Ramaphosa meets Buhari: Ààrẹ South Africa ṣèpàdé pọ pẹlú ààrẹ Buhari nílùú Abuja

Aarẹ Cyril Ramaphosa orilẹ-ede South Africa ti ṣe ipade pọ pẹlu aarẹ Muhammadu Buhari niluu Abuja lori ọna lati jẹ ki ibaṣepọ to dan mọran wa sii laarin orilẹede mejeeji.

Ọjọru ni Ramaphosa gunlẹ si ilu Abuja fun abẹwo ọlọjọ mẹta sí Naijiria, Ivory Coast, Senegal ati Ghana.

Buhari ati Ramaphosa sọrọ lori bi idokowo papọ orilẹ-ede mejeeji yoo tun ṣe gberu sii.

Bakan naa ni wọn tun jijoro lori ọrọ awọn ọdọ ati eto idagbasoke fawọn obinrin.

Fun ọpọlọpọ ọdun ni awọn ọmọ ilẹ South Africa ti maa n ṣe ikọlu si awọn ọmọ Naijiria to jẹ oniṣowo lorilẹ ede South Africa eleyii to ti sakoba fun ajọṣepọ to wa laarin awọn ọmọ Naijiria ati awọn ọmọ ilẹ South Africa.

Ọpọ ọmọ Naijiria lo ti ke gbajare pe niiṣe l'awọn ọmọ ilẹ South Africa maa n ji ẹru awọn ko, ti wọn si maa n dana sun un nigba mii.

Bakan naa ni wọn sọ pe awọn ọmọ ilẹ South Africa tun maa ṣeku pa awọn nigba mii tori pe awọn n dokowo nilẹ wọn.

Ohun tawon ọmọ orílẹ̀-èdè South Africa n sọ ni pe awọn ọmọ Naijiria n gba isẹ to yẹ ki awọn maa ṣe mọ awọn lọwọ.

Ijọba Naijiria sọrọ tako iwa yii, o si tun pe aṣoju ijọba orile-ede South Africa lori ọrọ naa.

Koda, ijọba Naijiria tun ko awọn ọmọ Naijiria to ha si South Africa wale nigba naa.

Aarẹ Ramaphosa naa tọrọ aforijin lọwọ ijọba Naijiria, ijọba rẹ si ṣeleri pe oun yoo ṣe atunṣe ki alaafia le jọba laarin orilẹede mejeeji tori ipa pataki ti wọn n jọ n ko nilẹ Afirika.

Ijọba Naijiria ati ti South Africa tun buwọ lu iwe adehun lati jẹ ibaṣepọ to dan mọran tun wa sii lẹka ileeṣẹ ologun, iwakusa ati epo rọbi.

Aarẹ Ramaphosa tun lo abẹwo rẹ si Naijiria lati rawọ ẹbẹ s'awọn orilẹ-ede to fofin de irin-ajo sí South Africa tori ẹda covid-19 Omicron to ṣẹyọ nibẹ lati ka ofin naa nilẹ.