Mae Gill O'Connor yn helpu yn Ysgol Gynradd Casllwchwr, Abertawe, yr ysgol y mae ei dwy ferch, Katie a Mairead, yn ei mynychu.

"Mae gen i ddau blentyn yn Ysgol Casllwchwr, Mairead a Katie. Mae hi'n ysgol wych ac mae'r prifathro Mr Davies yn falch iawn o'r plant ac yn rhoi llawer o anogaeth iddynt. Rwy'n credu bod hynny'n cael effaith gadarnhaol ar y rhieni hefyd, oherwydd mae pawb eisiau'r gorau i'w plant.

Ro'n i'n arfer gweithio fel cartograffydd ac wedyn fel teilwres. Gwniadwraig sydd wedi dysgu fy hun ydw i ac mae'n debyg y byddwn i'n disgrifio fy hun fel person eitha "artistig", ond dydw i ddim yn artist. Dwi'n berson eitha creadigol ac os ydw i'n meddwl y galla i wneud rhywbeth rwy'n rhoi cynnig arno.

Dyna sut y dechreuais i wneud pethau i'r ysgol a dweud y gwir. Roedd angen llawer iawn o waith ar y llenni yn y neuadd ac roedd hynny'n mynd i fod yn ddrud iawn. Roedd angen eu hail-leinio ac mae hynny'n costio llawer o arian, felly fe feddyliais i byddwn i'n rhoi cynnig arni.

Rwy'n aelod o'r Gymdeithas Rhieni ac Athrawon ac ar un adeg ro'n i'n gwneud cinio yn yr ysgol, felly mae gen i gysylltiad â'r ysgol ers tro. Rwy'n credu ei bod yn bwysig bod rhieni yn chwarae eu rhan os ydyn nhw'n gallu. Mae gan bob un ohonom sgiliau gwahanol i'w cynnig ac ambell waith mae'n fater o roi amser o'r neilltu, os nad oes gennych chi amser, a rhoi rhywbeth yn ôl - oherwydd dy'ch chi ddim yn sylweddoli faint y byddwch chi'n ei gael ohono fe hyd nes i chi wneud hynny.

Y prosiect diwethaf y bum i'n ymwneud ag e oedd gwneud baner y bu dau o'r plant yn ei chario yn ystod gorymdaith i dynnu sylw at anghenion addysg gynradd yn Abertawe. Mae arwyddair yr ysgol arni: Rwy'n gwneud ac rwy'n deall (I do and I understand), ynghyd â bachgen a merch rwy i wedi eu gwneud ag appliqué.

Rwy i wedi gwneud ychydig o faneri gwahanol ar gyfer gwahanol bethau ac fe wnes i sachau storïau ar gyfer y plant unwaith. Fe wnes i nhw gartref ond y plant ddaeth â'r lluniau ar eu cyfer. Roedd y plant yn hoff iawn ohonyn nhw ac roedd hi'n braf eu bod nhw wedi gallu bod yn rhan o'r gwaith hefyd."

Cyngor

"Dydw i ddim yn gallu gwneud cymaint nawr oherwydd rwy'n gweithio ac mae honno'n sefyllfa y mae llawer o rieni'n cael eu hunain ynddi, ond rwy'n credu ei bod yn bwysig eich bod chi'n gwneud yr hyn allwch chi pan allwch chi. Rwy'n credu bod fy mhlant i'n eitha balch o'r hyn rwy wedi ei wneud dros y blynyddoedd. Pan oedd y faner ddiwethaf yn barod ar gyfer yr ysgol, roedd y ddwy ohonyn nhw eisiau mynd â hi - oedd yn braf iawn!

Mae gan y rhan fwyaf ohonon ni ryw sgiliau y gallwn eu trosglwyddo ac mae ar ysgolion angen cymaint o help ag y gallan nhw ei gael y dyddiau hyn. Yn ein hysgol ni mae Mr Davies bob amser yn ddiolchgar os yw rhieni'n cynnig helpu ac rwy'n gwybod bod yr athrawon eraill yn gwerthfawrogi'r help. Rwy'n meddwl y byddai rhieni'n synnu beth maen nhw'n ei gael o'r gwaith hefyd."

Gill, Casllwchwr