'n ei wneud oedd syllu arna i pan o'n i'n ymarfer caneuon clapio, gyda geiriau hollol aneglur, ac roedden nhw'n grac pan wnes i ddod â'r cyfarwyddiadau Cymraeg ar gyfer gwneud basged Basg gartre - neu efallai mai bisged oedd e i fod?
Roedd fy merch i'n gwneud i mi deimlo bod pob peth ro'n i'n ceisio'i wneud yn ofer. Fe fu un adeg dorcalonnus pan ddywedodd hi wrthon ni bod "ei hymennydd hi'n rhy fach i ddysgu Cymraeg", ond ar ôl hynny dyma hi'n dechrau cymryd yr iaith i mewn ar gyflymder anhygoel. Mae hi'n wirioneddol falch ei bod hi'n gallu siarad iaith arall ac mae e wedi rhoi hyder iddi hi ac ymdeimlad gwirioneddol o berthyn.
Yr hyn sy'n eironig yw ei bod hi'n gwrthod gadael i mi ymarfer arni hi: "No, mummy, you speak English", meddai hi. Ond mae hi'n bachu ar unrhyw gyfle i fy mychanu i drwy gywiro fy Nghymraeg i fel athrawes ysgol. Dyw hi ddim yn hawdd cael fy mychanu gan fy mhlentyn pedair oed. O leiaf rwy'n gallu troi at fy mab, sydd wrth ei fodd yn dysgu gyda mi. Dyw e ddim yn gallu siarad eto felly does 'da fe ddim dewis."
Cyngor
"Os nad yw'ch plentyn chi'n ddwyieithog pan fo'n dechrau yn yr ysgol bydd arno angen eich help chi, ac ar gyfer hynny mi fydd arnoch chi angen geiriadur lluniau o leiaf.
Ceisiwch fod un cam ar y blaen. Dysgwch yr iaith cyn i'r plant ddechrau yn yr ysgol fel nad ydyn nhw'n meddwl eu bod nhw'n well na chi."
Pandora, Caerdydd
